ଶ୍ରୀନଗର,୩୧ା୫: ଜମ୍ମୁ କଶ୍ମୀରର ବାରାମୁଲ୍ଲା ଜିଲ୍ଲାର ଉରି ସେକ୍ଟରରେ ନିୟନ୍ତ୍ରଣ ରେଖା ପାର କରି ଭାରତରେ ପ୍ରବେଶ କରିବାକୁ ଚେଷ୍ଟା କରୁଥିବା ଜଣେ ପାକିସ୍ତାନୀ ଅନୁପ୍ରବେଶକାରୀଙ୍କୁ ଭାରତୀୟ ସେନା ଗିରଫ କରିଛି। ସେ ତାଙ୍କ ପ୍ରେମିକାଙ୍କୁ ଭେଟିବାକୁ ସୀମା ପାର୍ କରିଥିବା ଜଣାପଡିଛି । ଗିରଫ ଯୁବକଙ୍କୁ ପାକ୍ ଅଧିକୃତ କାଶ୍ମୀରର ମୁଜାଫରାବାଦର ବାସିନ୍ଦା ଲାଲ ମିରଙ୍କ ପୁଅ ଜୀଶାନ ମୀର ଭାବରେ ଚିହ୍ନଟ କରାଯାଇଛି । ଚିନାର କର୍ପସ ‘X’ ରେ ଏ ସମ୍ପର୍କରେ ଏକ ବିବୃତ୍ତି ଜାରି କରିଛି, ଯେଉଁଥିରେ ସେମାନେ କହିଛନ୍ତି ଯେ ଉରି ସେକ୍ଟରରେ ନିୟନ୍ତ୍ରଣ ରେଖା ପାର କରିବାକୁ ଚେଷ୍ଟା କରୁଥିବା ସମୟରେ ଜୀଶାନଙ୍କୁ ସତର୍କ ‘ଚିନାର ସେନାମାନେ ଅଟକାଇଥିଲେ।
ଏଥିରେ କୁହାଯାଇଛି, “ସତର୍କ ସୈନିକମାନେ ସଂଯମତା ବଜାୟ ରଖି ଅନୁପ୍ରବେଶକାରୀଙ୍କୁ ଚ୍ୟାଲେଞ୍ଜ କରିଥିଲେ ଏବଂ ବ୍ୟକ୍ତିଙ୍କୁ କାବୁ କରିଥିଲେ । ପରବର୍ତ୍ତୀ ସମୟରେ, ଅନୁପ୍ରବେଶକାରୀଙ୍କୁ ଅଧିକ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଜମ୍ମୁ କଶ୍ମୀର ପୋଲିସକୁ ହସ୍ତାନ୍ତର କରାଯାଇଥିଲା।” ମୁଜାଫରାବାଦର ବାସିନ୍ଦା ଜୀଶାନ ମୀର ଦାବି କରିଛନ୍ତି ଯେ ସେ ଉରିର ତିଲାଇରେ ରହୁଥିବା ତାଙ୍କ ପ୍ରେମିକାଙ୍କୁ ଭେଟିବା ପାଇଁ ନିୟନ୍ତ୍ରଣ ରେଖା ପାର କରିଥିଲେ। ଅଧିକାରୀମାନେ ରିପୋର୍ଟ କରିଛନ୍ତି ଯେ ମୀର ଏବଂ ଝିଅ ଉଭୟଙ୍କୁ ବର୍ତ୍ତମାନ ସୁରକ୍ଷା ବାହିନୀ ଦ୍ୱାରା ପଚରାଉଚରା କରାଯାଉଛି। ଏହି ସମୟରେ, ଏକ ପୃଥକ ଘଟଣାରେ, ସୁରକ୍ଷା ବାହିନୀ କହିଛନ୍ତି ଯେ ବାରାମୁଲ୍ଲା ଜିଲା ସୋପୋରର ବାସିନ୍ଦା ଦୁଇଜଣ ବ୍ୟକ୍ତି – ଅନୁପ୍ରବେଶ କରିବାକୁ ଚେଷ୍ଟା କରୁଥିବା ସମୟରେ ଉରି ସେକ୍ଟରରେ ଗିରଫ ହୋଇଥିଲେ ।
