ନୂଆଦିଲ୍ଲୀ,୧୫ା୧୧: ନିକଟରେ କେନ୍ଦ୍ର ସରକାର ପେଟ୍ରୋଲ ଉପରୁ ୫ ଟଙ୍କା ଏବଂ ଡିଜେଲ ଉପରୁ ୧୦ ଟଙ୍କାର ଉତ୍ପାଦ ଟିକସ ହ୍ରାସ କରିଛନ୍ତି। ଏହା ପରେ ରାଜ୍ୟ ସରକାରଗୁଡିକ ମଧ୍ୟ କିଛି ପରିମାଣରେ ଭାଟ୍ ହ୍ରାସ କରିଛନ୍ତି। ଏହି ଘଟଣା ପରଠାରୁ ପେଟ୍ରୋଲ ଏବଂ ଡିଜେଲ ଦର ବର୍ତ୍ତମାନ ଅପରିବର୍ତ୍ତିତ ରହିଛି। ପୂର୍ବରୁ ଲଗାତାର ତେଲ ଦର ବୃଦ୍ଧି ଯୋଗୁ ଖାଉଟି ଅତିଷ୍ଠ ହୋଇପଡ଼ିଥିଲେ। ବର୍ତ୍ତମାନ ଦର ବୃଦ୍ଧି ହୋଇ ନ ଥିବାରୁ ଗତ କିଛିଦିନ ହେବ ଖାଉଟିଙ୍କୁ ଆଶ୍ୱସ୍ତି ମିଳିଛି। ଲଗାତାର ପ୍ରାୟ ୧୦ ଦିନ ହେବ ତେଲ ଦରରେ କୌଣସି ପରିବର୍ତ୍ତନ ହୋଇନାହିଁ। ରବିବାର ମଧ୍ୟ ତେଲ ଦରରେ କୌଣସି ପରିବର୍ତ୍ତନ ଦେଖାଯାଇନାହିଁ। ରାଜ୍ୟ ସ୍ତରରେ ଭାଟ୍ ଲାଗୁ ହେବା ଯୋଗୁ ଦେଶର ବିଭିନ୍ନ ପ୍ରାନ୍ତରେ ତେଲ ଦର ଭିନ୍ନ ରହୁଛି। ଗତ ମାସରେ ଅଶୋଧିତ ତେଲ ଦର ୩ ମାସର ରେକର୍ଡ ସ୍ତର ୮୫ ଡଲାର ଛୁଇଁଥିଲା। ଏହା ବର୍ତ୍ତମାନ ବ୍ୟାରେଲ ପିଛା ୮୨ ଡଲାର ରହିଛି। ଏଭଳି ସ୍ଥିତିରେ ଅନ୍ତର୍ଜାତୀୟ ବଜାରରେ ଦର ସ୍ଥିର ରହିଥିବାରୁ ଏହାର ପ୍ରଭାବ ଘରୋଇ ବଜାର ଉପରେ ପଡୁନାହିଁ ବୋଲି ବଜାର ବିଶେଷଜ୍ଞ କହିଛନ୍ତି।
