ନୂଆଦିଲ୍ଲୀ,୨୫।୧: ୭୪ତମ ସାଧାରଣତନ୍ତ୍ର ଦିବସ ଅବସରରେ ବୁଧବାର ବୀରତା ପୁରସ୍କାର ଘୋଷଣା କରାଯାଇଛି। ପ୍ରତିରକ୍ଷା ମନ୍ତ୍ରଣାଳୟ କହିଛି, ରାଷ୍ଟ୍ରପତି ସାଧାରଣତନ୍ତ୍ର ଦିବସ ଅବସରରେ ୪୧୨ ଜଣଙ୍କୁ ବୀରତା ପୁରସ୍କାର ପ୍ରଦାନ କରାଯିବ। ଏଥିମଧ୍ୟରେ ୬ ଜଣଙ୍କୁ କୀର୍ତ୍ତିଚକ୍ର (୪ ଜଣଙ୍କୁ ମରଣୋତ୍ତର), ୧୫ ଶୌର୍ଯ୍ୟଚକ୍ର (୨ ମରଣୋତ୍ତର), ଜଣଙ୍କୁ ଗ୍ୟାଲେଣ୍ଟ୍ରି, ୯୨ ସେନା ପଦକ (୪ ମରଣୋତ୍ତର), ୭ ବାୟୁସେନା ପଦକ (ଗ୍ୟାଲେଣ୍ଟ୍ରି), ୨୯ ପରମ ବିଶିଷ୍ଟ ସେବା ପଦକ, ୩ଟି ଉତ୍ତମ ସେବା ପଦକ, ୨ଟି ବିଶିଷ୍ଟ ସେବା ପଦକ, ୫୨ ଅତି ବିଶିଷ୍ଟ ସେବା ପଦକ, ୧୦ ଯୁଦ୍ଧ ସେବା ପଦକ, ୨ ଜଣଙ୍କୁ ଦ୍ୱିତୀୟଥର ସେନା ପଦକ (କର୍ତ୍ତବ୍ୟ ପ୍ରତି ସମର୍ପଣ), ୩୬ ସେନା ପଦକ (କର୍ତ୍ତବ୍ୟ ପ୍ରତି ସମର୍ପଣ), ୨ ଜଣଙ୍କୁ ଦ୍ୱିତୀୟଥର ନୌସେନା ପଦକ (କର୍ତ୍ତବ୍ୟ ପ୍ରତି ସମର୍ପଣ) (ମରଣୋତ୍ତର), ୧୧ ନୌସେନା ପଦକ (କର୍ତ୍ତବ୍ୟ ପ୍ରତି ସମର୍ପଣ) (୩ ମରଣୋତ୍ତର), ୧୪ ବାୟୁ ସେନା ପଦକ (କର୍ତ୍ତବ୍ୟ ପ୍ରତି ସମର୍ପଣ), ୨ ଜଣଙ୍କୁ ଦ୍ୱିତୀୟଥର ବିଶିଷ୍ଟ ସେବା ପଦକ ଏବଂ ୧୨୬ ଜଣଙ୍କୁ ବିଶିଷ୍ଟ ସେବା ପଦକ ଦିଆଯିବ।
ମେଜର ଶୁଭାଙ୍ଗ ଡୋଗରା ଏବଂ ଜିତେନ୍ଦ୍ର ସିଂ ରାଜପୁତଙ୍କୁ କୀର୍ତ୍ତିଚକ୍ର ପ୍ରଦାନ କରାଯିବ। ଜମ୍ମୁ କଶ୍ମୀରର ବୁଦ୍ଧଗାମରେ ହୋଇଥିବା ଅପରେଶନରେ ତାଙ୍କର ପ୍ରମୁଖ ଭୂମିକା ପାଇଁ ଶୁଭାଙ୍ଗଙ୍କୁ ଦ୍ୱିତୀୟ ସର୍ବୋଚ୍ଚ ପଦକ କୀର୍ତ୍ତିଚକ୍ର ପ୍ରଦାନ କରାଯିବ। ଅପରେଶନ ସମୟରେ ସେ ଜଣେ ଆତଙ୍କବାଦୀଙ୍କୁ ହତ୍ୟା କରି ଆହତ ସୈନିକମାନଙ୍କୁ ଉଦ୍ଧାର କରିଥିଲେ।
