ବରଗଡ଼,୮।୫(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ରବି ଧାନ ଅମଳ ଆରମ୍ଭ ହୋଇଯାଇଛି। ଜିଲାର ଜଳସେଚିତ ଅଞ୍ଚଳରେ ଏହି ପ୍ରକ୍ରିୟା ଜୋର୍ ଧରିଛି। ସେହିପରି ଅଣଜଳସେଚିତ ଅଞ୍ଚଳରେ ମଧ୍ୟ ଚାଷୀମାନେ ଧାନ ଅମଳ ଆରମ୍ଭ କରିଦେଇଛନ୍ତି। ଅନ୍ୟପଟେ ଜିଲାରେ ରବି ଧାନ ସଂଗ୍ରହ ପ୍ରକ୍ରିୟାକୁ ଆହୁରି ସପ୍ତାହେ ବାକି ରହିଛି। ଏଭଳି ସ୍ଥିତିରେ ଅମଳ ଆରମ୍ଭରୁ ଜିଲାରେ ଧାନ ବେପାରୀମାନେ ସକ୍ରିୟ ହୋଇଉଠିଛନ୍ତି। ଚାଷୀଙ୍କଠାରୁ କମ୍ ଦରରେ ବେପାରୀମାନେ ଧାନ କିଣୁଛନ୍ତି ଏବଂ ମଣ୍ଡି ଖୋଲିବା ପୂର୍ବରୁ ସେହି ଧାନ ସିଧାସଳଖ ବିଭିନ୍ନ ରାଇସ୍ ମିଲ୍କୁ ଯାଉଥିବା ଅଭିଯୋଗ ହୋଇଛି। ଏବେଠାରୁ ତଥାକଥିତ ଧାନ ବେପାରୀଙ୍କ ଉପରେ ନଜର ରଖି ତାକୁ ନିୟନ୍ତ୍ରଣ କରା ନ ଗଲେ ଆଗକୁ ଧାନବିକ୍ରି ସମସ୍ୟା ଜଟିଳ ହୋଇପଡ଼ିବ ବୋଲି ସାଧାରଣରେ ଆଶଙ୍କା ପ୍ରକାଶ ପାଇଛି।
ଗତ ମାସ ୨୩ ତାରିଖରେ ଅନୁଷ୍ଠିତ ଜିଲାସ୍ତରୀୟ ଧାନ ସଂଗ୍ରହ କମିଟି ବୈଠକରେ ମେ’ ୧୪ରୁ ଜିଲାରେ ଧାନ ସଂଗ୍ରହ ପ୍ରକ୍ରିୟା ଆରମ୍ଭ କରିବାକୁ ନିଷ୍ପତ୍ତି ହୋଇଥିଲା। ଏହି କ୍ରମରେ ଆସନ୍ତା ୧୪ ତାରିଖରୁ ଧାନ ସଂଗ୍ରହ ପାଇଁ ଜିଲାର ଅତାବିରା, ବରଗଡ଼ ଏବଂ ପଦ୍ମପୁର ନିୟନ୍ତ୍ରିତ ବଜାର କମିଟି(ଆରଏମ୍ସି) ଅଧୀନରେ ୧୮୮ ମଣ୍ଡି ତଥା ଧାନକ୍ରୟ କେନ୍ଦ୍ର ଖୋଲିବ। ସେଥିମଧ୍ୟରୁ ଅତାବିରା ବ୍ଲକରେ ୨୭, ଭେଡ଼େନ ବ୍ଲକରେ ୩୨, ଅମ୍ବାଭୋନା ବ୍ଲକରେ ୩, ବରଗଡ଼ ବ୍ଲକରେ ୩୧, ବରପାଲି ବ୍ଲକରେ ୨୫, ଭଟ୍ଲି ବ୍ଲକରେ ୧୧, ବିଜେପୁର ବ୍ଲକରେ ୧୨, ଗାଇସିଲେଟ ବ୍ଲକରେ ୩, ଝାରବନ୍ଧ ବ୍ଲକରେ ୧୧, ରାଜବୋଡ଼ାସମ୍ବର(ପଦ୍ମପୁର) ବ୍ଲକରେ ୭, ପାଇକମାଳ ବ୍ଲକରେ ୧୦ ଏବଂ ସୋହେଲା ବ୍ଲକରେ ୧୬ ଧାନମଣ୍ଡି ରହିଛି।
ଧାନ ସଂଗ୍ରହ ପୂର୍ବରୁ ମଣ୍ଡିଗୁଡ଼ିକରେ ଆବଶ୍ୟକ ଭିତ୍ତିଭୂମି ଏବଂ ଆନୁଷଙ୍ଗିକ ବ୍ୟବସ୍ଥା କରିବାକୁ ଜିଲାପାଳ ଆଦିତ୍ୟ ଗୋୟଲ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। କିନ୍ତୁ ଅନେକ ମଣ୍ଡି ଏବେ ସୁଦ୍ଧା ଯେଉଁ ତିମିରେକୁ ସେହି ତିମିରେ ରହିଛି। ଅନ୍ୟପକ୍ଷରେ ଜିଲାର ଜଳସେଚିତ ଅତାବିରା, ଭେଡ଼େନ, ବରଗଡ଼ ବ୍ଲକରେ ଧାନ ଅମଳ କାର୍ଯ୍ୟ ଜୋର୍ ଧରିଛି। ମଣ୍ଡି ଖୋଲିବାକୁ ଆହୁରି ୭ ଦିନ ବାକି ଥିବା ଯୋଗୁ ଅମଳ ଧାନ ଗଚ୍ଛିତ ରଖିବା ବର୍ତ୍ତମାନ ଚାଷୀଙ୍କ ପାଇଁ ବଡ଼ ଚିନ୍ତା ପାଲଟିଛି। ଏଭଳି ସ୍ଥିତିରେ ବେପାରୀମାନେ ଅଧିକ ସକ୍ରିୟ ହୋଇପଡ଼ିଛନ୍ତି। ଏଥର ମଧ୍ୟ ଧାନ କୁଇଣ୍ଟାଲ ପ୍ରତି ୩୧୦୦ ଟଙ୍କା ରହିଛି। କିନ୍ତୁ ବେପାରୀ ଧାନ କୁଇଣ୍ଟାଲ ପ୍ରତି ୨୫୦୦ରୁ ୨୬୦୦ ଟଙ୍କାରେ କିଣିବା ଆରମ୍ଭ କରି ଦେଇଛନ୍ତି ଏବଂ ମଣ୍ଡି ଖୋଲିବା ପୂର୍ବରୁ ସେହି ଧାନ ସିଧାସଳଖ କେତେକ ନିର୍ଦ୍ଦିଷ୍ଟ ରାଇସ୍ ମିଲ୍କୁ ଯାଉଥିବା ଚାଷୀମାନେ ଅଭିଯୋଗ କରିଛନ୍ତି।
ବରଗଡ଼ ବ୍ଲକ କଲାପାଣି ଗ୍ରାମର ଚାଷୀନେତା ସୁରେଶ ନେକାଣ୍ଟି କହିଛନ୍ତି, ଧାନ ସଂଗ୍ରହ ନୀତି ଅନୁଯାୟୀ, ମେ’ ୧ତାରିଖରୁ ମଣ୍ଡିଗୁଡ଼ିକ ଖୋଲାଯିବା କଥା। କିନ୍ତୁ ବରଗଡ଼ ଜିଲାରେ ତାକୁ ୨ ସପ୍ତାହ ବିଳମ୍ବ କରାଯାଇଛି। ସେଥିପାଇଁ ଚାଷୀମାନେ ମଣ୍ଡିକୁ ଧାନ ଆଣିବାରେ ସକ୍ଷମ ହୋଇପାରୁନାହାନ୍ତି ଏବଂ ବେପାରୀଙ୍କ ଦୌରାତ୍ମ ବଢ଼ିଚାଲିଛି। ଅତାବିରା ଅଞ୍ଚଳରେ ସେଭଳି ସ୍ଥିତି ଉପୁଜିଛି। ଏପରିକି ବେପାରୀ କିଣିଥିବା ଧାନ କେତେକ ନିର୍ଦ୍ଦିଷ୍ଟ ରାଇସ୍ ମିଲ୍କୁ ଯାଉଛି ବୋଲି ନେକାଣ୍ଟି ଅଭିଯୋଗ କରିଛନ୍ତି। ସେହିପରି ସଂଯୁକ୍ତ କୃଷକ ସଂଗଠନର ଉପଦେଷ୍ଟା ରମେଶ ମହାପାତ୍ର କହିଛନ୍ତି, ଚାଷୀ ପଞ୍ଜୀକରଣ ସମୟରେ ଉଦ୍ଦିଷ୍ଟ ଫର୍ମରେ ଚାଷୀମାନେ ସେମାନଙ୍କ ଧାନ ଅମଳର ସମ୍ଭାବ୍ୟ ତାରିଖ ଉଲ୍ଲେଖ କରିଥାନ୍ତି। ସେଥିରେ ମେ’ ପ୍ରଥମ ସପ୍ତାହରେ ଧାନ ଅମଳ ନେଇ ଅନେକ ଚାଷୀ ଉଲ୍ଲେଖ କରିଛନ୍ତି। କିନ୍ତୁ ତାକୁ ମଧ୍ୟ ଅଣଦେଖା କରାଯାଇଛି। ଅନ୍ୟପଟେ ଚାଷୀମାନେ ଧାନ ଅମଳ କରିସାରିଲେଣି ଏବଂ ମଣ୍ଡି ଖୋଲି ନ ଥିବା ଯୋଗୁ କୁଇଣ୍ଟାଲ ପ୍ରତି ୨୨୦୦ରୁ ୨୩୦୦ ଟଙ୍କାରେ ବେପାରୀଙ୍କୁ ବିକ୍ରି କରିଦେବାକୁ ବାଧ୍ୟ ହେଉଛନ୍ତି।
