ବଣାଇ,୧୫ା୯(ପ୍ରଦୀପ ତ୍ରିପାଠୀ): ଝାଡ଼ଖଣ୍ଡରେ ପୁଣି ଥରେ ସୁରକ୍ଷାବଳ ଏବଂ ନକ୍ସଲଙ୍କ ମଧ୍ୟରେ ଗୁଳିବିନିମୟ ହେବା ପରେ ଏନ୍କାଉଣ୍ଟରରେ ଜଣେ ନକ୍ସଲ ନିହତ ହୋଇଛି। ଝାଡ଼ଖଣ୍ଡ ପାଲାମୁ ଜିଲା ମାନାଟୁ ଥାନା ଅଞ୍ଚଳର ବାନ୍ସି ଗାଁ ଜଙ୍ଗଲରେ ମାଓବାଦୀ ସଂଗଠନର ଶତ୍ରୁପକ୍ଷ ବିବେଚିତ ନକ୍ସଲ ସଂଗଠନ ଟି.ଏସ୍.ପି.ସି (ତୃତୀୟ ସମ୍ମିଳନୀ ଉପସ୍ଥାପନା କମିଟି) ନକ୍ସଲ ଥିବା ନେଇ ଗୋଇନ୍ଦା ସୂତ୍ର ସୂଚନା କ୍ରମେ ଚଢାଉ କରାଯାଇଥିଲା। ସୁରକ୍ଷାବାହିନୀ ଓ ନକ୍ସଲଙ୍କ ମଧ୍ୟରେ ଗୁଳି ବିନିମୟ ପରେ ଏନ୍କାଉଣ୍ଟରରେ ୫ ଲକ୍ଷ ଟଙ୍କା ପୁରସ୍କାର ଘୋଷିତ ନକ୍ସଲ ମୁଖଦେବ ଯାଦବ @ ତୁଫାନ ନିହତ ହୋଇଛି। ପୋଲିସ ଘଟଣାସ୍ଥଳରୁ ଗୋଟିଏ ଇନ୍ସାସ ରାଇଫଲ ଜବତ କରିଛି ଓ ଅନ୍ୟ ନକ୍ସଲ ଛତ୍ରଭଙ୍ଗ ଦେଇଥିବାରୁ ସର୍ଚ୍ଚ ଅପରେଶନ ଜାରି ରହିଛି।
ନକ୍ସଲମାନଙ୍କ ଉପସ୍ଥିତି ବିଷୟରେ ଗୁପ୍ତ ସୂଚନା ପାଇବା ପରେ, ଏସ୍ପି ରିଶ୍ମା ରାମେଶନ, ସହାୟକ ଏସ୍ପି ରାକେଶ କୁମାର ସିଂହ ଏବଂ ହୁସେନାବାଦ ଏସ୍ଡିପିଓ ମହମ୍ମଦ ୟାକୁବଙ୍କ ନେତୃତ୍ୱରେ ଏକ ସ୍ବତନ୍ତ୍ର ଅଭିଯାନ ଆରମ୍ଭ କରାଯାଇଥିଲା। ସୁରକ୍ଷା ବାହିନୀ ତାରହାସି ଏବଂ ମାନାଟୁ ଥାନା ଅଞ୍ଚଳର ସୀମାନ୍ତ ଜଙ୍ଗଲରେ ନକ୍ସଲମାନଙ୍କୁ ଘେରିବାକୁ ଚେଷ୍ଟା କରିଥିଲେ, ଯାହା ପରେ ଉଭୟ ପକ୍ଷରୁ ଗୁଳିଚାଳନା ହୋଇଥିଲା। ଏହି ଏନକାଉଣ୍ଟରରେ ଟି.ଏସ୍.ପି.ସିର ସକ୍ରିୟ ନକ୍ସଲ ନେତା ମୁଖଦେବ ଯାଦବ @ ତୁଫାନ ନିହତ ହୋଇଛନ୍ତି।
ଉଲ୍ଲେଖନୀୟ ଯେ, ଚାଇବାସା ଜିଲାର ଗୋଇଲକେରା ଥାନା ଅଞ୍ଚଳରେ ଦୁଇ ସପ୍ତାହ ତଳେ ଏକ ଏନ୍କାଉଣ୍ଟରରେ ସିପିଆଇ ମାଓବାଦୀ ଜୋନାଲ କମାଣ୍ଡର ଅମିତ ହାଁସଦା ଓରଫ ଉପ୍ତାନ, ଯାହାଙ୍କ ଉପରେ ୧୦ ଲକ୍ଷ ଟଙ୍କାର ପୁରସ୍କାର ଘୋଷଣା ରାଶି ରହିଥିଲା ପୋଲିସ କାର୍ଯ୍ୟାନୁଷ୍ଠାନରେ ନିହତ ହୋଇଥିଲେ। ସେହି ସମୟରେ ମଧ୍ୟ ସୁରକ୍ଷାବାହିନୀ ସେହି ଅଞ୍ଚଳରେ ସର୍ଚ୍ଚ ଅପରେଶନ ଚଳାଇ ବହୁ ଅସ୍ତ୍ରଶସ୍ତ୍ର ଏବଂ ନକ୍ସଲ ବ୍ୟବହାର ସମାଗ୍ରୀ ଜବତ କରିଥିଲେ। ସେହିପରି, ଗଢ଼ଓ୍ବା ଏବଂ ଲାତେହାର ଜଙ୍ଗଲରେ, ଚଳିତ ବର୍ଷ ପୋଲିସ ଏବଂ ନକ୍ସଲ ମଧ୍ୟରେ ଅନେକ ଥର ଗୁଳିବିନିମୟ ହୋଇଛି। ଯେଉଁଥିରେ ଅନେକ ନକ୍ସଲ ନିହତ ହେଲେଣି ଏବଂ କିଛିଙ୍କୁ ଗିରଫ ମଧ୍ୟ କରାଯାଇଛି।
ଏହି ଟିଏସ୍ପିସି ନକ୍ସଲ ସଂଗଠନ ସମାନ୍ତରାଳ ଭାବେ ମାଓବାଦୀ ସଂଗଠନ ଓ ସେମାନଙ୍କ ମଧ୍ୟରେ ଶତ୍ରୁତା ରହିଛି l
