ଭବାନୀପାଟଣା,୧୭ା୧୨(ଉତ୍ତମ କୁମାର ଦାଶ): କଳାହାଣ୍ଡି ଜୁନାଗଡ଼ ପୋଲିସ ଏକ ଡକାୟତି ମାମଲାରେ ୩ ଜଣଙ୍କୁ ଗିରଫ କରି ବୁଧବାର ଅପରାହ୍ନରେ କୋର୍ଟ ଚାଲାଣ କରିଛି। ଗିରଫ ହୋଇଥିବା ଅଭିଯୁକ୍ତମାନେ ହେଲେ ଜୁନାଗଡ଼ ଥାନା ଅନର୍ଗତ ଅନ୍ତର୍ଲା ଗ୍ରାମର କାହ୍ନୁ ବରିହା (୩୩), ପୋରାଗାଁର ଦେବେନ୍ଦ୍ର ସାହୁ (୩୮) ଓ ଗୋଲାମୁଣ୍ଡାର ବସନ୍ତ ଚଳାନ (୩୬) ବୋଲି ଜଣାପଡ଼ିଛି।
ମିଳିଥିବା ସୂଚନାନୁଯାୟୀ, ଜୁନାଗଡ଼ ସହର କଲମପୁର ଛକ ନିକଟିସ୍ଥ ଏନ୍ଏନ୍ ୨୬ରେ ସୋମବାର ରାତିରେ ଗୋଟିଏ ପିକ୍ଅପ୍ ଖରାପ ହୋଇ ଅଟକିଥିଲା। ଏହି ସମୟରେ ଉପରୋକ୍ତ ୨ ଅଭିଯୁକ୍ତ କାହ୍ନୁ ଓ ଦେବେନ୍ଦ୍ର ଏକ ଗାଡ଼ିରେ ଆସି ପିକ୍ଅପରେ ବସିଥିବା ଯୁବକକୁ ମାଡ଼ ମାରି ବନ୍ଧୁକ ଦେଖାଇ ଭୟଭୀତ କରିଥିଲେ। ଏହାସହ ତାଙ୍କ ପାଖରେ ଥିବା ସାଢ଼େ ୩ ହଜାର ଟଙ୍କା ଡକାୟତି କରି ନେଇ ପଳାଇଥିଲେ। ତେବେ ଗାଡ଼ିରେ ଥିବା କର୍ମଚାରୀ ଏ ନେଇ ଜୁନାଗଡ଼ ପୋଲିସକୁ ଖବର ଦେଇଥିଲେ । ଏହାପରେ ଜୁନାଗଡ଼ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ସେଠାରୁ କିଛି ଦୂରରୁ ୨ ଡକାୟତକୁ କାବୁ କରିଥିଲା। ପୋଲିସ ଦୁଇ ଜଣଙ୍କଠାରୁ ଗୋଟିଏ ଆପାଚି ବାଇକ ନଂ (ଓ ୦୮-ଆର ୯୫୩୬)ଓ ଗୋଟିଏ ଇଂଲଣ୍ଡ ତିଆରି ରିଭଲଭର (ବନ୍ଧୁକ), ନଗଦ ୨୬ଶହ ଟଙ୍କା ସମେତ ଦୁଇଟି ଅଫୁଟା ଗୁଳି ଓ ଗୋଟିଏ ଖୋକା ଜବତ କରିଥିଲା। ଅଭିଯୁକ୍ତ ଦେବେନ୍ଦ୍ର ଗତ ବର୍ଷକ ତଳେ ଗୋଲାମୁଣ୍ଡା ଅଞ୍ଚଳର ବସନ୍ତ ଚାଲନ ସଂସ୍ପର୍ଶରେ ଆସି ୪୦ ହଜାର ଟଙ୍କା ଦେଇ ରିଭଲଭର ଓ ଗୁଳି କିଣିଥିଲେ। ତେଣୁ ବେଆଇନ ରିଭଲଭର ବିକ୍ରି କରିଥିବା ଅଭିଯୋଗରେ ପୋଲିସ ଗୋଳାମୁଣ୍ଡାର ବସନ୍ତଙ୍କୁ ମଧ୍ୟ ଗିରଫ କରିଥିଲା।
ସେହିପରି ଅଭିଯୁକ୍ତ କାହ୍ନୁଙ୍କ ନାମରେ ପୂର୍ବରୁ ମଧ୍ୟ ଅନେକ ମାମଲା ରହିଥିବା ପୋଲିସଠାରୁ ଜଣାପଡ଼ଛି। ଏନେଇ ଜୁନାଗଡ଼ ଥାନାରେ ଏକ ମାମଲା ନଂ(୭୭୧/୨୫) ରୁଜୁ ହୋଇଥିବା ଜୁନାଗଡ଼ ଆଇଆଇସି ଶେଷଦେବ ବେହେରା ସୂଚନା ଦେଇଛନ୍ତି।
