ଗୋପାଳପୁର, ୨୨ା୨(ଡି.ଏନ୍.ଏ.): ଗଞ୍ଜାମ ଜିଲା ଗୋଳନ୍ଥରା ଥାନା ଅନ୍ତର୍ଗତ ସୋରଳ ଗ୍ରାମରେ ଗତ ୧୭ ତାରିଖ ରାତିରେ ହାସ୍ୟ ଅଭିନେତା ପପୁ ପମ୍ପମ୍ଙ୍କ ଷ୍ଟେଜ ଶୋ’ ଉପରକୁ ଟେକା, ପଥର ମାଡ଼ ହୋଇଥିଲା। ଟେକାମାଡ଼ କରିଥିବା ଅଭିଯୁକ୍ତଙ୍କୁ ସେହି ଗ୍ରାମର ଜଣେ ଯୁବକ ଚିହ୍ନଟ କରିଥିଲେ। ଏହି ଘଟଣାରେ ଦଣ୍ଡବିଧାନ ନିମନ୍ତେ ମଙ୍ଗଳବାର ଗ୍ରାମସଭା କରାଯିବାକୁ ନିଷ୍ପତ୍ତି ହୋଇଥିଲା। କିନ୍ତୁ ସୋମବାର ରାତିରେ ଅଭିଯୁକ୍ତଜଣଙ୍କ ଚିହ୍ନଟକାରୀଙ୍କ ତଣ୍ଟି କାଟି ଏକ କୂଅକୁ ଫିଙ୍ଗିଦେଇଥିଲେ ବୋଲି ଥାନାରେ ଅଭିଯୋଗ ହୋଇଛି। ଅଭିଯୁକ୍ତ ଜଣଙ୍କ ଫେରାର ହୋଇଯାଇଥିବା ବେଳେ ପୋଲିସ ନଂ୧୦୭/୨୩ରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
ସୂଚନାନୁସାରେ, ସୋରଳ ଗ୍ରାମରେ ହାସ୍ୟ ଅଭିନେତା ପପୁ ପମ୍ପମ୍ ଷ୍ଟେଜ ଶୋ’ କରୁଥିବା ବେଳେ ଗ୍ରାମର ଟୁନା ବେହେରା ତାଙ୍କୁ ଟେକା ମାଡ଼ କରିଥିଲେ ବୋଲି ଗୋପାଳଙ୍କ ପରିବାର ପକ୍ଷରୁ ଦିଆଯାଇଥିବା ଏତଲାରେ ଦର୍ଶାଯାଇଛି। ଏହି ଘଟଣା ନେଇ ଅଭିଯୁକ୍ତଙ୍କ ବିରୋଧରେ ଦଣ୍ଡବିଧାନ ନିମନ୍ତେ ମଙ୍ଗଳବାର ଗ୍ରାମସଭା କରାଯିବାକୁ ନିଷ୍ପତ୍ତି ହୋଇଥିଲା। ତେବେ ସୋମବାର ରାତିରେ ଟୁନାଙ୍କ ସହିତ ଗୋପାଳଙ୍କର ଯୁକ୍ତିତର୍କ ହୋଇଥିଲା। ଟୁନା ଉତକ୍ଷିପ୍ତ ହୋଇ ଏକ ଛୁରିରେ ଗୋପାଳଙ୍କ ତଣ୍ଟି କାଟିଦେବା ସହିତ ନିକଟସ୍ଥ ଏକ କୂଅକୁ ଠେଲି ଦେଇଥିଲେ। ଗୋପାଳଙ୍କ ଚିକତ୍ାର ଶୁଣି ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ବ୍ରହ୍ମପୁର ବଡ଼ମେଡ଼ିକାଲରେ ଭର୍ତ୍ତି କରିଥିଲେ। ତାଙ୍କର ଅବସ୍ଥା ଗୁରୁତର ହେବାରୁ ତାଙ୍କୁ କଟକ ବଡ଼ମେଡ଼ିକାଲରୁ ସ୍ଥାନାନ୍ତର କରାଯାଇଛି। ଏ ନେଇ ଗୋଳନ୍ଥରା ଥାନାରେ ଗୋପାଳଙ୍କ ପରିବାର ପକ୍ଷରୁ ଲିଖିତ ଅଭିଯୋଗ କରାଯାଇଛି। ଅଭିଯୁକ୍ତ ଟୁନା ଫେରାର ହୋଇଯାଇଥିଲେ ମଧ୍ୟ ଖୁବଶୀଘ୍ର ଗିରଫ କରାଯିବ ବୋଲି ଥାନା ଅଧିକାରୀ ବିବେକାନନ୍ଦ ମହନ୍ତ ସୂଚନା ଦେଇଛନ୍ତି।
