ଭୁବନେଶ୍ୱର,୧୪।୬(ଅନୁରାଧା ମହାରଣା): ନ୍ୟାଶନାଲ ଟେଷ୍ଟିଂ ଏଜେନ୍ସି (ଏନ୍ଟିଏ) ପକ୍ଷରୁ ଜାତୀୟ ଯୋଗ୍ୟତା ଓ ପ୍ରବେଶିକା ପରୀକ୍ଷା (ନିଟ୍)-୨୦୨୩ ୟୁଜିର ଫଳାଫଳ ମଙ୍ଗଳବାର ପ୍ରକାଶ ପାଇଛି। ପ୍ରକାଶିତ ଫଳ ଅନୁସାରେ ତାମିଲନାଡ଼ୁର ପ୍ରଭଞ୍ଜନ ଜେ. ଏବଂ ଆନ୍ଧ୍ରପ୍ରଦେଶର ବୋରା ବରୁଣ ଚକ୍ରବର୍ତ୍ତୀ ୭୨୦ ନମ୍ବର ଲେଖାଏ ରଖି ସର୍ବଭାରତୀୟ ସ୍ତରରେ ଯୁଗ୍ମ ଭାବେ ଶ୍ରେଷ୍ଠ ସ୍ଥାନ ହାସଲ କରିଥିବାବେଳେ ଓଡ଼ିଶାର ସ୍ବୟଂଶକ୍ତି ତ୍ରିପାଠୀ ର଼୍ୟାଙ୍କ-୮ ସହ ରାଜ୍ୟରେ ପ୍ରଥମ ସ୍ଥାନରେ ରହିଛନ୍ତି।
ଚଳିତ ଥର ୨୦,୮୭, ୪୬୨ ଜଣ ଛାତ୍ରୀଛାତ୍ର ପଞ୍ଜୀକରଣ କରିଥିବାବେଳେ ୨୦, ୩୮, ୫୯୬ ଜଣ ପରୀକ୍ଷା ଦେଇଥିଲେ। ସେମାନଙ୍କ ମଧ୍ୟରୁ ୧୧, ୪୫,୯୭୬ ଜଣଙ୍କୁ ର଼୍ୟାଙ୍କ ମିଳିଛି। ଦେଶ ବାହାରର ୧୪ଟି ସହର ସମେତ ମୋଟ ୪୯୯ଟି ସହରର ୪୦୯୭ଟି ସେଣ୍ଟରରେ ଏହି ପରୀକ୍ଷା ହୋଇଥିଲା। ନିଟ୍ରେ ଚଳିତ ବର୍ଷ ୫୬.୨୧ ପ୍ରତିଶତ ବିଦ୍ୟାର୍ଥୀ କୃତକାର୍ଯ୍ୟ ହୋଇଛନ୍ତି। ନିଟ ୟୁଜିର କଟ୍ ଅଫ୍ ମାର୍କ ଚଳିତଥର ୭୨୦-୧୩୭ ପର୍ଯ୍ୟନ୍ତ ପହଞ୍ଚିଛି। ଉତ୍ତରପ୍ରଦେଶରୁ ସର୍ବାଧିକ ୧.୩୯ ଲକ୍ଷ, ମହାରାଷ୍ଟ୍ରରୁ ୧.୩୧ ଲକ୍ଷ ଓ ରାଜସ୍ଥାନରୁ ୧ ଲକ୍ଷରୁ ଅଧିକ ପିଲା ନିଟ୍-ୟୁଜି କ୍ୱାଲିଫାଏ କରିଛନ୍ତି। ଚଳିତବର୍ଷ ଓଡ଼ିଶାରୁ ୫୭୯୭ ଜଣ ପଞ୍ଜୀକରଣ କରିଥିବାବେଳେ ୫୭୧୫ ଜଣ ପରୀକ୍ଷା ଦେଇଥିଲେ। ସେମାନଙ୍କ ମଧ୍ୟରୁ ୩୧୪୦ ଜଣ ର଼୍ୟାଙ୍କ ପାଇଛନ୍ତି। ୧୩ଟି ଭାଷାରେ ଏହି ପରୀକ୍ଷା ଅନୁଷ୍ଠିତ ହୋଇଥିବାବେଳେ ଓଡ଼ିଆରେ ୯୮୮ ଜଣ ପରୀକ୍ଷାର୍ଥୀ ପରୀକ୍ଷା ଦେଇଥିଲେ। ଶ୍ରେଷ୍ଠ ୫୦ ଜଣଙ୍କ ମଧ୍ୟରେ ଓଡ଼ିଶାର ସୂର୍ଯ୍ୟପ୍ରତାପ ମିଶ୍ର ୩୫ତମ ସ୍ଥାନରେ ରହିଛନ୍ତି। ସେହିପରି ଶ୍ରେଷ୍ଠ ୨୦ ଜଣ ମହିଳା ପରୀକ୍ଷାର୍ଥୀଙ୍କ ମଧ୍ୟରେ ଓଡ଼ିଶାର ଅଭିପ୍ସା ଚୌଧୁରୀ ରହିଛନ୍ତି। ସେ ର଼୍ୟାଙ୍କ ୬୩ ପାଇଥିବାବେଳେ ୭୧୦ ମାର୍କ ରଖିପାରିଛନ୍ତି। ସ୍ବୟଂଶକ୍ତି ଏବଂ ସୂର୍ଯ୍ୟ ପ୍ରତାପ ସାଇ ଇଣ୍ଟର ନ୍ୟାଶନାଲ ସ୍କୁଲର ଛାତ୍ର ବୋଲି ସୂଚନା ମିଳିଛି।
