ଇସଲାମବାଦ,୨୧।୭: ଅର୍ଥସଙ୍କଟରେ ଯୁଝୁଥିବା ପାକିସ୍ତାନ ଉପରେ ଗୋଟିଏ ପରେ ଗୋଟିଏ ସମସ୍ୟାର ସମ୍ମୁଖୀନ ହେଉଛି। ପାକିସ୍ତାନର ପେଟ୍ରୋଲିୟମ ଡିଲରମାନେ ପ୍ରଧାନମନ୍ତ୍ରୀ ଶେହବାଜ ସରିଫଙ୍କ ନେତୃତ୍ୱାଧୀନ ସରକାରଙ୍କ ଉପରେ ଅସନ୍ତୁଷ୍ଟ ଥିବା ଜଣାପଡିଛି। ଏନେଇ ସେମାନେ ଶନିବାର ଠାରୁ ଦେଶବ୍ୟାପୀ ଧର୍ମଘଟ କରିବାକୁ ଧମକ ଦେଇଛନ୍ତି। ପାକିସ୍ତାନୀ ପେଟ୍ରୋଲିୟମ ଡିଲର ଆସୋସିଏସନ (ପିପିଡିଏ)ର ଅଧ୍ୟକ୍ଷ ସାମିହୁଲ୍ଲା ଖାନ ସାମ୍ବାଦିକ ସମ୍ମିଳନୀ କରି ଦୁଇଟି ପ୍ରମୁଖ ପେଟ୍ରୋଲିୟମ ଉତ୍ପାଦ ବିକ୍ରିରେ ଲାଭ ହାରକୁ ପାଞ୍ଚ ପ୍ରତିଶତକୁ ବୃଦ୍ଧି କରିବାରେ ସରକାରଙ୍କ ଅସମର୍ଥତାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି।
ରିପୋର୍ଟରେ ଦର୍ଶାଯାଇଛି ଯେ, ବର୍ତ୍ତମାନ ପେଟ୍ରୋଲିୟମ ଡିଲରଙ୍କ ପାଇଁ ମାର୍ଜିନ ଲିଟର ପିଛା ୬ ଟଙ୍କା (୨.୪ ପ୍ରତିଶତ) ଧାର୍ଯ୍ୟ କରାଯାଇଛି। ଯଦି ୫ ପ୍ରତିଶତ ମାର୍ଜିନ ସ୍ଥିର ହୁଏ ତେବେ ଏହା ଲିଟର ପିଛା ୧୨ଟଙ୍କାରୁ ଅଧିକ ହେବ। ପେଟ୍ରୋଲ ଏବଂ ଡିଜେଲର ବର୍ତ୍ତମାନର ମୂଲ୍ୟ ଲିଟର ପିଛା ଯଥାକ୍ରମେ ୨୫୩ ଟଙ୍କା ଏବଂ ୨୫୩.୫୦ ଟଙ୍କା ରହିଛି।
