ଦାରିଙ୍ଗବାଡି, ୧୩।୯ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ଥାନା କିରିକୁଟି ପଞ୍ଚାୟତ ର ପୂର୍ବତନ ସରପଞ୍ଚ ତ୍ରିଲୋଚନ ପ୍ରଧାନ ଓରଫ ଟିଟୁ ଙ୍କୁ ଗତ ରବିବାର ବିଳମ୍ବିତ ରାତିରେ ମରଣାନ୍ତକ ଆକ୍ରମଣ ଘଟଣାରେ ପୋଲିସ ଜଣଙ୍କୁ ବାନ୍ଧିଛି। ସେ ହେଲେ କ. ନୂଆଗାଁ ଥାନା ଯୁଆଙ୍ଗିଆ ଗ୍ରାମର ପିଣ୍ଟୁ ମଳିକ ବୋଲି ତଦନ୍ତକାରୀ ଅଧିକାରୀ ଲଷ୍ମୀ ମାଝୀ କହିଛନ୍ତି। ପିଣ୍ଟୁ ହେଉଛନ୍ତି ପୂର୍ବତନ ସରପଞ୍ଚ ତ୍ରିଲୋଚନଙ୍କ ଭାଣିଜୀ ଜ୍ୱାଇଁ। ସେ ଜମିବାଡ଼ିକୁ କେନ୍ଦ୍ର କରି ହତ୍ୟା ଉଦ୍ୟମ କରିଥିବା ପୋଲିସ ତଦନ୍ତରୁ ଜାଣିପାରିଥିବା କହିଛି। ଏବେ ପର୍ଯ୍ୟନ୍ତ ଏହି ହତ୍ୟା ଉଦ୍ୟମରେ ଅନ୍ୟ ସହଯୋଗୀ ଫେରାର ରହିଛନ୍ତି। ତାଙ୍କୁ ଶୀଘ୍ର ଗିରଫ କରାଯିବ ବୋଲି ପୋଲିସ କହିଛି। ଘଟଣା ସମ୍ପର୍କରେ ପୋଲିସ ଏତଲା ଗ୍ରହଣ କରିି ମାମଲା (୧୮୩/୨୫) ରୁଜୁ କରିଥିଲା ଓ ତଦନ୍ତ ଚଳାଇଥିଲା। ସେହିପରି ହତ୍ୟା ଉଦ୍ୟମର ଶିକାର ହୋଇଥିବା ପୂର୍ବତନ ସରପଞ୍ଚ ତ୍ରିଲୋଚନ ଏମକେସିଜି ରେ ଚିକିତ୍ସିତ ହେଉଥିଲେ। ସେ ସୁସ୍ଥ ହୋଇ ଶୁକ୍ରବାର ସନ୍ଧ୍ୟାରେ ଫେରିଛନ୍ତି। ତେବେ ସେ ସିମନବାଡି ଅଞ୍ଚଳରେ ତାଙ୍କ ଦୂର ସମ୍ପର୍କୀୟଙ୍କ ଘରେ ଆଶ୍ରୟ ନେଇଛନ୍ତି ପୋଲିସ ତାଙ୍କ ବୟାନ ରେକର୍ଡ କରିବାକୁ ସନ୍ଧ୍ୟାରେ ପହଞ୍ଚିଥିଲେ। ତେବେ ସେ ବିଶ୍ରାମ ନେଇଥିବାରୁ ପୋଲିସ ଶନିବାର ତ୍ରିଲୋଚନଙ୍କ ବୟାନ ରେକର୍ଡ କରିବ ଏବଂ ତଦନ୍ତ ପ୍ରକ୍ରିୟାରେ ତ୍ରିଲୋଚନଙ୍କ ବୟାନ ଗୁରୁତ୍ୱ ବହନ କରିବ ବୋଲି ଜଣାପଡିଛି।
