ନୂଆଦିଲ୍ଲୀ/ଓ୍ବାଶିଂଟନ୍,୩୦।୯: ଗାଜାରେ ଦୀର୍ଘ ସମୟ ଧରି ଚାଲିଥିବା ଯୁଦ୍ଧ ଖୁବ ଶୀଘ୍ର ଶେଷ ହୋଇପାରେ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏଥିପାଇଁ ଏକ ସ୍ବତନ୍ତ୍ର ଯୋଜନା ପ୍ରସ୍ତୁତ କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର (ସେପ୍ଟେମ୍ବର ୩୦) ଟ୍ରମ୍ପଙ୍କ ଯୋଜନାକୁ ସ୍ବାଗତ କରିଛନ୍ତି। ସେ ସହମତ ହୋଇଛନ୍ତି ଏବଂ ଏହା ମଧ୍ୟ କହିଛନ୍ତି ଯେ ଅନ୍ୟ ଦେଶମାନେ ମଧ୍ୟ ଏହି ପ୍ରସଙ୍ଗରେ ଟ୍ରମ୍ପଙ୍କ ସହ ସହମତ ହେବେ, ଯାହା ଦ୍ୱାରା ହମାସ ଏବଂ ଇସ୍ରାଏଲ ମଧ୍ୟରେ ଚାଲିଥିବା ଯୁଦ୍ଧର ଅନ୍ତ ହୋଇପାରିବ।
ପ୍ରଧାନମନ୍ତ୍ରୀ ମୋଦି X-ପୋଷ୍ଟ ମାଧ୍ୟମରେ କହିଛନ୍ତି, ଆମେ ଗାଜା ସଂଘର୍ଷ ସମାପ୍ତ କରିବା ପାଇଁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଯୋଜନାକୁ ସ୍ବାଗତ କରୁଛୁ। ଏହି ଯୋଜନା ପାଲେଷ୍ଟାଇନ ଏବଂ ଇସ୍ରାଏଲୀ ଲୋକଙ୍କ ପାଇଁ ଏବଂ ସମଗ୍ର ପଶ୍ଚିମ ଏସିଆ କ୍ଷେତ୍ର ପାଇଁ ଦୀର୍ଘକାଳୀନ ଶାନ୍ତି, ସୁରକ୍ଷା ଏବଂ ବିକାଶର ଏକ ଭଲ ପଥ ଦେଖାଏ। ଆମେ ଆଶା କରୁଛୁ ଯେ ସମସ୍ତ ସମ୍ପୃକ୍ତ ପକ୍ଷ ସଂଘର୍ଷ ସମାପ୍ତ କରିବା ଏବଂ ଶାନ୍ତି ପ୍ରତିଷ୍ଠା କରିବା ପାଇଁ ଟ୍ରମ୍ପଙ୍କ ପଦକ୍ଷେପକୁ ସମର୍ଥନ କରିବେ।
ଗାଜାରେ ସଂଘର୍ଷ ସମାପ୍ତ କରିବା ପାଇଁ ଆମେରିକା ରାଷ୍ଟ୍ରପତି ଟ୍ରମ୍ପ ୨୦ ପଏଣ୍ଟ ବିଶିଷ୍ଟ ଯୋଜନା ପ୍ରସ୍ତୁତ କରିଛନ୍ତି। ଏହି ଯୋଜନାକୁ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଏବଂ ମୁସଲିମ ଦେଶମାନଙ୍କର ସମର୍ଥନ ମିଳିଛି। ଇଜିପ୍ଟ ଏବଂ କତାର ଏବେ ହମାସକୁ ଏହି ପ୍ରସ୍ତାବ ଦେଇଛନ୍ତି। ହମାସ କହିଛି ଯେ କୌଣସି ପ୍ରତିକ୍ରିୟା ଦେବା ପୂର୍ବରୁ ଏହା ଗମ୍ଭୀରତାର ସହ ବିଚାର କରିବ।
ଆମେରିକା ରାଷ୍ଟ୍ରପତି ୟୁଏନଜିଏ ବୈଠକ ଅବସରରେ ଆରବ ଏବଂ ମୁସଲିମ ଦେଶମାନଙ୍କ ସହିତ ଏକ ବୈଠକ କରିଥିଲେ। ଏହି ବୈଠକ ସମୟରେ ଟ୍ରମ୍ପ ଗାଜା ଷ୍ଟ୍ରିପରେ ଯୁଦ୍ଧବିରତି ପାଇଁ ତାଙ୍କର ପ୍ରସ୍ତାବ ଉପସ୍ଥାପନ କରିଥିଲେ। ତା’ପରେ ଆମେରିକା ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ସହ ତାଙ୍କର ଯୋଜନା ଶେୟାର କରିଥିଲା। ପ୍ରଧାନମନ୍ତ୍ରୀ ନେତାନ୍ୟାହୁ ମଧ୍ୟ ଟ୍ରମ୍ପଙ୍କ ଯୋଜନାକୁ ସମର୍ଥନ କରିଥିଲେ।
