ଭଦ୍ରକ ଅଫିସ,୧।୨: ଭଦ୍ରକ ଜିଲାରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଯେତେ ପାଖେଇ ଆସୁଛି, ରାଜନୈତିକ ହିଂସା କ୍ରମଶଃ ବୃଦ୍ଧି ପାଇବାରେ ଲାଗିଛି। ଏହି କ୍ରମରେ ଭଦ୍ରକ ବ୍ଲକ ବ୍ରହ୍ମପୁର ଗ୍ରାମରେ ଜଣେ ଯୁବକଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି। ମୃତକ ହେଲେ ଶୁଭାଶିଷ ଗିରି।
ଅଭିଯୋଗ ମୁତାବକ, ବ୍ରହ୍ମପୁର ପଞ୍ଚାୟତର ସରପଞ୍ଚ ପ୍ରାର୍ଥୀଙ୍କ ସହ ପୁଅ ସେନାପତି ଓ ଲିଟୁ ସେନାପତି ମିଶି ବ୍ରହ୍ମପୁର ବିଦ୍ୟାଳୟ ପଡିଆକୁ ଜବରଦଖଲ କରିବା ସହ କ୍ଲବ ଘରକୁ ମଧ୍ୟ ନିଜ ଅକ୍ତିଆରକୁ ନେବାକୁ ଉଦ୍ୟମ କରୁଥିଲେ। ଏହାକୁ ଶୁଭାଶିଷ ବିରୋଧ କରୁଥିଲେ। ସକାଳେ ଉକ୍ତ ମାମଲାକୁ ନେଇ ଉଭୟ ଶୁଭାଶିଷ ଓ ପୁଅଙ୍କ ମଧ୍ୟରେ ବଚସା ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ପୁଅ ଓ ତାଙ୍କ ସମର୍ଥକମାନେ ଶୁଭାଶିଷଙ୍କୁ ମାଡ଼ ମାରିବା ସହିତ ଟ୍ୟୁବ୍ଓ୍ବେଲ ହ୍ୟାଣ୍ଡଲରେ ମାଡମାରି ପୋଖରୀକୁ ଫିଙ୍ଗି ଦେଇଥିଲେ। ଫଳରେ ପୋଖରୀ ଭିତରେ ତାଙ୍କର ମୃତ୍ୟୁ ହୋଇଥିଲା।
ଘଟଣାକୁ ପ୍ରତିବାଦ କରି ମଙ୍ଗଳବାର ଭାଜପା ସମର୍ଥକମାନେ ଭଦ୍ରକ-ଚାନ୍ଦବାଲି ରାଜ୍ୟ ରାଜପଥର ଇଚ୍ଛାପୁର ଛକଠାରେ ମୃତଦେହ ରଖି ରାସ୍ତାରୋକୋ କରିଥିଲେ। ଏହାକୁ ନେଇ ଘଟଣା ସ୍ଥଳରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ପୋଲିସ ପହଞ୍ଚି ଅଭିଯୁକ୍ତମାନଙ୍କୁ ଗିରଫ କରିବାକୁ ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିବା ଜଣାପଡ଼ିଛି।