କାଠମାଣ୍ଡୁ,୨୬।୧୨: ମାଓବାଦୀ ନେତା ପୁଷ୍ପ କମଲ ଦହଲ ପ୍ରଚଣ୍ଡ ହେବେ ନେପାଳର ନୂଆ ପ୍ରଧାନମନ୍ତ୍ରୀ। ତାଙ୍କୁ ଦେଶର ୨୭୫ ଏମ୍ପିଙ୍କ ମଧ୍ୟରୁ ୧୬୫ଜଣଙ୍କ ସମର୍ଥନ ରହିଛି। ସରକାର ଗଠନ ପାଇଁ ପ୍ରଚଣ୍ଡଙ୍କ ଦଳ ସିପିଏନ୍-ଏମ୍ସି ପ୍ରଥମେ ଶେର ବାହାଦୂର ଦେଓବାଙ୍କ ନେପାଳୀ କଂଗ୍ରେସ ସହ ମେଣ୍ଟ ଭାଙ୍ଗିଥିଲା। ପରେ ପୂର୍ବତନ ପ୍ରଧାନମନ୍ତ୍ରୀ କେ ପି ଶର୍ମା ଓଲିଙ୍କ ପାର୍ଟି ସିପିଏନ୍-ୟୁଏମ୍ଏଲ୍ ସହ ମେଣ୍ଟ କରିଥିଲା। ନୂତନ ମେଣ୍ଟର ଦୁଇ ପ୍ରମୁଖ ପାର୍ଟି ମଧ୍ୟରେ ଏବେ ରୋଟେଶନ୍ ନୀତି ଆଧାରରେ ପ୍ରଧାନମନ୍ତ୍ରୀ ହେବା ଲାଗି ସହମତି ପ୍ରକାଶ ପାଇଛି। ଆଲୋଚନା ପରେ ପ୍ରଥମେ ପ୍ରଚଣ୍ଡଙ୍କୁ ପ୍ରଧାନମନ୍ତ୍ରୀ କରାଯାଇଉୀ। ଏହାପରେ ଓଲି ନେପାଳର ପ୍ରଧାନମନ୍ତ୍ରୀ ହେବେ।
ପ୍ରଚଣ୍ଡଙ୍କ ସହ ଭାରତର ସର୍ବଦା କିଛି ମଧୁର ତ କିଛି ତିକ୍ତ ସମ୍ପର୍କ ରହି ଆସିଛି। ଏହାପୂର୍ବରୁ ସେ ଦୁଇଥର ନେପାଳର ରାଜନୈତିକ ନେତୃତ୍ୱ ନେଇଛନ୍ତି। ସେହି ସମୟରେ ଚାଇନା ପ୍ରତି ତାଙ୍କର ପ୍ରେମ କାହାକୁ ଅଛପା ନ ଥିଲା। ଏହାଛଡ଼ା ତାଙ୍କର ପୂର୍ବ କାର୍ଯ୍ୟକାଳ ମଧ୍ୟରେ ସେ ଭାରତକୁ ନେଇ ଅନେକ କଟୁ ମନ୍ତବ୍ୟ ଦେଇଥିଲେ। ୨୦୦୯ରେ ଯେତେବେଳେ ପ୍ରଚଣ୍ଡ କ୍ଷମତା ହରାଇଥିଲେ, ସେତେବେଳେ ସେ ଏହା ପଛରେ ଭାରତର ହାତ ଥିବା କହିଥିଲେ।
