ଭୁବନେଶ୍ୱର,୯ା୪(ସୁଚିସ୍ମିତା ସାହୁ):ପୁଣି ଧାରଣାରେ ବସିଲେ ପ୍ରାଥମିକ ଶିକ୍ଷକ। ୨୦୦୧ରୁ ଏପର୍ଯ୍ୟନ୍ତ କାର୍ଯ୍ୟରତ ସମସ୍ତ ଶିକ୍ଷକଙ୍କ କାର୍ଯ୍ୟକାଳକୁ ଠିକା କାର୍ଯ୍ୟରୁ ଉଚ୍ଛେଦ କରି ମୂଳ ଚାକିରିରେ ଗଣନା କରି ୬ଟି ନୋଶନାଲ ଇନ୍କ୍ରିମେଣ୍ଟ ପ୍ରଦାନ ଆଦି ୨ ଦଫା ଦାବି ନେଇ ବୁଧବାର ପ୍ରାଥମିକ ଶିକ୍ଷକ ମହାସଂଘ ଷ୍ଟିଅରିଂ କମିଟିର ସଦସ୍ୟମାନେ ଗାନ୍ଧୀମାର୍ଗରେ ବିକ୍ଷୋଭ ପ୍ରଦର୍ଶନ କରିଛନ୍ତି। ମହାସଂଘ ଆବାହକ ରାମଲାଲ ପଟେଲଙ୍କ ଅଧ୍ୟକ୍ଷତାରେ ବିଭିନ୍ନ ଜିଲା ଏବଂ ବ୍ଲକର ଷ୍ଟିଅରିଂ କମିଟି ସଦସ୍ୟମାନେ ଏହି ଆନ୍ଦୋଳନରେ ସାମିଲ ହୋଇଥିଲେ। ଅପରାହ୍ଣ ୨ଟାରେ ଆଲୋଚନା ପାଇଁ ଆବାହକଙ୍କୁ ସରକାରଙ୍କ ପକ୍ଷରୁ ଡକରା ଆସିଥିଲା। ଆବାହକଙ୍କ ପରିବର୍ତ୍ତେ କମିଟିର ସଦସ୍ୟମାନେ ଯାଇଥିଲେ। ତେବେ ଦାବି ପୂରଣ ନିମନ୍ତେ ଯଦି ମୁଖ୍ୟମନ୍ତ୍ରୀ ହସ୍ତକ୍ଷେପ ନ କରନ୍ତି, ତେବେ ଧାରଣା ଜାରି ରହିବ। ଆଗାମୀ ଦିନରେ ଆହୁରି ତୀବ୍ରତର କରିବା ପାଇଁ ଜିଲା ଓ ବ୍ଲକସ୍ତରକୁ ପ୍ରସାରିତ କରାଯିବ। ଏଥିପାଇଁ ଶିକ୍ଷା ବ୍ୟବସ୍ଥାରେ ଯେଉଁ ବାଧା ସୃଷ୍ଟି ହେବ, ସେଥିପାଇଁ ସରକାର ଦାୟୀ ରହିବେ ବୋଲି ସଦସ୍ୟମାନେ କହିଥିଲେ। ଏହି ଗଣଧାରଣାରେ ଷ୍ଟିଅରିଂ କମିଟି ସଦସ୍ୟ ସୁଶାନ୍ତ କୁମାର ବେହେରା, ଅଜିତ ମହାରଣା, ଶ୍ରୀକାନ୍ତ ବାରିକ, ଯୁଧିଷ୍ଠିର ସାହୁ, ସନ୍ତୋଷ ସାହୁ, ଅଜୟ ଧଳ ପ୍ରମୁଖ ଉପସ୍ଥିତ ଥିଲେ।
Dharitri – Odisha’s No.1 Odia Daily
