ନୂଆଦିଲ୍ଲୀ,୧୦।୧୦: ସରକାର ଏୟାର ଇଣ୍ଡିଆର ଘରୋଇ କରଣ କରିଛନ୍ତି। ସାର୍ବଜନୀନ କ୍ଷେତ୍ର କମ୍ପାନୀ(ପିଏସ୍ୟୁ)ଗୁଡ଼ିକୁ ଘରୋଇ ହାତକୁ ହସ୍ତାନ୍ତର କରିବାକୁ କେନ୍ଦ୍ରର ଅଭିଯାନ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏବେ ଏହି ତାଲିକାରେ ଅନ୍ୟ କମ୍ପାନୀ ମଧ୍ୟ ରହିଛନ୍ତି। ଡିସେମ୍ବର ସୁଦ୍ଧା ନୀଳାଚଳ ଇସ୍ପାତ ଏବଂ ସେଣ୍ଟ୍ରାଲ ଇଲେକ୍ଟ୍ରୋନିକ୍ସ ରାଷ୍ଟ୍ରାୟତ୍ତ କମ୍ପାନୀ ଘରୋଇ ହେବା ସମ୍ଭାବନା ନେଇ ସରକାରଙ୍କପକ୍ଷରୁ ସଙ୍କେତ ଦିଆଯାଇଛି।
ପୁଞ୍ଜି ବିନିଯୋଗ ଏବଂ ପବ୍ଲିକ ଆସେଟ ମ୍ୟାନେଜମେଣ୍ଟ ବିଭାଗ (ଡିଆଇପିଏଏମ) ସଚିବ ତୁହିନ କାନ୍ତ ପାଣ୍ଡେ କହିଛନ୍ତି ଯେ ପ୍ରାୟ ଦୁଇ ଦଶନ୍ଧି ତଳେ ପ୍ରଥମ ଘରୋଇକରଣରୁ ମିଳିଥିବା ସଫଳତା ଆଧାରରେ ସରକାର ଘରୋଇକରଣ ଅଭିଯାନକୁ ତ୍ୱରାନ୍ବିତ କରିବାକୁ ରଣନୀତି ପ୍ରସ୍ତୁତ କରିଛନ୍ତି।
ସରକାର ଘରୋଇକରଣ କରିବାକୁ ଚାହୁଁଥିବା ଅନ୍ୟ ପିଏସ୍ୟୁ ଗୁଡ଼ିକ ମଧ୍ୟରେ ଶିପିଂ କର୍ପୋରେଶନ ଅଫ ଇଣ୍ଡିଆ ଏବଂ ପଓ୍ବନ ହନ୍ସ ଅନ୍ତର୍ଭୁକ୍ତ। ଏହା ବ୍ୟତୀତ ମାର୍ଚ୍ଚରେ ବିପିସିଏଲ ଏବଂ ବିଏମଇଏଲ ଘରୋଇକରଣ ସହିତ ଷ୍ଟକ ଏକ୍ସଚେଞ୍ଜରେ ଏଲଆଇସିର ମେଗା ତାଲିକା ସରକାର ଆଶା କରୁଥିବା ସେ ପ୍ରକାଶ କରିଛନ୍ତି।
