ନୂଆଦିଲ୍ଲୀ,୪।୧୨ – ଲକ୍ଡାଉନ କଟକଣାକୁ ସରକାର ପର୍ଯ୍ୟାୟକ୍ରମେ କୋହଳ କରୁଥିବା ବେଳେ ବର୍ତ୍ତମାନ ସୁଦ୍ଧା ଦେଶ ମଧ୍ୟରେ ବିମାନ ଚଳାଚଳ ଲାଗି ବିଭିନ୍ନ ସୁବିଧା କରୁଛନ୍ତି। ଗୁରୁବାରଠାରୁ ଦେଶ ମଧ୍ୟରେ ୮୦% ପର୍ଯ୍ୟନ୍ତ କ୍ଷମତାରେ ବିମାନ ଚଳାଚଳ କରାଇବା ଲାଗି ସରକାର ଅନୁମତି ଦେଇଛନ୍ତି। ଏବେ ଯାଏ ପ୍ରାୟ ୭୦% କ୍ଷମତାରେ ବିମାନଗୁଡିକ ପରିଚାଳିତ ହେଉଥିଲା। ଏହି ସୀମାକୁ ସରକାର ୧୦% ବଢାଇଛନ୍ତି। କରୋନା ମହାମାରୀକୁ ନିୟନ୍ତ୍ରଣ କରିବା ଲାଗି ଦେଶ ମଧ୍ୟରେ ପ୍ରାୟ ୨ ମାସ ବିମାନ ଚଳାଚଳ ବନ୍ଦ ରହିଥିଲା। ମେ ମାସ ୨୫ ପରଠାରୁ କଟକଣା ସହ ବିମାନ ସେବାକୁ ଅନୁମତି ଦିଆଯାଇଥିଲା।
ଏହି ପରିପ୍ରେକ୍ଷୀରେ ବେସାମରିକ ବିମାନ ଚଳାଚଳ ମନ୍ତ୍ରୀ ହରଦୀପ ସିଂ ପୁରୀ କହିଛନ୍ତି, ୨୫ ମେ’ରେ ଦେଶ ମଧ୍ୟରେ ୩୦ ହଜାର ଯାତ୍ରୀଙ୍କୁ ବିମାନଯାତ୍ରା କରିବା ଲାଗି ଅନୁମତି ମିଳିଥିଲା। ଏହା ବର୍ତ୍ତମାନ ୨.୫୨ ଲକ୍ଷ ଛୁଇଁଛି। ବିମାନ କମ୍ପାନୀଗୁଡ଼ିକ କୋଭିଡ୍-୧୯ ପୂର୍ବବର୍ତ୍ତୀ ସମୟ ଯେଉଁ କ୍ଷମତାରେ ପରିଚାଳିତ ହେଉଥିଲେ ସେହି ଅନୁସାରେ ଏବେ ଚାଲିପାରିବେ। ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ(ଡିଜିସିଏ) ସୂଚନା ମୁତାବକ ୨୦୨୦-୨୧ ଶୀତକାଳୀନ ସମୟ ଅବଧି ଲାଗି ଦେଶର ୯୫ ବିମାନ ବନ୍ଦରରେ ସାପ୍ତାହିକ ୧୨,୯୮୩ ବିମାନ ଉଡ଼ାଣକୁ ଅନୁମତି ଦିଆଯାଇଛି।
୨୦୧୯-୨୦ ସମାନ ଅବଧିରେ ସାପ୍ତାହିକ ୨୩,୩୦୭ ବିମାନ ଉଡ଼ାଣକୁ ଅନୁମତି ମିଳିଥିଲା। ଅର୍ଥାତ୍ ଚଳିତ ବର୍ଷ ଶୀତକାଳୀନ ସମୟ ଲାଗି ୪୪.୩% କମ୍ ବିମାନକୁ ଅନୁମତି ମିଳିଛି। ଏହା ମଧ୍ୟରେ ୨ଥର ଉଡ଼ାଣ କ୍ଷମତା ୨ ଥର ବଢିଛି। ପ୍ରତି ଥର ୧୦% ଲେଖାଏ କ୍ଷମତା ବୃଦ୍ଧି କରାଯାଇଛି। ଫଳରେ ପୂର୍ବ ସୂଚୀ ଅନୁସାରେ ସାପ୍ତାହିକ ୪ ହଜାର ଅଧିକ ବିମାନ ଉଡ଼ିପାରିବ। ସୂଚନାଯୋଗ୍ୟ, ଘରୋଇ ଉଡ଼ାଣ କ୍ଷେତ୍ରରେ ସରକାର ଧାର୍ଯ୍ୟ କରିଥିବା ଭଡ଼ା ନିୟମ ୨୦୨୧ ଫେବୃୟାରୀ ଯାଏ ବାଧ୍ୟତାମୂଳକ ରହିବ। ଏହା ପୂର୍ବରୁ ନଭେମ୍ବର ୨୪ ଯାଏ ରହିଥିବା ବେଳେ ୩ ମାସ ସମୟ ବଢ଼ାଯାଇଛି।
