କେନ୍ଦୁଝର,୬ା୧୧(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ସରକାରୀ ଡିଗ୍ରୀ ଇଞ୍ଜିନିୟରି କଲେଜ(ଜିସିଇ)ରେ ମାଇନିଂ ଇଞ୍ଜିନିୟରିଂ ବିଭାଗର ଜଣେ ଜୁନିୟର ଛାତ୍ରଙ୍କୁ ଉକ୍ତ ବିଭାଗର ସିନିୟର ଛାତ୍ରମାନେ ଆକ୍ରମଣ କରି ଆହତ କରିଥିବା ନେଇ ଟାଉନ ଥାନା ଅଭିଯୋଗ ହୋଇଛି। ଆହତ ଜୁନିୟର ଛାତ୍ର କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସାଧୀନ ଅଛନ୍ତି। ତାଙ୍କ ନାମ ବିଶ୍ୱଜିତ୍ ବେହେରା ଏବଂ ଦ୍ୱିତୀୟ ବର୍ଷ ମାଇନିଂ ଇଞ୍ଜିନିୟରିଂରେ ପଢୁଛନ୍ତି। ତାଙ୍କ ଘର ଘଟଗାଁ ଥାନା କୋଳିମାଟି ଗ୍ରାମରେ ବୋଲି ଜଣାପଡ଼ିଛି।
ଅଭିଯୋଗ ଅନୁଯାୟୀ, ସିନିୟର ଛାତ୍ର ମୋହିତ ପାତ୍ର, ସାଫଲ୍ୟ ମଲ୍ଲିକ, କୁସୁମ ହାଁସଦା, ଶେଖର ଏବଂ ବାବୁ ଦାସ ମଙ୍ଗଳବାର ବିଳମ୍ବିତ ରାତିରେ କଲେଜ ପରିସରରେ ଥିବା ବଳଦେବଜୀଉ ହଷ୍ଟେଲର ୧୧୨ ନମ୍ବର ରୁମ୍ର କବାଟ ଭାଙ୍ଗି ଭିତରେ ପଶି ଲୁହାରଡ୍ ଓ ବାଡ଼ିରେ ପିଟାପିଟି କରିଥିଲେ। ସେମାନଙ୍କ ଆକ୍ରମଣରେ ବିଶ୍ୱଜିତ୍ ବେହେରା ଗୁରୁତର ହୋଇଥିଲେ। ତାଙ୍କୁ କେନ୍ଦୁଝର ମୁଖ୍ୟ ଡାକ୍ତରଖାନାକୁ ଚିକିତ୍ସା ପାଇଁ ଅଣାଯାଇଥିଲା। କଲେଜ ଅଧ୍ୟକ୍ଷ ସମେତ ଅନ୍ୟମାନେ ମେଡିକାଲ ଯାଇ ଚିକିତ୍ସା ବ୍ୟବସ୍ଥା କରିଥିଲେ। ଏହି ଘଟଣାକୁ ନେଇ ବିଶ୍ୱଜିତ୍ଙ୍କ ବାପା ବିନୟ କୁମାର ବେହେରା ବୁଧବାର ଟାଉନ ଥାନାରେ ଲିଖିତ ଅଭିଯୋଗ କରିଛନ୍ତି। ଟାଉନ ଥାନା ପୋଲିସ ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଛି।
ଅଭିଯୋଗ ଅନୁଯାୟୀ, ସେମାନେ ବିଶ୍ୱଜିତ୍ଙ୍କଠାରୁ ସୁନା ଚେନ୍ ଛଡ଼ାଇ ନେବା ସହ ହାତ ଓ ଗୋଡ଼କୁ ବାଡ଼େଇ ମାଡ଼ ମାରିଥିଲେ। ଫଳରେ ସେ ଅଚେତ ହୋଇଯାଇଥିଲେ। ଅଚେତ୍ ଅବସ୍ଥାରେ ତା’ଙ୍କ ସାଙ୍ଗମାନେ ମେଡିକାଲ ନେଇଥିଲେ। ପୂର୍ବରୁ ସେମାନେ ବିଶ୍ୱଜିତ୍ଙ୍କୁ ବାରମ୍ବାର ର଼୍ୟାଗିଂ କରି ଆସୁଥିଲେ ବୋଲି କଲେଜ କର୍ତ୍ତୃପକ୍ଷଙ୍କୁ ଅଭିଯୋଗ କରିଥିଲେ। ତେବେ କଲେଜ କର୍ତ୍ତୃପକ୍ଷ ଏ ନେଇ କୌଣସି ପଦକ୍ଷେପ ନେଇ ନ ଥିଲେ ବୋଲି ତାଙ୍କ ବାପା ଅଭିଯୋଗ କରିଛନ୍ତି। ଏଣୁ ମୋ’ ପୁଅ ପ୍ରତି ବିପଦ ଥିବାରୁ ବିହିତ ପଦକ୍ଷେପ ଗ୍ରହଣ କରିବାକୁ ପୋଲିସ ନିକଟରେ ସେ ନିବେଦନ କରିଛନ୍ତି।
ପୂର୍ବରୁ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇଥିଲେ ଆଜି ଏଭଳି ପରିସ୍ଥିତି ସୃଷ୍ଟି ହୋଇ ନ ଥାନ୍ତା ବୋଲି ବିଶ୍ୱଜିତ୍ଙ୍କ ବାପା କହିଛନ୍ତି। ଏହି କଲେଜରେ ଆଣ୍ଟି ର଼୍ୟାଗିଂ ସେଲ୍ ସଠିକ୍ ଭାବରେ କାମ କରୁ ନ ଥିବାରୁ ଏଭଳି ଘଟଣା ଘଟୁଛି। ଏ ନେଇ ଜିସିଇ କଲେଜ ଅଧ୍ୟକ୍ଷ ପ୍ରଫେସର ସରୋଜ କୁମାର ଷଡ଼ଙ୍ଗୀ କହିଛନ୍ତି, ପୋଲିସ ଘଟଣାର ତଦନ୍ତ କରୁଛି। ତେବେ ଅଭିଯୁକ୍ତ ଛାତ୍ରମାନଙ୍କୁ ଏକ ବର୍ଷ ପାଇଁ ପାଠପଢ଼ାରୁ ନିବୃତ୍ତ କରାଯାଇଛି।
ଅଭିଯୋଗ ହେବା ପରେ ଟାଉନ ଥାନା ପୋଲିସ କେସ୍ ନମ୍ବର ୫୧୫/୨୪ରେ ୫ ଅଭିଯୁକ୍ତ ଛାତ୍ରଙ୍କ ବିରୋଧରେ ମାମଲା ରୁଜୁ କରି ସେମାନଙ୍କୁ ଅଟକ ରଖି ତଦନ୍ତ କରୁଛି। ଏନେଇ ଟାଉନ ଥାନା ଅଧିକାରୀ ଶ୍ରୀକାନ୍ତ ସାହୁ କହିଛନ୍ତି, ଆହତ ପିଲାଙ୍କ ବାପାଙ୍କ ଅଭିଯୋଗ କ୍ରମେ ଏକ କେସ୍ କରାଯାଇ ଘଟଣାର ତଦନ୍ତ କରାଯାଉଛି। ଅଭିଯୁକ୍ତ ୫ ଛାତ୍ର ଅଟକ ଅଛନ୍ତି।
