କାଠମାଣ୍ଡୁ,୨୭।୮: ନେପାଳରେ ବନ୍ୟା ଯୋଗୁ ଏପର୍ଯ୍ୟନ୍ତ ୧୬୦ ଜଣଙ୍କ ମୃତ୍ୟୁ ହୋଇସାରିଛି ଏବଂ ୭୦୦ରୁ ଅଧିକ ଲୋକ ନିଖୋଜ ଅଛନ୍ତି। ଏହି କଠିନ ସମୟରେ ଭାରତ ନେପାଳ ଆଡ଼କୁ ସହାୟତାର ହାତ ବଢ଼ାଇଛି ଏବଂ ରିଲିଫ ସାମଗ୍ରୀ ପଠାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଏହି ବିପର୍ଯ୍ୟୟକୁ ନେଇ ଦୁଃଖ ପ୍ରକାଶ କରିଛନ୍ତି। ଅନ୍ୟପଟେ, ନେପାଳର ପ୍ରଧାନମନ୍ତ୍ରୀ ଭାରତର ସହାୟତା ପାଇଁ ପ୍ରଧାନମନ୍ତ୍ରୀ ମୋଦିଙ୍କୁ ଧନ୍ୟବାଦ ଜଣାଇଛନ୍ତି। ନେପାଳକୁ ସହାୟତା କରିଥିବାରୁ ସେ ଭାରତର ପ୍ରଶଂସା ମଧ୍ୟ କରିଛନ୍ତି।
ନେପାଳର ପ୍ରଧାନମନ୍ତ୍ରୀ ବାଲେନ ଶାହା ବୁଧବାର ବନ୍ୟା ପ୍ରଭାବିତ ଦେଶରେ ଉଦ୍ଧାର ଓ ରିଲିଫ କାର୍ଯ୍ୟ ପାଇଁ ସମସ୍ତ ପ୍ରକାରର ମାନବୀୟ ସହାୟତା ଦେବାର ପ୍ରସ୍ତାବ ଏବଂ ଏକତା ପ୍ରକାଶ କରିଥିବାରୁ ପ୍ରଧାନମନ୍ତ୍ରୀ ମୋଦିଙ୍କୁ କୃତଜ୍ଞତା ଜଣାଇଛନ୍ତି। ପିଏମ ମୋଦି ତାଙ୍କ ସହ ଫୋନ ଯୋଗେ କଥା ହୋଇଥିଲେ। ବାଲେନ ଶାହା ସୋସିଆଲ ମିଡିଆରେ ଏକ ପୋଷ୍ଟ କରି ଲେଖିଛନ୍ତି, ଏହି କଠିନ ସମୟରେ ନେପାଳ ପ୍ରତି ଏକତା ପ୍ରକାଶ କରିଥିବା ଆପଣଙ୍କ ଆତ୍ମୀୟ କଥା ଏବଂ ସହାୟତାର ଉଦାର ପ୍ରସ୍ତାବକୁ ଆମେ ହୃଦୟରୁ ପ୍ରଶଂସା କରୁଛୁ।
ବାଲେନ ଶାହା କହିଛନ୍ତି ଯେ, ସହଯୋଗର ଏହି ଭାବନା ଭାରତ ଓ ନେପାଳ ମଧ୍ୟରେ ଥିବା ଦୃଢ଼ ବନ୍ଧୁତ୍ୱର ସମ୍ପର୍କକୁ ପ୍ରତିଫଳିତ କରେ। ଏହି ସମ୍ପର୍କକୁ ଆମେ ବହୁତ ଗୁରୁତ୍ୱ ଦେଉଛୁ।
ଏହା ପୂର୍ବରୁ ସୋସିଆଲ ମିଡିଆରେ ଏକ ପୋଷ୍ଟ କରି ପିଏମ ମୋଦି କହିଥିଲେ ଯେ, ସେ ବାଲେନ ଶାହାଙ୍କ ସହ କଥା ହୋଇଛନ୍ତି ଏବଂ ନେପାଳରେ ବନ୍ୟା ଯୋଗୁ ହୋଇଥିବା ମୃତ୍ୟୁକୁ ନେଇ ଦୁଃଖ ପ୍ରକାଶ କରିଛନ୍ତି। ସେ ଏହା ମଧ୍ୟ କହିଥିଲେ ଯେ, ଭାରତ ନେପାଳକୁ ସମସ୍ତ ପ୍ରକାରର ମାନବୀୟ ସହାୟତା ଦେବାକୁ ପ୍ରସ୍ତୁତ ଅଛି ଏବଂ ଭାରତୀୟ ଟିମ ଗୁଡ଼ିକ ଉଦ୍ଧାର ଓ ରିଲିଫ କାର୍ଯ୍ୟରେ ମିଳିତ ଭାବେ କାମ କରୁଛନ୍ତି।
