କଟକ,୮୧(କାର୍ତ୍ତିକ ସାହୁ): କେତେଜଣ ପୋଲିସ ଅଧିକାରୀ ଯଥେଷ୍ଟ କାରଣ ନ ଥାଇ ଅଥବା ନିଜ ସ୍ବାର୍ଥ ସାଧନ ପାଇଁ ସାଧାରଣ ଲୋକଙ୍କୁ ହଇରାଣ କରୁଛନ୍ତି। ଏପରିକି ଗିରଫ କରିବାର ଭୟ ମଧ୍ୟ ଦେଖାଉଛନ୍ତି। ଏଭଳି ଏକ ମାମଲାର ଶୁଣାଣି କରି ହାଇକୋର୍ଟ ରାଜ୍ୟ ପୋଲିସ ମହାନିର୍ଦ୍ଦେଶକ (ଡିଜିପି) ଓ ଗୃହ ବିଭାଗର ସଚିବଙ୍କୁ ଜରୁରୀ ପଦକ୍ଷେପ ନେବାକୁ ଆଦେଶ ଦେଇଛନ୍ତି। ଭଦ୍ରକ ଜିଲା ଭଣ୍ଡାରୀପୋଖରୀ ଥାନା ପୋଲିସ ଜଣେ ବିଧବା ମହିଳାଙ୍କୁ ଉଦ୍ଦେଶ୍ୟମୂଳକ ଭାବେ ହଇରାଣ କରୁଥିବା ନେଇ ରୁଜୁ ମାମଲାରେ ହାଇକୋର୍ଟର ବିଚାରପତି ଆଦିତ୍ୟ କୁମାର ମହାପାତ୍ର ଘଟଣାକୁ ଗୁରୁତ୍ୱର ସହ ଯାଞ୍ଚ କରିବାକୁ ଆଦେଶ ଦେଇଛନ୍ତି।
ମାମଲାର ବିବରଣୀ ଅନୁଯାୟୀ, ଭଣ୍ଡାରୀପୋଖରୀ ଥାନା ପୋଲିସର ଗିରଫଦାରିରୁ ବର୍ତ୍ତିବା ପାଇଁ ବିଧବା ମହିଳା ଚନ୍ଦ୍ରିକା ନାୟକ ଓରଫ ଜେନା ହାଇକୋର୍ଟରେ ଆଗୁଆ ଜାମିନ ଆବେଦନ କରିଥିଲେ। ଉକ୍ତ ଥାନାର ପୋଲିସ ଅଧିକାରୀଗଣ ଏକ ଜମି ବିବାଦ ଘଟଣାରେ ତାଙ୍କୁ ଉଦ୍ଦେଶ୍ୟମୂଳକ ହଇରାଣ କରୁଛନ୍ତି। ସମ୍ପୃକ୍ତ ଜଣେ ପୋଲିସ ଅଧିକାରୀ କିଣିବାକୁ ଚାହୁଁଥିବା ଜମିଟିର ଅଂଶୀଦାର ଥିବାରୁ ପୋଲିସ ନିଜ ସ୍ବାର୍ଥ ସାଧନ ପାଇଁ ଆବେଦନକାରୀ ମହିଳାଙ୍କୁ ଥାନାକୁ ଡାକି ଧମକଚମକ ଦେବା ସହ ବିଭିନ୍ନ ଭାବରେ ହଇରାଣ କରୁଥିଲେ। ମହିଳା ଜଣକ ନିଜ ପିଲାଙ୍କ ପାଠପଢ଼ା ପାଇଁ ଜଣକଠାରୁ ୪୦ ହଜାର ଟଙ୍କା ନେଇଥିଲେ। ଉକ୍ତ ଟଙ୍କା ଫେରାଇ ଦେବାକୁ ସେ ରାଜିଥିବା ଓ ଏହାର ଆପୋଷ ସମାଧାନ ଚାହୁଁଥିବା ବେଳେ ପୋଲିସ କିଛି ଶୁଣି ନ ଥିଲା। ଏପରିକି ସମ୍ପୃକ୍ତ ଥାନାରେ ଏନେଇ କୌଣସି ଏତଲା ରୁଜୁ ହୋଇ ନ ଥିବା ବେଳେ ପୋଲିସ ଦେଉଥିବା ମାନସିକ ନିର୍ଯାତନା ଦ୍ୱାରା ମହିଳାଙ୍କୁ ଗିରଫଦାରି ଭୟ ଘାରିଥିଲା। ଫଳରେ ସେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ।
