କେସିଙ୍ଗା,୧୧।୨(ତୁମେଶ୍ୱର ସାହୁ): ସମ୍ବଲପୁର ରେଲୱେ ଡିଭିଜନ ଅନ୍ତର୍ଗତ କେସିଙ୍ଗା, ନର୍ଲା, ରୁପ୍ରା, ଲାଞ୍ଜିଗଡ଼, ଟିଟିଲାଗଡ଼ ଆଦି ରେଲୱେ ଷ୍ଟେସନରୁ ଆନ୍ଧ୍ରପ୍ରଦେଶର ବରକୋଳି ବ୍ୟବସାୟିମାନେ ବିନା ଟିକେଟରେ ଜିନିଷ ଚାଲାଣ କରୁଥିବା ନେଇ ଅଭିଯୋଗ ହୋଇଛି । ଟ୍ରେନରେ ଦିନ ଦ୍ଵିପ୍ରହରେ ବିନା ବୁକିଙ୍ଗରେ ହଜାର ହଜାର କ୍ୱିଣ୍ଟାଲ ବରକୋଳି ଚାଲାଣ ହେଉଛି ।ବ୍ୟବସାୟୀ ବିନା ବୁକିଙ୍ଗରେ ହଜାର ହଜାର କ୍ୱିଣ୍ଟାଲ ବରକୋଳି ଟ୍ରେନ ଯୋଗେ ଆନ୍ଧ୍ରପ୍ରଦେଶକୁ ଚାଲାଣ କରିଥିବା ବେଳେ ରେଳବାଇ କର୍ତ୍ତୃପକ୍ଷ କିମ୍ବା ଟିଟିଆଇ, ଟିଟିଲାଗଡ ଆର ପି ଏଫ କିମ୍ବା ଜିଆରପିଙ୍କ ଦୃଷ୍ଟି ପଡୁନାହୁଁ ।
ଟ୍ରେନର ବଗିରେ ହଜାର ହଜାର କ୍ୱିଣ୍ଟାଲ ବରକୋଳି ବୋଝେଇ କରି ବିନା ବୁକିଙ୍ଗ ବ୍ୟବସାୟୀମାନେ ଚାଲାଣ କରି ନେଉଥିବାରୁ ରେଲୱେ ବିଭାଗ ହଜାର ହଜାର ଟଙ୍କାର ରାଜସ୍ୱ ହାନି ଘଟୁଛି । ବର୍ତ୍ତମାନ ବରକୋଳି ଫଳ ଫଳିବାର ଋତୁ ଥିବାରୁ ବିଭିନ୍ନ ଗ୍ରାମଞ୍ଚଳରୁ କ୍ୱିଣ୍ଟାଲ ପ୍ରତି ୧୫ଶହରୁ ୨ହଜାର ଦରରେ ଚାଷୀଙ୍କ ଠାରୁ କ୍ରୟ କରି ଦଲାଲ ମାଧ୍ୟମରେରେ ବିଭିନ୍ନ ରେଲୱେ ଷ୍ଟେଶନରୁ ଆନ୍ଧ୍ରପ୍ରଦେଶରୁ ଆସୁଥିବା ବ୍ୟବସାୟୀମାନେ ଟ୍ରେନ ଯୋଗେ ଚାଲାଣ କରୁଛନ୍ତି ।
ବ୍ୟବସାୟୀମାନେ ଦ୍ରୁତଗତି କିମ୍ବା ପାସେଞ୍ଜର ଟ୍ରେନ ଯୋଗେ ବିଜୟ ନଗର, ବୋବ୍ଲି, ବିଶାଖାପାଟଣା ଆଦି ସହରକୁ ନେଇ ବରକୋଳିରୁ ପ୍ରସ୍ତୁତି ହେଉଥିବା ଫ୍ୟାକ୍ଟ୍ରିକୁ ଚାଲାଣ କରାଯାଉଛି । ଆଚାର, ବରକୋଳି ପାୱଡ଼ର ପ୍ରସ୍ତୁତି କରି ଲକ୍ଷ ଲକ୍ଷ ଟଙ୍କା ମାଲିକମାନେ ଆୟ କରୁଛନ୍ତି । ଏଥି ପ୍ରତି ସମ୍ବଲପୁର ଡିଭିଜନର ରେଳବାଇ କତ୍ତୃପକ୍ଷ ଦୃଷ୍ଟି ଦେବା ପାଇଁ ଜନ ସାଧାରଣରେ ଦାବି ହେଉଛି । ଟ୍ରେନର ବଗିରେ ବରକୋଳି ବୋଝେଇ କରିନେବା ବେଳେ ଟ୍ରେନ ବଗିର ଗେଟରେ ଜାମ୍ କରୁଥିବାରୁ ଯାତ୍ରୀମାନେ ଯାତାୟତ କରିବା ସମୟରେ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହେଉଛି ।
