ଭୁବନେଶ୍ବର, ୧୪ା୮(ସୁନିତ୍ ମିଶ୍ର): ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ ଓଡ଼ିଶା ଗସ୍ତ ପରେ ବିଜେଡି-ଭାଜପା ମେଣ୍ଟକୁ ନେଇ ଚର୍ଚ୍ଚା ବଢିବାରେ ଲାଗିଛି। ହେଲେ କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଅର୍ଜୁନ ମୁଣ୍ଡା ରବିବାର ଏହାକୁ ଖଣ୍ଡନ କରିଛନ୍ତି। ସେ କହିଛନ୍ତି ଯେ, ଓଡ଼ିଶାରେ ମେଣ୍ଟ ହେଲାଭଳି କୌଣସି ପ୍ରଶ୍ନ ଉଠୁନି। ସବୁ ରାଜ୍ୟର ବିକାଶ ସହ ମିଳିମିଶି କାମ କରିବା ପାଇଁ କେନ୍ଦ୍ର ସରକାର ସବୁବେଳେ ପ୍ରୟାସ କରୁଛନ୍ତି। ଏହା ସରକାରଙ୍କ କାମ। ସଙ୍ଗଠନର କାମ ଅଲଗା। ସଙ୍ଗଠନ ନିଜ ଢଙ୍ଗରେ ନିର୍ବାଚନ ଲଢ଼ିବା ସହିତ ରଣନୀତି କରେ। ସଙ୍ଗଠନ କେବେ ସରକାରଙ୍କ ଜରିଆରେ କୌଣସି ରଣନୀତି କରେନାହିଁ। ଓଡ଼ିଶାରେ ମେଣ୍ଟ ହେଲା ଭଳି କୌଣସି କଥା ନ ଥିଲା ଭଳି ଲାଗୁଛି। ଆଗକୁ ବି ମେଣ୍ଟ ହେଲା ଭଳି ଲାଗୁନି ବୋଲି ମୁଣ୍ଡା କହିଛନ୍ତି। ସେ ଆହୁରି କହିଛନ୍ତି, ରାଜ୍ୟରେ ଭାଜପାର ସ୍ଥିତି ବହୁତ ଭଲ ଅଛି। ୨୦୨୪ ନିର୍ବାଚନରେ ଓଡ଼ିଶାରେ ଦଳ ଭଲ ପ୍ରଦର୍ଶନ କରିବ। ଶନିବାର ଭାଜପାର ବରିଷ୍ଠ ନେତା ତଥା କେନ୍ଦ୍ରମନ୍ତ୍ରୀ ଭୂପିନ୍ଦର ଯାଦବ ଏବଂ ରାଜ୍ୟ ଭାଜପା ସଭାପତି ମନମୋହନ ସାମଲ ମଧ୍ୟ ରାଜ୍ୟରେ ବିଜେଡି ସହିତ ମେଣ୍ଟ ହେବ ନାହିଁ ବୋଲି କହିଥିଲେ। ମନ୍ତ୍ରୀ ଭୂପିନ୍ଦର କହିଥିଲେ, ଆଗାମୀ ସାଧାରଣ ନିର୍ବାଚନରେ ଭାଜପା ଓଡ଼ିଶାରେ କୌଣସି ମେଣ୍ଟ କରିବ ନାହିଁ। ଦଳ ଏକାକୀ ଲଢିବ। ଆମେ ନିଜ ଦମ୍ରେ ରାଜ୍ୟରେ ସରକାର ଗଢ଼ିବାରେ ସକ୍ଷମ ହେବୁ। ସେହିପରି ମନମୋହନ କହିଥିଲେ, ଓଡ଼ିଶାରେ କୌଣସି ମେଣ୍ଟ ହେବନାହିଁ। ଭାଜପା ଏକାକୀ ୧୪୭ଟି ବିଧାନସଭା ଓ ୨୧ଟି ଲୋକ ସଭା ଆସନରେ ଲଢ଼ିବ। ଭାଜପା ଏକ ଅନ୍ତରୀଣ ସର୍ଭେ କରିଥିଲା, ଜୁଲାଇରେ ଭାଜପା ରାଜ୍ୟରେ ଆଗରେ ଥିଲା। ଅଗଷ୍ଟରେ ବି ଆଗରେ ରହିବୁ। ରାଜ୍ୟବାସୀଙ୍କ ମତ ଆମ ସପକ୍ଷରେ ଅଛି ବୋଲି ସେ କହିଥିଲେ।
