ହିଞ୍ଜିଳିକାଟୁ,୧୭।୧୦(ଦ୍ବିତୀକୃଷ୍ଣ ପଣ୍ଡା): ହିଞ୍ଜିଳିକାଟୁ ସ୍ୱୟଂଶାସିତ ବିଜ୍ଞାନ ମହାବିଦ୍ୟାଳୟର ଛାତ୍ର ସଂସଦ ନିର୍ବାଚନକୁ ନେଇ ସୃଷ୍ଟି ହୋଇଥିବା ଉତ୍ତେଜନା ଥମିବାର ନାଁ ନେଉନାହିଁ। କଲେଜ ପରିସରରେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଓ ଆକ୍ରମଣ ଘଟଣାକୁ ନେଇ ଶୁକ୍ରବାର ରାତିରୁ ଶନିବାର ସନ୍ଧ୍ୟା ପର୍ଯ୍ୟନ୍ତ ହିଞ୍ଜିଳି ଥାନା ପରିସରରେ ଭାଜପା ନେତା ଓ କର୍ମୀମାନେ ଧାରଣାରେ ବସିଥିଲେ। ଅଭିଯୁକ୍ତଙ୍କ ଗିରଫ ଦାବିରେ ଦୀର୍ଘ ସମୟ ଧରି ଚାଲିଥିବା ଏହି ଆନ୍ଦୋଳନ ପରେ ପୋଲିସ ଜିଲା ଯୁବ ବିଜେଡି ସମ୍ପାଦକ ଶିବାନୀ ପାତ୍ରଙ୍କୁ ଗିରଫ କରି କୋର୍ଟ ଚାଲାଣ କରିଛି।
ସୂଚନାନୁସାରେ, ଶୁକ୍ରବାର କଲେଜ ପରିସରରେ ଘଟିଥିବା ସଂଘର୍ଷରେ ହିଞ୍ଜିଳିକାଟୁ ନଗର ଯୁବମୋର୍ଚ୍ଚାର ସାଧାରଣ ସମ୍ପାଦକ ନାରାୟଣ ପାଢ଼ୀ ଓ ଜିଲା ଯୁବ ବିଜେଡି ସମ୍ପାଦକ ଶିବାନୀ ପାତ୍ର ଆହତ ହୋଇଥିଲେ। ଗୁରୁତର ଆହତ ନାରାୟଣଙ୍କୁ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଥିଲା। ଘଟଣା ପରେ ପୋଲିସ ଉଭୟ ଗୋଷ୍ଠୀର ୬ ଜଣଙ୍କୁ ଥାନାକୁ ନେଇ ପଚରାଉଚରା କରିବା ପରେ ଉଭୟ ପକ୍ଷର ଏତଲା ଆଧାରରେ ଦୁଇଟି ମାମଲା ରୁଜୁ କରି ଅଟକ ବ୍ୟକ୍ତିଙ୍କୁ ଛାଡ଼ି ଦେଇଥିଲା।
ଏହାକୁ ନେଇ ଭାଜପା ପକ୍ଷରୁ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ହିଞ୍ଜିଳି ବିଧାନସଭା ନିର୍ବାଚନମଣ୍ଡଳୀର ପୂର୍ବତନ ଭାଜପା ପ୍ରାର୍ଥୀ ଶିଶିର ମିଶ୍ରଙ୍କ ନେତୃତ୍ୱରେ ଦଳୀୟ ନେତା ଓ କର୍ମୀ ଥାନା ପରିସରରେ ଧାରଣା ଦେଇଥିଲେ। କଲେଜର ନବନିର୍ବାଚିତ ଏବିଭିପି ସମର୍ଥିତ ଛାତ୍ରୀ ସଭାପତିଙ୍କ ପ୍ରତି ଅଶାଳୀନ ବ୍ୟବହାର ଏବଂ ନାରାୟଣ ପାଢ଼ୀଙ୍କ ସମେତ ଅନ୍ୟମାନଙ୍କ ଉପରେ ଆକ୍ରମଣ ଘଟଣାରେ ସମ୍ପୃକ୍ତ ସମସ୍ତ ଅଭିଯୁକ୍ତଙ୍କୁ ଗିରଫ କରିବା ସହ ହତ୍ୟା ଉଦ୍ୟମ ଭଳି ସଙ୍ଗୀନ ଦଫା ଲଗାଇବାକୁ ସେମାନେ ଦାବି କରିଥିଲେ।
ଶନିବାର ସକାଳେ ଗଞ୍ଜାମ ଏସ୍ପି ହରିଶ ବିଶି ହିଞ୍ଜିଳି ଥାନାରେ ପହଞ୍ଚି ଧାରଣାରତ ଭାଜପା ନେତାଙ୍କ ସହ ଆଲୋଚନା କରିଥିଲେ। ପରେ ଅତିରିକ୍ତ ଏସ୍ପି, ଆସିକା ଏସ୍ଡିପିଓ ଓ ଅନ୍ୟ ପୋଲିସ ଅଧିକାରୀ ମଧ୍ୟ ଆଲୋଚନା କରିଥିଲେ। ତେବେ ଅଭିଯୁକ୍ତଙ୍କ ଗିରଫ ଦାବିରେ ଭାଜପା ନେତାମାନେ ଅଡ଼ି ବସିବା ସହ ରାତି ୮ଟା ସୁଦ୍ଧା ଥାନା ପରିସରରେ ଧାରଣା ଜାରି ରଖିଥିଲେ।
ଅନ୍ୟପକ୍ଷରେ, ଭାଜପା ନେତାମାନେ ଥାନାକୁ ଦଳୀୟ କାର୍ଯ୍ୟାଳୟ ଭଳି ବ୍ୟବହାର କରୁଥିବା ଅଭିଯୋଗ କରିଛନ୍ତି ବିଜେଡି ନେତା ଦେବାନନ୍ଦ ମହାପାତ୍ର। ଭାଜପା ସମର୍ଥିତ ଅଣଛାତ୍ରମାନେ କଲେଜ ପରିସରରେ ପଶି ବିଜୁ ଛାତ୍ର ଜନତା ଦଳ (ବିସିଜେଡି) ସମର୍ଥକଙ୍କୁ ଆକ୍ରମଣ କରିଥିବା ସେ ଅଭିଯୋଗ କରି ପୋଲିସ କୌଣସି ରାଜନୈତିକ ଚାପରେ ନ ପଡ଼ି ନିରପେକ୍ଷ ଭାବେ କାର୍ଯ୍ୟ କରିବାକୁ ଦାବି କରିଛନ୍ତି।
