ନୂଆଦିଲ୍ଲୀ,୪ା୧୨: ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ଦୁଇ ଦିନିଆ ଭାରତ ଗସ୍ତରେ ଆସିବା ସମୟରେ ତାଙ୍କ ବିମାନ ଗୁରୁବାର ସାରା ବିଶ୍ୱରେ ସର୍ବାଧିକ ଟ୍ରାକ୍ କରାଯାଇଥିବା ଫ୍ଲାଇଟ୍ ହୋଇଥିଲା।
ଫ୍ଲାଇଟ୍ ଟ୍ରାକିଂ ୱେବସାଇଟ୍ ଫ୍ଲାଇଟ୍ ରାଡାର ୨୪ ଅନୁଯାୟୀ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଆଲୋଚନା ପାଇଁ ପୁଟିନ ନୂଆଦିଲ୍ଲୀରେ ଅବତରଣ କରିବା ପୂର୍ବରୁ ୨୦,୦୦୦ରୁ ଅଧିକ ଲୋକ ଲାଇଭ୍ରେ ଏହି ବିମାନକୁ ଟ୍ରାକ୍ କରୁଥିଲେ।
ବିମାନ ଅବତରଣ କରିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜେ ଦିଲ୍ଲୀର ପାଲମ୍ ବିମାନ ବନ୍ଦରରେ ପହଞ୍ଚି ଏକ ବିରଳ କୂଟନୈତିକ ସୌଜନ୍ୟତା ପ୍ରଦର୍ଶନ କରି ପୁଟିନଙ୍କୁ ଆଲିଙ୍ଗନ କରି ସ୍ୱାଗତ କରିଥିଲେ। ପ୍ରଧାନମନ୍ତ୍ରୀ ସ୍ତରର ଏହି ପ୍ରୋଟୋକଲ୍ ବ୍ୟବସ୍ଥା ଭାରତ ଏହି ଗସ୍ତକୁ ଦେଉଥିବା ଗୁରୁତ୍ୱକୁ ଦର୍ଶାଉଛି। ସେଠାରୁ ଉଭୟ ନେତା ପୂର୍ବରୁ SCO ସମ୍ମିଳନୀରେ ହୋଇଥିବା ବ୍ୟବସ୍ଥା ଭଳି ଏକାଠି ଗୋଟିଏ କାର୍ରେ ଯାତ୍ରା କରିଥିଲେ।
ଶୁକ୍ରବାର ହେବାକୁ ଥିବା ୨୩ତମ ଭାରତ-ରୁଷ ସମ୍ମିଳନୀର ସ୍ୱର ସ୍ଥିର କରିବା ପାଇଁ ପ୍ରଧାନମନ୍ତ୍ରୀ ମୋଦି ଆଜି ସନ୍ଧ୍ୟାରେ ପୁଟିନଙ୍କ ପାଇଁ ଏକ ବ୍ୟକ୍ତିଗତ ରାତ୍ରିଭୋଜନର ଆୟୋଜନ କରିଛନ୍ତି।
ଏହି ଶିଖର ସମ୍ମିଳନୀରେ ପ୍ରତିରକ୍ଷା ସମ୍ପର୍କକୁ ମଜବୁତ କରିବା, ବାହ୍ୟ ଚାପରୁ ଭାରତ-ରୁଷ ବାଣିଜ୍ୟକୁ ସୁରକ୍ଷିତ ରଖିବା ଏବଂ ସ୍ମଲ୍ ମଡ୍ୟୁଲାର୍ ରିଆକ୍ଟର୍ କ୍ଷେତ୍ରରେ ସହଯୋଗ ଆଦି ପ୍ରମୁଖ ବିଷୟ ଉପରେ ଆଲୋଚନା କରାଯିବ।
