ଗଞ୍ଜାମ,୧୩।୯ (ଅଖିଳ ତରାଇ/ ବିଦ୍ୟାଧର ସାହୁ): ଗଜପତି ଜିଲାର ମୋହନାରୁ ଭୁବନେଶ୍ୱର ଅଭିମୁଖେ ଗଞ୍ଜେଇ ଚୋରା ଚାଲାଣ କରୁଥିବା ଏକ ସୁଜୁକି କାର (ନମ୍ବର: ଓଡି୦୭ଜେଡ ୭୩୯୯) ରମ୍ଭା ପୋଲିସ ଦ୍ୱାରା ଜବତ ହୋଇଛି। ଶୁକ୍ରବାର ରାତିରେ ନାଇଟ ପାଟ୍ରୋଲିଂ ବେଳେ ହୁମ୍ମା ହାଟ ପଡ଼ିଆ ନିକଟ ଓଭରବ୍ରିଜ ଠାରେ ଗାଡ଼ି ଯାଞ୍ଚ ସମୟରେ କାରଟି ଦ୍ରୁତ ଗତିରେ ଓଭରଟେକ କରି ପଳାଇବାକୁ ଚେଷ୍ଟା କରିଥିଲା। ରମ୍ଭା ପୋଲିସ ଆଇଆଇସି କୁମାର ମୁଦୁଲିଙ୍କ ନେତୃତ୍ୱରେ ଏକ ଟିମ ପିଛା କରି ରମ୍ଭା ଓଭରବ୍ରିଜ ନିକଟରେ କାରଟିକୁ ଅଟକାଇବାରେ ସଫଳ ହୋଇଥିଲେ। ଗାଡ଼ିରୁ ୨୨ କିଲୋ ୪୦୦ ଗ୍ରାମ ଗଞ୍ଜେଇ ଜବତ ହୋଇଛି, ଯାହାର ମୂଲ୍ୟ ୨ ଲକ୍ଷ ଟଙ୍କାରୁ ଅଧିକ ହେବ ବୋଲି ଅନୁମାନ କରାଯାଇଛି।
ଏହି ଘଟଣାରେ ଦୁଇ ଅଭିଯୁକ୍ତ ସନାତନ ଦଳାଇ (୩୫) ଏବଂ ଜିନୁ ଅଧିକାରୀ (୩୫), ଉଭୟ ମୋହନା ଅଞ୍ଚଳର ବାସିନ୍ଦାଙ୍କୁ ଗିରଫ କରାଯାଇଛି। ତହସିଲଦାର ସୁକାନ୍ତ ମିଶ୍ର ଘଟଣାସ୍ଥଳରେ ଉପସ୍ଥିତଥିଲେ। ପୋଲିସ ଏହି ଚୋରା ଚାଲାଣ ନେଟୱାର୍କ ବିଷୟରେ ଅଧିକ ତଦନ୍ତ ଜାରି ରଖିଛି।
ଏହି ସଫଳ ଅଭିଯାନ ଅଞ୍ଚଳରେ ଗଞ୍ଜେଇ ଚୋରା ଚାଲାଣ ବିରୋଧରେ ପୋଲିସର କଡ଼ା କାର୍ଯ୍ୟାନୁଷ୍ଠାନକୁ ସୂଚାଇଛି।
