ନୂଆଦିଲ୍ଲୀ,୧।୧୨: ସାଉଥ ଏସିଆ ଅଫ୍ ଗ୍ରୁପ୍-ଏମ୍ ମିଡିଆ (ଇଣ୍ଡିଆ) ପ୍ରାଇଭେଟ୍ ଲିମିଟେଡ୍ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ପ୍ରଶାନ୍ତ କୁମାର ବିଜ୍ଞାପନ ଶିଳ୍ପର ଜଣାଶୁଣା ସଂଘ ଆଡଭର୍ଟାଇଜିଂ ଏଜେନ୍ସି ଆସୋସିଏଶନ ଅଫ୍ ଇଣ୍ଡିଆ (ଏଏଏଆଇ)ର ନୂତନ ସଭାପତି ଭାବେ ବୁଧବାର ନିର୍ବାଚିତ ହୋଇଛନ୍ତି। ଏପରିକି ଏଏଏଆଇର ବାର୍ଷିକ ସାଧାରଣ ଅଧିବେଶନରେ ପ୍ରଶାନ୍ତ ୨୦୨୨-୨୩ ବର୍ଷ ପାଇଁ ସଂଘର ସଭାପତି ଭାବେ ନିର୍ବାଚିତ ହୋଇଥିବା ଏଏଏଆଇ ପକ୍ଷରୁ କୁହାଯାଇଛି।
ସେହିଭଳି ହାଭାସ୍ ଗ୍ରୁପ୍ ଇଣ୍ଡିଆର ଗ୍ରୁପ୍ ସିଇଓ ରାଣା ବରୁଆ ଉପସଭାପତି ଭାବେ ନିର୍ବାଚିତ ହୋଇଥିବା ବେଳେ ମ୍ୟାଟ୍ରିକ୍ସ ପବ୍ଲିକେଶନ୍ସ ଏବଂ ମିଡିଆ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ର ବିଶନଦାସ ହର୍ଦାସାନି, କ୍ରାୟନ୍ସ ଆଡଭର୍ଟାଇଜିଂ ପ୍ରା.ଲି.ର କୁନାଲ ଲାଲାନି, କିନ୍ନେକ୍ଟ ପ୍ରା.ଲି.ର ରୋହନ ମେହେଟା, କୋଚିନ୍ର ମୈତ୍ରୀ ଆଡଭର୍ଟାଇଜିଂ ଓ୍ବାର୍କସ୍ ପ୍ରା.ଲି.ର ଚନ୍ଦ୍ରମୌଳି ମୁଥୁ,ବିଇହାଇଭ କମ୍ୟୁନିକେଶନ୍ସ ପ୍ରା.ଲି.ର ଶ୍ରୀଧର ରାମାସୁବ୍ରମଣ୍ୟନ୍, ଇନିସିଏଟିଭ୍ ମିଡିଆ ଇଣ୍ଡିଆ ପ୍ରା.ଲି.ର ଶଶିଧର ସିହ୍ନା, ହାଇଦ୍ରାବାଦର ସ୍ଲୋକା ଆଡଭର୍ଟାଇଜିଂ ପ୍ରା.ଲି.ର କେ. ଶ୍ରୀନିବାସ ଏବଂ ଇନ୍ଓସେନ ଓ୍ବାଲର୍ଡଓ୍ବାଇଡ୍ କମ୍ୟୁନିକେଶନ ପ୍ରା.ଲି.ର ବିବେକ ଶ୍ରୀବାସ୍ତବ ସଂଘର ବୋର୍ଡକୁ ପର୍ଯ୍ୟାୟକ୍ରମେ ମନୋନୀତ ହୋଇଛନ୍ତି।
ଉଲ୍ଲେଖଯୋଗ୍ୟ, ସଂଘର ପୂର୍ବତନ ସଭାପତି ଅନୁପ୍ରିୟା ଆଚାର୍ଯ୍ୟ ୨୦୨୨-୨୩ ପାଇଁ ଏଏଏଆଇ ବୋର୍ଡର ପୂର୍ବତନ ଅଫିସିଆଲ ସଦସ୍ୟ ଭାବେ କାର୍ଯ୍ୟ କରିବେ। ଏ ସମ୍ପର୍କରେ ଏଏଏଆଇର ସଭାପତି ପ୍ରଶାନ୍ତ କୁମାର (ପି.କେ.) କହିଛନ୍ତି ,ଏଭଳି ଏକ ସମ୍ମାନଜନକ ସଙ୍ଗଠନର ସଭାପତି ଭାବେ ନିର୍ବାଚିତ ହୋଇଥିବାରୁ ମୁଁ ଅତ୍ୟନ୍ତ ଆନନ୍ଦିତ। ଏପରିକି ଯଦି ଆମେ ଏକାଠି କାମ କରିବା ତେବେ ଆମେ ଲକ୍ଷ୍ୟ ହାସଲ କରିବାକୁ ସକ୍ଷମ ହୋଇପାରିବା ବୋଲି ସେ ମତପ୍ରକାଶ କରିଛନ୍ତି। ଏଏଏଆଇ ମଧ୍ୟରେ ଥିବା ମୋର ସାଥୀ ଏବଂ ସହକର୍ମୀମାନେ ଆଗାମୀ ଦିନରେ ଆବଶ୍ୟକ ସହଯୋଗ କରିବେ ବୋଲି ମୋର ଆଶା ରହିଛି। ସେହିଭଳି ଏଏଏଆଇର ବିଦାୟୀ ସଭାପତି ଅନୁପ୍ରିୟା ଆଚାର୍ଯ୍ୟ କହିଛନ୍ତି, ଗତ ୨ ବର୍ଷ ଧରି ଏଏଏଆଇର ସଭାପତି ଭାବେ କାର୍ଯ୍ୟ କରିବା ମୋ ପାଇଁ ଏକ ସୌଭାଗ୍ୟର ବିଷୟ ଥିଲା।
ସେ ଦୀର୍ଘଦିନ ଧରି ଭାରତୀୟ ଗଣମାଧ୍ୟମ ଏବଂ ବିଜ୍ଞାପନ ଶିଳ୍ପର ପ୍ରମୁଖ ସଦସ୍ୟ ରହି ଆସିଛନ୍ତି। ମୁଁ ନିଶ୍ଚିତ ଯେ ସେ ଆସୋସିଏସନକୁ ଆହୁରି ଅଧିକ ଶକ୍ତିଶାଳୀ କରିବା ସହ ବିକାଶମୂଳକ କାର୍ଯ୍ୟ ଜାରି ରଖିବେ।ଉଲ୍ଲେଖଯୋଗ୍ୟ, ଦୀର୍ଘ ୨୫ ବର୍ଷରୁ ଅଧିକ ସମୟ ହେବ ପି.କେ. ଗ୍ରୁପ୍-ଏମ୍ ସହ ଜଡ଼ିତ ରହିବା ସହିତ ବିଜ୍ଞାପନ ଶିଳ୍ପରେ କାର୍ଯ୍ୟ କରିସାରିଛନ୍ତି। ସେ ଏହା ପୂର୍ବରୁ ପେପ୍ସି, ଦି ହିନ୍ଦୁ, ଦି ମିଡିଆ ଏଜ୍ ଏବଂ ମ୍ୟାକ୍କାନ୍ ଏରିକ୍ସନ୍ ଭଳି ସଂସ୍ଥାରେ କାର୍ଯ୍ୟ କରୁଛନ୍ତି। ସେ ମଧ୍ୟ ୨୦୨୦-୨୨ ପର୍ଯ୍ୟନ୍ତ ଏଏଏଆଇର ଉପାଧ୍ୟକ୍ଷ ଭାବେ କାର୍ଯ୍ୟ କରିସାରିଛନ୍ତି।
