ବ୍ରହ୍ମପୁର ଅଫିସ,୧୯ ।୬: ଜାମିନଦାର ଏବଂ ସିକ୍ୟୁରିଟି ଜମା ଦାଖଲ କରିପାରୁ ନ ଥିବାରୁ ଜାମିନ ପାଇ ବି ବ୍ରହ୍ମପୁର ମଣ୍ଡଳ କାରାଗାରରୁ ମୁକୁଳି ପାରୁନାହାନ୍ତି ୬ ବନ୍ଦୀ। ସେହି ବିଚାରାଧୀନ ବନ୍ଦୀମାନେ ଜେଲରୁ ମୁକୁଳିବା ଅପେକ୍ଷାରେ ସେଠାରେ ପଡ଼ି ରହିଛନ୍ତି। ଅଦାଲତର ସର୍ତ୍ତ ଅନୁଯାୟୀ ଆର୍ଥିକ ଦୁର୍ବଳ ବର୍ଗର ଏହି ବନ୍ଦୀମାନେ ଜାମିନଦାର ଏବଂ ସିକ୍ୟୁରିଟି ଜମା ଅର୍ଥ ଯୋଗାଡ଼ କରିପାରୁ ନାହାନ୍ତି। ଫଳରେ ସେମାନଙ୍କ ମୁକୁଳିବା ବାଟ ବନ୍ଦ ହୋଇ ରହିଛି।
ବିଭାଗୀୟ ତଥ୍ୟ ଅନୁଯାୟୀ, ବ୍ରହ୍ମପୁର ମଣ୍ଡଳ କାରାଗାରରେ ଜୁନ ୧୮ ସୁଦ୍ଧା ୧୦୨୭ ବନ୍ଦୀ ରହିଛନ୍ତି। ସେମାନଙ୍କ ମଧ୍ୟରେ ୮୫୮ ବିଚାରାଧୀନ ବନ୍ଦୀ ଭାବେ(ୟୁଟିପି) ଥିବା ବେଳେ ୧୬୯ କଏଦୀ ରହିଛନ୍ତି। ସେହିପରି ଏମାନଙ୍କ ମଧ୍ୟରୁ ୨୧ ମହିଳା ରହିଛନ୍ତି। ସେମାନଙ୍କ ମଧ୍ୟରେ ୫ ଜଣ କଏଦୀ ଥିବା ବେଳେ ୧୬ୟୁଟିପି ରହିଛନ୍ତି ବୋଲି ଜେଲର ସତ୍ୟ ନାରାୟଣ ବେହେରା ସୂଚନା ଦେଇଛନ୍ତି। ବ୍ରହ୍ମପୁର ମଣ୍ଡଳ କାରାଗାର ଦକ୍ଷିଣ ଓଡ଼ିଶାର ସର୍ବପୁରାତନ ଜେଲ ଅଟେ। ଏହା ୧୮୬୩ ରେ ପ୍ରତିଷ୍ଠା ହୋଇଥିଲା। ଏହି ଜେଲରେ ୮୪୧ ବନ୍ଦୀ ରହିବା ପାଇଁ କ୍ଷମତା ଥିବା ବେଳେ ବର୍ତ୍ତମାନ ୧୦୨୭ ବନ୍ଦୀ ଅଛନ୍ତି। ଯାହାକି ନିର୍ଦ୍ଧାରିତ କ୍ଷମତା ଠାରୁ ଶତକଡ଼ା ୨୬ ପ୍ରତିଶତ ଅଧିକ ରହିଥିବା ବିଭାଗୀୟ ସୂତ୍ରରୁ ଜଣାପଡ଼ିଛି।
