ନୂଆଦିଲ୍ଲୀ,୨୦।୪: ଅତିକ ଅହମଦ ଓ ତାଙ୍କ ଭାଇ ଅଶରଫଙ୍କ ହତ୍ୟା ମାମଲା ଏବେ ସବୁଠି ଚର୍ଚ୍ଚାର ବିଷୟ ପାଲଟିଛି। ଏହି ମାମଲାରେ ପ୍ରତିଦିନ କିଛି ନା କିଛି ନୂଆ ମୋଡ ଆସୁଛି। ଗୁରୁବାର ଯାଞ୍ଚ କମିଟି ଅତିକ ହତ୍ୟା ମାମଲାର ସିନ୍ ରିକ୍ରିଏଟ କରିବ। ଏହାସହ ମାଫିଆ ଅତିକ ଓ ତାଙ୍କ ଭାଇଙ୍କ ହତ୍ୟା ସମୟରେ ଯେଉଁ ପୋଲିସ ଉପସ୍ଥିତ ଥିଲେ ସେମାନଙ୍କୁ ପଚରା ଉଚରା କରାଯିବ। ସୂଚନାଯୋଗ୍ୟ, ୧୫ ଏପ୍ରିଲରେ ଅତିକ ଓ ତାଙ୍କ ଭାଇଙ୍କୁ ପୋଲିସ କଷ୍ଟଡିରେ ଥିବା ସମୟରେ ହତ୍ୟା କରାଯାଇଥିଲା। ଆଉ ହତ୍ୟାକରୀ ସାଙ୍ଗେ ସାଙ୍ଗେ ସରେଣ୍ଡର କରି ଯାଇଥିଲେ। ହେଲେ ମର୍ଡର ମିଷ୍ଟ୍ରିରେ ଯାଞ୍ଚ କମିଟି ଗଠନ କରାଯାଇଛି। ଏହି ଦୁଇ ଭାଇଙ୍କୁ ସ୍ବାସ୍ଥ୍ୟ ଯାଞ୍ଚ ପାଇଁ ହସ୍ପିଟାଲ ନିଆଯାଉଥିବା ସମୟରେ ସେମାନଙ୍କୁ ହତ୍ୟା କରାଯାଇଥିଲା। ଏହି ହତ୍ୟାର କାରଣ ଓ ସମସ୍ତ ତଥ୍ୟ ଜାଣିବାକୁ ସରକାର ଯାଞ୍ଚ କମିଟି ଗଠନ କରିଛନ୍ତି। ଏଥିରେ ହାଇକୋର୍ଟର ପୂର୍ବତନ ଜଜଙ୍କୁ କମିଟିର ଅଧ୍ୟକ୍ଷ କରାଯାଇଛି। ଯାଞ୍ଚ କମିଟି ସାମ୍ନାରେ ଗୁରୁବାର ସେହି ଲୋକେଶନରେ ସିନ ରିକ୍ରିଏଟ କରାଯିବ। ଫଳରେ ହତ୍ୟାକାଣ୍ଡକୁ ନେଇ କିଛି ନୂଆ ତଥ୍ୟ ସାମ୍ନାକୁ ଆସିପାରେ।
