ଭୁବନେଶ୍ୱର,୧୮।୧୧:ନୀତି ଆୟୋଗର ଅଟଳ ଇନୋଭେସନ୍ ମିଶନ୍ (ଏଆଇଏମ୍) ଜରିଆରେ ଓଡ଼ିଶାର ଆଇଏମ୍ଏମ୍ଟି ଦ୍ୱାରା ଜିଜ୍ଞାସା-ଏଟିଏଲ୍ ପ୍ରୋଗ୍ରାମ ମାଧ୍ୟମରେ ୭ଟି ପ୍ରମୁଖ ବିଦ୍ୟାଳୟରେ ଏଟିଏଲ ଟିଙ୍କରିଂ ଦିବସର ଆୟୋଜନ କରାଯାଇଥିଲା। ବିଶେଷକରି ସମଗ୍ର ଦେଶରେ ୧୦,୦୦୦ ବିଦ୍ୟାଳୟରେ ଏଆଇଏମ୍ ଉପସ୍ଥିତ ଥିବା ଏଟିଏଲ୍ ଲାବ୍ରେ ଏଟିଏଲ ଟିଙ୍କରିଂ ଦିବସର ଆୟୋଜନ କରାଯାଇଛି, ଯେଉଁଠାରେ ବିଦ୍ୟାଳୟର ଛାତ୍ରୀଛାତ୍ରୀମାନେ ଏକ ଏଆଇଏମ୍ ନିର୍ଦ୍ଧାରିତ ପରୀକ୍ଷଣ କରିଥିଲେ। ଉକ୍ତ କାର୍ଯ୍ୟକ୍ରମ(ପ୍ରୋଗ୍ରାମ)କୁ ସହାୟତା କରିବାକୁ କେନ୍ଦ୍ରୀୟ ସଂସ୍ଥା ସିଏସଆଇଆର୍-ଆଇଏମ୍ଏମ୍ଟିର ବୈଜ୍ଞାନିକମାନେ ଓଡ଼ିଶାର ୭ଟି ବିଦ୍ୟାଳୟକୁ ଯାଇଥିଲେ। ଏପରିକି ଉକ୍ତ ୭ବିଦ୍ୟାଳୟରେ ଏଟିଏଲ୍ ଟିଙ୍କରିଙ୍କ ଦିବସ-୨୦୨୨ ପରିଚାଳନା ମଧ୍ୟ କରିଥିଲେ। ଉକ୍ତ କାର୍ଯ୍ୟକ୍ରମ ପାଇଁ ଆଇଏମ୍ଏମ୍ଟି ଦ୍ୱାରା ଗ୍ରହଣ କରାଯାଇଥିବା (ବି ବି ହାଇସ୍କୁଲ ଢେଙ୍କାନାଳ, ଭୁବନେଶ୍ୱରର ସୈନିକ ସ୍କୁଲ, ସରକାରୀ ବାଳିକା ଉଚ୍ଚ ବିଦ୍ୟାଳୟ ୟୁନିଟ୍-୬, କେନ୍ଦ୍ରୀୟ ବିଦ୍ୟାଳୟ ନଂ-୪, କେନ୍ଦ୍ରୀୟ ବିଦ୍ୟାଳୟ-୫, ସରକାରୀ ହାଇସ୍କୁଲ ଆଇଆରସି ଭିଲେଜ୍ ଏବଂ ଜବାହାର ବିଦ୍ୟାପୀଠ ପିପିଲି) ବିଦ୍ୟାଳୟଗୁଡିକ ପାଇଁ ପରୀକ୍ଷାମୂଳକ ସାମଗ୍ରୀର ବ୍ୟବସ୍ଥା ମଧ୍ୟ ଆଇଏମ୍ଏମ୍ଟି ପକ୍ଷରୁ କରାଯାଇଥିଲା। ସେହିଭଳି ବ୍ୟକ୍ତିଗତ ଭାବେ ସେମାନଙ୍କୁ (ବିଦ୍ୟାଳୟ ଛାତ୍ରୀଛାତ୍ର) ଉପରୋକ୍ତ କାର୍ଯ୍ୟକ୍ରମ ପାଇଁ ଆବଶ୍ୟକ ମାର୍ଗଦର୍ଶନ କରାଯାଇଥିଲା। ଉପରୋକ୍ତ ୭ ବିଦ୍ୟାଳୟର ସମସ୍ତ ଛାତ୍ର ବିଭିନ୍ନ ସାମଗ୍ରୀକୁ ବ୍ୟବହାରକରି ଏକ ମୋଟରଫ୍ୟାନ୍ ମଡେଲ ତିଆରି କରିଥିଲେ। ସେହିପରି ବରିଷ୍ଠ ବୈଜ୍ଞାନିକ ଡ. ସନ୍ତୋଷ କୁମାର ବେହେରା, ଡ. ସୀମାନ୍ତିନୀ ନାୟକ,ଡ. ମମତା ମହାପାତ୍ର,ଡ. ସାହିଦ୍ ଅନ୍ୱାର,ଡ.ଆଶୁତୋଷ ରଥ,ଡ. ବିକାଶ କୁମାର ଜେନା,ଡ.ଉମାକାନ୍ତ ସୁବୁଦ୍ଧି ଏବଂ ଡ. ଦେବୀପ୍ରସାଦ ଦାସଙ୍କ ଦ୍ୱାରା ଏଭଳି ଏକ ଜାତୀୟସ୍ତରର କାର୍ଯ୍ୟକ୍ରମ ପରିଚାଳିତ ହୋଇଥିଲା। ସିଏସ୍ଆଇଆର୍-ଜିଜ୍ଞାସା ଦଳ ବିଦ୍ୟାଳୟଗୁଡିକ ପାଇଁ ନିୟମିତ ଅନେକ ବୈଜ୍ଞାନିକ-ଛାତ୍ର ସଂଯୋଗ କାର୍ଯ୍ୟକ୍ରମ ପରିଚାଳନା କରୁଛନ୍ତି ବୋଲି କାର୍ଯ୍ୟକ୍ରମର ସଂଯୋଜକ ଡ. ଦେବୀପ୍ରସାଦ ଦାସ ମତପ୍ରକାଶ କରିଛନ୍ତି।
