ବ୍ରହ୍ମପୁର,୨।୧୨(ସ୍ମୃତି ରଞ୍ଜନ ମହାଲିକ): ରାଜ୍ୟରେ ଆଳୁ ସଙ୍କଟ ଘନେଇବାରେ ଲାଗିଛି। ପଶ୍ଚିମବଙ୍ଗ ସରକାର କିଛି ଦିନ ବ୍ୟବଧାନ ପରେ ପୁଣି ଆଳୁ ରପ୍ତାନି ଉପରେ କଟକଣା ଲଗାଇଛନ୍ତି। ଏପଟେ ରାଜ୍ୟରେ ଗଚ୍ଛିତ ଆଳୁ ସରି ଆସୁଛି। ଏହାର ଫାଇଦା ନେଇ ମୁନାଫାଖୋର ବ୍ୟବସାୟୀମାନେ ମନଇଚ୍ଛା ଦର ବୃଦ୍ଧି କରି ଚାଲିଛନ୍ତି। ତେଣୁ ଆଳୁ ଅଭାବ ଓ
ଜରୁରୀକାଳୀନ ଘୋଷଣା କରି ମୁଖ୍ୟମନ୍ତ୍ରୀ ଏଥିରେ ହସ୍ତକ୍ଷେପ କରିବାକୁ ଓଡ଼ିଆ ସ୍ବାଭିମାନ ଜାଗରଣ ଫେଡେରେଶନ ପକ୍ଷରୁ ଦାବି କରାଯାଇଛି।
ଏ ନେଇ ଇ-ମେଲ ଜରିଆରେ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରାଯାଇଛି। ସେଥିରେ ଉଲ୍ଲେଖ କରାଯାଇଛି ଯେ, ଆଳୁ ସଙ୍କଟ ଉଭୟ ଗୃହିଣୀ ଓ ଗ୍ରାହକଙ୍କୁ ନାକେଦମ କଲାଣି। କିନ୍ତୁ ଯୋଗାଣ ମନ୍ତ୍ରୀଙ୍କ ନିବେଦନ ଓ ଆବେଦନର କୌଣସି ପ୍ରଭାବ ବ୍ୟବସାୟୀ ଏବଂ ବଜାର ଉପରେ ପଡୁନାହିଁ। ମନ୍ତ୍ରୀ ଆଳୁ ସଙ୍କଟଙ୍କୁ ଜରୁରୀକାଳୀନ ସ୍ଥିତି ମନେ କରି ଗମ୍ଭୀର ପଦକ୍ଷେପ ନେବା ବଦଳରେ ଖାମଖିଆଲି ଭାବେ ପଶ୍ଚିମବଙ୍ଗରୁ ଆଉ ଆଳୁ ଆଣିବୁ ନାହିଁ କହି ପରିସ୍ଥିତିକୁ ଜଟିଳ କରୁଛନ୍ତି।
ଉତ୍ତରପ୍ରଦେଶରୁ ରାଜ୍ୟକୁ ଆଳୁ ଆଣି ଆବଶ୍ୟକତା ମେଣ୍ଟେଇବାର ଯେଉଁ ଚିନ୍ତାଧାରା ଯୋଗାଣ ବିଭାଗ କରୁଛି ତାହା ସମୁଦ୍ରକୁ ଶଙ୍ଖେ ସଦୃଶ। ତେଣୁ ରାଜ୍ୟ ସରକାର ପଶ୍ଚିମବଙ୍ଗ ମୁଖ୍ୟମନ୍ତ୍ରୀଙ୍କ ସହ କଥାବାର୍ତ୍ତା କରି ଆଳୁ ଯୋଗାଣରେ ରହିଥିବା ଅସୁବିଧା କେମିତି ହଟିବ ସେ ଦିଗରେ ପ୍ରୟାସ କରିବାକୁ ଫେଡେରଶନ ଦାବି କରିଛି।
ଆଳୁ ଅଭାବ ସଙ୍କଟରୁ ମୁକୁଳିବା ପାଇଁ ଦୀର୍ଘକାଳୀନ ପଦକ୍ଷେପ ସ୍ବରୂପ ଆଳୁ ମିଶନକୁ ଦକ୍ଷତା ଓ ସଫଳତାର ସହ କାର୍ଯ୍ୟକାରୀ କରି ଆମ ରାଜ୍ୟ ଆଳୁ ଉତ୍ପାଦନରେ କିପରି ସ୍ବାବଲମ୍ବୀ ହୋଇପାରିବ ସରକାର ସେଥିପ୍ରତି ଧ୍ୟାନ ଦେବା, ଆଳୁ ଚାଷ ନିମନ୍ତେ ଉପଯୁକ୍ତ ଜମି ଓ ଜଳବାୟୁ ଅଞ୍ଚଳ ଚିହ୍ନଟ କରି ଚାଷୀଙ୍କୁ ଉପଯୁକ୍ତ ପ୍ରୋତ୍ସାହନ ଯୋଗାଇ ଯୋଗାଣ ବିଭାଗକୁ ବଜାରୀକରଣ ଦାୟିତ୍ୱ ଦେବା, ଆଳୁ ଚାଷୀଙ୍କୁ ଉପଯୁକ୍ତ ଗୁଣାତ୍ମକ ବିହନ, ସାର, କୀଟନାଶକ ଠିକ୍ ସମୟରେ ଯୋଗାଇ ଦେବା, ଆଳୁ ଚାଷ ହେଉଥିବା ଅଞ୍ଚଳରେ ପର୍ଯ୍ୟାପ୍ତ ଶୀତଳ ଭଣ୍ଡାର ସ୍ଥାପନ କରିବା ଓ ଯୋଗାଣ ବିଭାଗ ଉପରେ ସବୁ କିଛି ନ ଛାଡ଼ି ମୁଖ୍ୟମନ୍ତ୍ରୀ ଏଥିରେ ହସ୍ତକ୍ଷେପ କରିବା ପାଇଁ ଫେଡେରସନ ଆବାହକ ସଞ୍ଜୀବ କୁମାର ପଟ୍ଟନାୟକ ଦାବି ଉଲ୍ଲେଖ କରିଛନ୍ତି।
