ଭୁବନେଶ୍ୱର: ଲକ୍ଡାଉନ ଯୋଗୁ ନିର୍ମାଣ ଏବଂ ରିୟଲ ଇଷ୍ଟେଟ କ୍ଷେତ୍ର ଉପରେ ନକାରାତ୍ମକ ପ୍ରଭାବ ଜାରି ରହିଛି। ଏହି ସମସ୍ୟା ସମାଧାନ କରିବା ଲାଗି ରାଜ୍ୟ ସଭା ସଦସ୍ୟ ଡ. ଅମର ପଟ୍ଟନାୟକ ଅର୍ଥମନ୍ତ୍ରୀ ନିର୍ମଳା ସୀତାରାମନଙ୍କୁ ଭେଟି ବିଭିନ୍ନ ପ୍ରସଙ୍ଗରେ ଆଲୋଚନା କରିଛନ୍ତି। ନିକଟରେ କ୍ରେଡାଇ ଭୁବନେଶ୍ୱର ପକ୍ଷରୁ ସଦସ୍ୟମାନେ ଡ. ପଟ୍ଟନାୟକଙ୍କୁ ଭେଟି ରିୟଲ ଇଷ୍ଟେଟ କ୍ଷେତ୍ରର ରହିଥିବା ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା ମଧ୍ୟ କରିଥିଲେ। ସଦସ୍ୟ କାନ୍ତିଲାଲ ପଟେଲ, ଇଂ ଉମେଶ ପଟ୍ଟନାୟକ, ସୁଭାଷ ପଟ୍ଟନାୟକ ପ୍ରମୁଖ ଏହି ଅବସରରେ ରାଜ୍ୟର ରିୟଲ ଇଷ୍ଟେଟ କ୍ଷେତ୍ରର ବିଭିନ୍ନ ପ୍ରସଙ୍ଗ ଉପରେ ଆଲୋଚନା କରିଥିଲେ। ମହାମାରୀ ଯୋଗୁ ରିୟଲ ଇଷ୍ଟେଟ କ୍ଷେତ୍ର ସମସ୍ୟା ଘେରକୁ ଚାଲିଯାଇଛି। ଶିଳ୍ପର ରାଜସ୍ବ ପ୍ରଭାବିତ ହେବା ସହ ସରକାରଙ୍କୁ ପ୍ରଦାନ କରାଯାଉଥିବା ଟିକସ ଏହାଦ୍ୱାରା କ୍ଷତିଗ୍ରସ୍ତ ମଧ୍ୟ ହୋଇଛି। ଏହା ନିଯୁକ୍ତି କ୍ଷେତ୍ରରେ ମଧ୍ୟ ସମସ୍ୟା ସୃଷ୍ଟି କରିଛି। ସରକାର ଏହି କ୍ଷେତ୍ରର ସମସ୍ୟା ସମାଧାନକୁ ବିଚାର କରିବାକୁ କ୍ରେଡାଇ ଭୁବନେଶ୍ୱର ପକ୍ଷରୁ ନିବେଦନ କରାଯାଇଛି।
