ନୂଆଦିଲ୍ଲୀ,୧୮।୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭିଡିଓ କନଫରେନ୍ସିଂ ମାଧ୍ୟମରେ ଉତ୍ତରପ୍ରଦେଶର ବସ୍ତି ଜିଲାରେ ଦ୍ୱିତୀୟ ପର୍ଯ୍ୟାୟ ସାଂସଦ ଖେଳ ମହାକୁମ୍ଭ ୨୦୨୨-୨୩ର ଉଦଘାଟନ କରିଛନ୍ତି। ଏହି ଅବସରରେ ରାଜ୍ୟ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ଉପସ୍ଥିତ ଥିଲେ।
ସାଧାରଣ ସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ, ବସ୍ତି ହେଉଛି ମହର୍ଷି ବଶିଷ୍ଠଙ୍କ ପବିତ୍ର ଭୂମି। ଶ୍ରମ ଏବଂ ସାଧନା, ତପ ଏବଂ ବଳିଦାନ ଭୂମି। ଜଣେ ଖେଳାଳି ପାଇଁ ତାଙ୍କର ଖେଳ ମଧ୍ୟ ଏକ ସାଧନା ଏବଂ ତପ ଯେଉଁଥିରେ ସେ ନିଜକୁ ପରୀକ୍ଷା କରନ୍ତି। ଜଣେ ସଫଳ ଖେଳାଳିଙ୍କ ଧ୍ୟାନ ମଧ୍ୟ ସଠିକ ହେଲେ ହିଁ ସେ ସଫଳତା ହାସଲ କରନ୍ତି।
ସୂଚନାଯୋଗ୍ୟ,ଖେଲୋ ଇଣ୍ଡିଆ ଅଭିଯାନ ଅଧୀନରେ ସରକାର ଖେଳାଳିଙ୍କୁ ଆର୍ଥିକ ସହାୟତା ଦେଉଛନ୍ତି। ଖେଲୋ ଇଣ୍ଡିଆ ଅଭିଯାନ ଅଧୀନରେ ପ୍ରତି ମାସରେ ୨୫୦୦ରୁ ଅଧିକ ଆଥଲେଟଙ୍କୁ ୫୦,୦୦୦ରୁ ଅଧିକ ଟଙ୍କା ଦିଆଯାଉଛି। ଅଲିମ୍ପିକ୍ସକୁ ଯାଉଥିବା ପ୍ରାୟ ୫୦୦ ଖେଳାଳି ‘ଟପ୍ସ’ରୁ ସାହାଯ୍ୟ ପାଉଛନ୍ତି।
ଭାରତର ପ୍ରାୟ ୨୦୦ ଏମ୍ପି ସାଂସଦ କ୍ରୀଡା ପ୍ରତିଯୋଗିତା ଆୟୋଜନ କରିଛନ୍ତି, ଯେଉଁଥିରେ ହଜାର ହଜାର ଯୁବକ ଅଂଶଗ୍ରହଣ କରିଛନ୍ତି। ଯେଉଁମାନେ ସାଂସଦ ଖେଳ ମହାକୁମ୍ବରେ ଭଲ ପ୍ରଦର୍ଶନ କରନ୍ତି ସେମାନେ ଭାରତର କ୍ରୀଡ଼ା ପ୍ରାଧିକରଣର ତାଲିମ କେନ୍ଦ୍ରରେ ଅଧିକ ତାଲିମ ପାଇଁ ମନୋନୀତ ହେଉଛନ୍ତି।
