ପୁରୀ,୧୩ା୧୨(ଅଜିତ୍ କୁମାର ମହାନ୍ତି):ମାର୍ଗଶିର ଶୁକ୍ଳପକ୍ଷ ଦ୍ୱାଦଶୀ ତିଥିକୁ ବ୍ୟଞ୍ଜନ ଦ୍ୱାଦଶୀ ଭାବେ ବୈଷ୍ଣବ ସମ୍ପ୍ରଦାୟରେ ଅତି ଆନନ୍ଦ ଉଲ୍ଲାସରେ ପାଳନ କରାଯାଇଥାଏ। ଏହି ପରିପ୍ରେକ୍ଷୀରେ ଗୁରୁବାର ଶ୍ରୀଗୌରବିହାର ଆଶ୍ରମ (ମାତା ମଠ) ପରିସରରେ ବ୍ୟଞ୍ଜନ ଦ୍ୱାଦଶୀ ଉତ୍ସବ ଅନୁଷ୍ଠିତ ହୋଇଯାଇଛି। ଶ୍ରୀଚୈତନ୍ୟ ମହାପ୍ରଭୁ ଏବଂ ଶ୍ରୀରାଧାକୃଷ୍ଣଙ୍କ ନିକଟରେ ୮୫୧ ପ୍ରକାର ବ୍ୟଞ୍ଜନ ନୈବେଦ୍ୟ ଅର୍ପଣ କରାଯାଇଥିଲା। ମଠ ମହନ୍ତ ସୁବଳ ଚରଣ ଦାସ ମହାରାଜଙ୍କ ତତ୍ତ୍ୱାବଧାନରେ ବହୁ ଶ୍ରଦ୍ଧାଳୁ ଉତ୍ସବରେ ଯୋଗଦେଇଥିଲେ। ଦାସମହାରାଜଙ୍କ କହିବା ଅନୁଯାୟୀ, ୨୦୧୭ରେ ୬୧୧, ୨୦୧୮ରେ ୬୩୫ ଓ ୨୦୧୯ରେ ୬୭୫, ୨୦୨୦ରେ ମହାମାରୀ କରୋନା କଟକଣା ମଧ୍ୟରେ ୧୫୧ ପ୍ରକାର, ୨୦୨୨ରେ ୭୦୧ ପ୍ରକାରର ବ୍ୟଞ୍ଜନ ପ୍ରସ୍ତୁତ କରାଯାଇଥିଲା। ଗତବର୍ଷ ଭଳି ଚଳିତବର୍ଷ ମଧ୍ୟ ୮୫୧ ପ୍ରକାର ବ୍ୟଞ୍ଜନ ମଧ୍ୟରେ ୨୦ରୁ ଊର୍ଦ୍ଧ୍ୱ ପ୍ରକାରର ଅନ୍ନ, ଡାଲି, ତରକାରୀ, ୫୦ ପ୍ରକାରର ଭଜା, ୨୫ ପ୍ରକାରର ଶାଗ, ୨୩୩ ପ୍ରକାର ଚଟଣୀ, ବିଭିନ୍ନ ପ୍ରକାର ଖିରୀ, ମିଠା , କଚୋଡ଼ି ପ୍ରସ୍ତୁତ କରାଯାଇଥିଲା। ପୂର୍ବରାତି ୧୨ଟା ପରେ ସମସ୍ତ ବ୍ୟଞ୍ଜନ ପ୍ରସ୍ତୁତି ଆରମ୍ଭ ହୋଇଥିଲା। ପ୍ରସ୍ତୁତିରେ ପୁରୀ, ପଶ୍ଚିମବଙ୍ଗ ଏବଂ ରାଜ୍ୟର ବିଭିନ୍ନ ସ୍ଥାନରୁ ଭକ୍ତମାନେ ଆସି ସହଯୋଗ କରିଥିଲେ। ଦ୍ୱାଦଶୀ ବ୍ୟଞ୍ଜନକୁ ନେଇ ଜନଶ୍ରୁତି ରହିଛି। ଦ୍ୱାପର ଯୁଗରେ ମାଆ ଯଶୋଦା ତାଙ୍କୁ ପୁଅ କୃଷ୍ଣଙ୍କ ଦେହ ଝଡ଼ିଯାଇଥିବାରୁ ନିଜେ ନାନାଦି ପ୍ରକାର ପୁଷ୍ଟିକର ବ୍ୟଞ୍ଜନ ପ୍ରସ୍ତୁତ କରି ଏହି ପବିତ୍ର ତିଥିରେ ତାଙ୍କୁ ପରଷି ଦେଇଥିଲେ। ସେହିପରି ଚୈତନ୍ୟ ମହାପ୍ରଭୁ ବାଲ୍ୟକାଳରେ ତାଙ୍କ ମା’ ସଚ୍ଚିଦେବୀ ଏହିଦିନ ବହୁବିଧ ବ୍ୟଞ୍ଜନ ଖୁଆଇଥିବାର କଥା ରହିଛି। ଜନଶ୍ରୁତିକୁ ଆଧାର କରି ଗୌଡ଼ୀୟ ବୈଷ୍ଣବ ଏହି ଦିନ ଅତି ନିଷ୍ଠାର ସହିତ ବ୍ୟଞ୍ଜନ ଦ୍ୱାଦଶୀ ପାଳନ କରିଥାନ୍ତି। ଏହି ଅବସରରେ ବହୁ ମାନ୍ୟଗଣ୍ୟ ବ୍ୟକ୍ତି ଯୋଗଦାନ କରି ପ୍ରସାଦ ସେବନ କରିଥିଲେ।
