ନୂଆଦିଲ୍ଲୀ,୨୨।୪: କେରଳ ଭାରତୀୟ ଜନତା ପାର୍ଟି(ଭାଜପା)ର ଅଧ୍ୟକ୍ଷ ସୁରେନ୍ଦ୍ର ଦାବି କରିଛନ୍ତି କି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ମରଣାନ୍ତକ ଆକ୍ରମଣ ହୋଇପାରେ ବୋଲି ଏକ ଧମକପୂର୍ଣ୍ଣ ପତ୍ର ମିଳିଛି। ପ୍ରଧାନମନ୍ତ୍ରୀଙ୍କ ଦୁଇ ଦିନିଆ କେରଳ ଗସ୍ତ କାର୍ଯ୍ୟକ୍ରମ ସମୟରେ ତାଙ୍କ ଉପରେ ଆକ୍ରମଣ ହେବାର ଧମକ ଦିଆଯାଇଛି। ମୋଦିଙ୍କ ଦୁଇ ଦିନିଆ କେରଳ ଗସ୍ତ ୨୪ ଏପ୍ରିଲ ଅର୍ଥାତ୍ ସୋମବାରଠାରୁ ଆରମ୍ଭ ହେଉଛି। ମୋଦିଙ୍କ କେରଳ ଗସ୍ତ ସମୟରେ ସେ ସର୍ବ ପ୍ରଥମେ କେରଳର ପ୍ରଥମ ବନ୍ଦେ ଭାରତ ଏକ୍ସପ୍ରେସ ଟ୍ରେନକୁ ସବୁଜ ପତାକା ଦେଖାଇବାର କାର୍ଯ୍ୟକ୍ରମ ରହିଛି। ଏହାସହ କୋଚି ଓ୍ବାଟର ମେଟ୍ରୋର ଉଦଘାଟନ କରିବେ। ଧମକପୂର୍ଣ୍ଣ ପତ୍ର ମିଳିବା ପରେ ସାରା ରାଜ୍ୟରେ ହାଇ ଆଲର୍ଟ ଜାରି କରାଯାଇଛି। ଏହାସହ ସୁରକ୍ଷା ଏଜେନ୍ସି ବି ସତର୍କ ହୋଇଯାଇଛନ୍ତି।
କେ ସୁରେନ୍ଦ୍ର ସୂଚନା ଦେଇଛନ୍ତି କି, କୋଚିର ଜଣେ ବ୍ୟକ୍ତିଙ୍କ ପକ୍ଷରୁ ମଲାୟାଲମ ଭାଷାରେ ଏହି ଧମକପୂର୍ଣ୍ଣ ପତ୍ର ଲେଖାଯାଇଛି, ଯାହାକୁ ଗୋଟିଏ ସପ୍ତାହ ପୂର୍ବରୁ କେରଳର ଭାଜପା କାର୍ଯ୍ୟାଳୟକୁ ପଠାଯାଇଥିଲା। ସେ କହିଛନ୍ତି, ଧମକପୂର୍ଣ୍ଣ ପତ୍ର ରାଜ୍ୟର ପୋଲିସ ମହାନିର୍ଦ୍ଦେଶକଙ୍କୁ ଦିଆଯାଇଛି। ମିଡିଆ ରିପୋର୍ଟ ଅନୁଯାୟୀ, ଉକ୍ତ ପତ୍ରରେ କୋଚିର ବାସିନ୍ଦା ଏକେ ଜନିଙ୍କ ଠିକଣା ପ୍ରେରକ ଭାବେ ଲେଖାଯାଇଛି। ପତ୍ର ମାଧ୍ୟମରେ ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କୁ ବି ହତ୍ୟା ଧମକ ଦିଆଯାଇଥିଲା। ସମ୍ବନ୍ଧିତ ବ୍ୟକ୍ତିଙ୍କୁ ଏ ସମ୍ପର୍କରେ ଜାଣିବା ପାଇଁ ଅଧିକାରୀମାନେ ସମ୍ପର୍କ କରିବାରୁ ସେ ଏହାକୁ ଖଣ୍ଡନ କରିବା ସହ କହିଛନ୍ତି କେହି ବ୍ୟକ୍ତି ହୁଏତ ତାଙ୍କ ନାମ ବ୍ୟବହାର କରି ଏହି ପତ୍ର ଲେଖିଥାଇପାରନ୍ତି।
