ପାଟଣା,୭।୨(ବୀର କିଶୋର ଦାଶ): କେନ୍ଦୁଝର ଜିଲା ସାହାରପଡା ବ୍ଲକ କୁଣ୍ଡୁଳା ପଞ୍ଚାୟତ ଜୟପୁର ପ୍ରାଥମିକ ବିଦ୍ୟାଳୟ ପରିସରରେ ଶୁକ୍ରବାର ଜଣେ ବ୍ୟକ୍ତି ନିଶାସକ୍ତ ଅବସ୍ଥାରେ କଟୁରି ଧରି ଆତଙ୍କ ଖେଳାଇଛନ୍ତି । ତେବେ ଉକ୍ତ ବ୍ୟକ୍ତିଙ୍କ ଉନ୍ମତ୍ତ କାଣ୍ଡର ଭିଡ଼ିଓ ସୋସିଆଲ ମିଡିଆରେ ଭାଇରାଲ ହୋଇଛି । ନିଶାସକ୍ତ ବ୍ୟକ୍ତି ମଦ ନିଶାରେ ଚୁର ହୋଇ ଅଭିଭାବକ ଓ ଗ୍ରାମବାସୀଙ୍କୁ ବିଭିନ୍ନ ପ୍ରକାର ଅସଭ୍ୟ ଭାଷା ପ୍ରୟୋଗ କରି ପାଟି ତୁଣ୍ଡ କରିବା ସହ ହାତରେ କଟୁରି ଧରି ଆତଙ୍କ ଖେଳାଉଥିବାର ଏହି ଭିଡିଓ ଏବେ ସାମ୍ନାକୁ ଆସିଛି ।
ଆତଙ୍କ ଖେଳାଇଥିବା ବ୍ୟକ୍ତି ଜଣଙ୍କ ସେହି ସ୍କୁଲର ପ୍ରଧାନ ଶିକ୍ଷୟିତ୍ରୀ ପୁନମି ନାଏକଙ୍କ ସ୍ଵାମୀ ବିଜୁ ନାଏକ ବୋଲି ଜଣା ପଡିଛି । ସ୍କୁଲ ଚାଲୁଥିବା ବେଳେ ନିଶାସକ୍ତ ବିଜୁ ହାତରେ କଟୁରୀ ଧରି ସ୍ତ୍ରୀ ଓ ଗାଁ ଲୋକଙ୍କୁ ମାରିଦେଵି କହି ଦୀର୍ଘ ସମୟ ସ୍କୁଲରେ ପରିସରରେ ହଙ୍ଗମା ଓ ଉନ୍ମତ୍ତ କାଣ୍ଡ ଭିଆଇଥିଲେ। ବିଦ୍ୟାଳୟ ପରିସରରେ ଶିକ୍ଷୟିତ୍ରୀ ଓ ତାଙ୍କ ସ୍ବାମୀ ରହିଥିବା ବେଳେ ଶୁକ୍ରବାର ହଠାତ୍ ଏଭଳି କାଣ୍ଡ ଘଟାଇଥିବା ଦେଖିବାକୁ ମିଳିଛି ।
ବ୍ୟକ୍ତି ଜଣକ ଏକ ଧାରୁଆ ଅସ୍ତ୍ର ଧରି ଧମକ ଦେଉଥିବା ଭିଡିଓ ସାମ୍ନାକୁ ଆସିଛି । ତେବେ ସ୍ଥାନୀୟ ଲୋକେ ତାଙ୍କୁ ବୁଝା ସୁଝା କରିବା ପାଇଁ ଯାଇଥିବା ବେଳେ ତାଙ୍କୁ ମଧ୍ୟ ବିଭିନ୍ନ ପ୍ରକାର ଅସଭ୍ୟ ଭାଷାରେ ଗାଳି ଗୁଲଜ କରୁଥିବା ଭିଡିଓରେ ଦେଖିବାକୁ ମିଳିଛି । ବ୍ୟକ୍ତିଙ୍କ ଏଭଳି କାଣ୍ଡକୁ ନେଇ ସ୍କୁଲ ଚାଲୁ ଥିବା ସମୟରେ ଛାତ୍ରୀ ଛାତ୍ର ମାନଙ୍କର ପାଠ ପଢ଼ାରେ ମଧ୍ୟ ବାଧା ଉପୁଜିବା ସହ ଭୟଭୀତ ଅବସ୍ଥାରେ ରହିଥିଲେ। ଘଟଣାର ତଦନ୍ତ କରି ସଂପୃକ୍ତ ବ୍ୟକ୍ତିଙ୍କ ଉପରେ ଯଥାଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି ।