ବାରିପଦା ଅଫିସ,୭ା୧୧:ମୟୂରଭଞ୍ଜ ଜିଲା ବାରିପଦାସ୍ଥିତ ପଣ୍ଡିତ ରଘୁନାଥ ମୁର୍ମୁ ମେଡିକାଲେ କଲେଜ ଓ ହସ୍ପିଟାଲ(ପିଆର୍ଏମ୍) ଚକ୍ଷୁ ବିଭାଗ ଛାତରୁ ରବିବାର ପ୍ଲାଷ୍ଟର ଖସିଛି। ସେଠାରେ ଚିକିତ୍ସାଧିନ ରୋଗୀ ଏହି ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଥିବା ବେଳେ ମେଡିକାଲ କର୍ତ୍ତୃପକ୍ଷ ସେମାନଙ୍କୁ ଅନ୍ୟ ଏକ ଗୃହକୁ ସ୍ଥାନାନ୍ତର କରିଛନ୍ତି। ଏନେଇ ରୋଗୀ ସମ୍ପର୍କୀୟଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଜିଲାବାସୀଙ୍କୁ ଉନ୍ନତମାନର ସ୍ବାସ୍ଥ୍ୟସେବା ଯୋଗାଇବା ଲକ୍ଷ୍ୟ ନେଇ ବାରିପଦାରେ ପିଆର୍ଏମ୍ ମେଡିକାଲ କଲେଜ ସ୍ଥାପନ କରାଯାଇଛି। ପୁରୁଣା କୋଠାର ରକ୍ଷଣାବେକ୍ଷଣ ଅଭାବରୁ ବାରମ୍ବାର ଛାତରୁ ପ୍ଲାଷ୍ଟର ଖସୁଛି। ମୋରଡ଼ା ବ୍ଲକ ଜାମଶୋଳ ଗ୍ରାମର ସୁବାସ ମହାନ୍ତଙ୍କ ପୁଅ ରାଜଦୀପଙ୍କ ଚକ୍ଷୁ ଚିକିତ୍ସା ନିମନ୍ତେ ଶନିବାର ଏହି ଡାକ୍ତରଖାନାରେ ଭର୍ତ୍ତି ହୋଇଥିଲେ। ତେବେ ରବିବାର ଅପରାହ୍ନରେ ଚିକିତ୍ସାଧିନ ପୁଅକୁ ନେଇ ଶୌଚ ହେବାକୁ ଯିବା ସମୟରେ ଛାତରୁ ପ୍ଲାଷ୍ଟର, କଂକ୍ରିଟ ସହ ସିଲିଂ ଖସି ପଡ଼ିଥିଲା ା
ଏଥିରେ ବାପପୁଅଙ୍କ କୌଣସି କ୍ଷତି ହୋଇ ନ ଥିବା ବେଳେ ବଡ଼ ଧରଣର ଅଘଟଣରୁ ଉଭୟେ ବର୍ତ୍ତି ଯାଇଥିଲେ। ସେହିପରି ନିକଟରେ ଥିବା ନର୍ସଙ୍କ କ୍ୟାବିନରେ କୌଣସି କର୍ମଚାରୀ ନ ଥିବାରୁ ସେମାନେ ମଧ୍ୟ ବିପଦରୁ ରକ୍ଷା ପାଇଥିଲେ।
ପୂର୍ବରୁ ପିଆର୍ଏମ୍ ମେଡିକାଲରେ ପ୍ଲାଷ୍ଟର ଖସି ରୋଗୀଙ୍କ ମୃତ୍ୟୁ ହେବା ନଜିର ରହିଥିଲେ ମଧ୍ୟ ପ୍ରଶାସନ ପକ୍ଷରୁ ଏଥିପ୍ରତି ଧ୍ୟାନ ଦିଆଯାଉନାହିଁ। ଏ ନେଇ ଭଞ୍ଜସେନାର ପ୍ରତିଷ୍ଠାତା କଳିଙ୍ଗ କେଶରୀ ଜେନା କୁହନ୍ତି, ଉପଯୁକ୍ତ ସ୍ବାସ୍ଥ୍ୟ ସେବା ଯୋଗାଇ ଦେବାରେ ସରକାର ଫେଲ୍ ମାରିଛନ୍ତି। ସାଧାରଣ ରୋଗୀଙ୍କୁ କଟକ ସ୍ଥାନାନ୍ତର କରାଯାଉଛି। ବ୍ୟବସ୍ଥାରେ ସୁଧାର ନ ଆସିଲେ ଆନ୍ଦୋଳନ ହେବ ବୋଲିି ସେ ଚେତାବନୀ ଦେଇଛନ୍ତି। ଏ ସମ୍ପର୍କରେ ହସ୍ପିଟାଲ ମ୍ୟାନେଜର ମିସ ବିନୋଦିନୀଙ୍କୁ ପଚାରିବାରୁ ପ୍ଲାଷ୍ଟର ଖସିବା ନେଇ ତାଙ୍କ ନିକଟରେ କୌଣସି ଖବର ନାହିଁ ା ତେବେ ଚକ୍ଷୁ ବିଭାଗକୁ ଯାଇ ଏହାର ତଦନ୍ତ କରି ଉପଯୁକ୍ତ ପଦକ୍ଷେପ ଗ୍ରହଣ କରିବେ ବୋଲି ସେ କହିଛନ୍ତି।
