ମୁମ୍ବାଇ: ସର୍ବାଧିକ ୧୨ ଘଣ୍ଟିଆ କାର୍ଯ୍ୟଦିବସ ଲାଗି ଶ୍ରମ ମନ୍ତ୍ରଣାଳୟ ପକ୍ଷରୁ ପ୍ରସ୍ତାବ ଦିଆଯାଇଛି। ଏହା ସହ ମଧ୍ୟାନ୍ତର ସମୟ ମଧ୍ୟ ରହିବ। ଅକ୍ୟୁପେଶନାଲ ସେଫ୍ଟି ହେଲ୍ଥ ଆଣ୍ଡ ଓ୍ବାର୍କିଂ କଣ୍ଡିସନ୍ସ(ଓଏସ୍ଏସ୍) କୋଡ୍ ୨୦୨୦ ଡ୍ରାଫ୍ଟ ନିୟମରେ ଏହା ଉଲ୍ଲେଖ ରହିଛି। ଚଳିତ ବର୍ଷ ସଂସଦ ଏହି ବିଲ୍କୁ ଅନୁମୋଦନ ପ୍ରଦାନ କରିଛି। ସାପ୍ତାହିକ କାର୍ଯ୍ୟ ସମୟ ୪୮ ଘଣ୍ଟା ଧାର୍ଯ୍ୟ ରଖାଯିବ ବୋଲି ନଭେମ୍ବର ୧୯ରେ ସରକାର ଜାରି କରିଥିବା ଡ୍ରାଫ୍ଟ ନିୟମରେ କହିଛନ୍ତି। ସାପ୍ତାହିକ ୬ ଦିନ ଏବଂ ଦୈନିକ ୮ ଘଣ୍ଟା କାମ କରିବାକୁ ନିୟମ ରହିଥିଲେ ମଧ୍ୟ ସର୍ବାଧିକ ୧୨ ଘଣ୍ଟା କାର୍ଯ୍ୟଦିବସ ନେଇ ଲୋକଙ୍କ ମନରେ ପ୍ରଶ୍ନ ଉଠିଛି। ଏ ନେଇ ଶ୍ରମ ମନ୍ତ୍ରଣାଳୟର ଜଣେ ବରିଷ୍ଠ ଅଧିକାରୀ ସ୍ପଷ୍ଟୀକରଣ ଦେଇଛନ୍ତି। ୮ ଘଣ୍ଟା ବାଦ୍ ଯଦି ଲୋକମାନେ କାମ କରିବାକୁ ଚାହାନ୍ତି ତେବେ ଏହାକୁ ଓଭରଟାଇମ କୁହାଯିବ। ଏହାକୁ ବିଚାରକରି ସର୍ବାଧିକ କାର୍ଯ୍ୟଦିବସ ସମ୍ପର୍କରେ ପ୍ରସ୍ତାବ ଦିଆଯାଇଛି। ୮ ଘଣ୍ଟା ବାଦ୍ ଅନୂ୍ୟନ ୩୦ ମିନିଟରୁ ଅଧିକ ସମୟ କାମ କଲେ ଏହାକୁ ଓଭରଟାଇମ ବିବେଚନା କରାଯିବ ବୋଲି ଅଧିକାରୀ କହିଛନ୍ତି।
