ନୂଆଦିଲ୍ଲୀ,୩।୮: ଇଲେକ୍ଟ୍ରୋନିକ୍ ଭୋଟିଂ ମେସିନ(ଇଭିଏମ)ର ବିଶ୍ୱସନୀୟତା ଉପରେ ପ୍ରଶ୍ନ ଉଠାଇଥିବା ଆବେଦନକୁ ଦିଲ୍ଲୀ ହାଇକୋର୍ଟ ଖାରଜ କରିଦେଇଛନ୍ତି। ଏହାକୁ ପ୍ରତ୍ୟାଖ୍ୟାନ କରି ଦିଲ୍ଲୀ ହାଇକୋର୍ଟ କହିଛନ୍ତି, ଏହି ଆବେଦନକୁ ପ୍ରଚାର ପାଇଁ ଦାଖଲ କରାଯାଇଥିଲା। ଏଥିପାଇଁ ଆବେଦନକାରୀଙ୍କ ଉପରେ ୧୦ହଜାର ଟଙ୍କା ଜରିମାନା ଲଗାଇଛନ୍ତି କୋର୍ଟ। ଆବେଦନକାରୀମାନେ ଇଭିଏମ ଉପରେ ପ୍ରଶ୍ନ ଉଠାଇଛନ୍ତି ସତ କିନ୍ତୁ ଇଭିଏମ ବିଷୟରେ ସେମାନଙ୍କ ପାଖରେ କୌଣସି ନିର୍ଦ୍ଧିଷ୍ଟ ସୂଚନା ନାହିଁ ବୋଲି କୋର୍ଟ ମନ୍ତବ୍ୟ ଦେଇଛନ୍ତି। ସୂଚନାଯୋଗ୍ୟ, ଆଗାମୀ ନିର୍ବାଚନରେ ଇଭିଏମ୍ ବଦଳରେ ବାଲାଟ ପେପର କରିବା ଆବେଦନ ଉପରେ ମଙ୍ଗଳବାର ଦିଲ୍ଲୀ ହାଇକୋର୍ଟ ଶୁଣାଣି କରିଛନ୍ତି। ଏହି ସମୟରେ ଆବେଦନକାରୀ କହିଛନ୍ତି ଯେ, ବିଶ୍ୱର ଅନେକ ଦେଶରେ ଇଭିଏମ ବଦଳରେ ପୁଣି ଥରେ ବାଲାଟ ପେପର ଜରିଆରେ ନିର୍ବାଚନ କରାଯାଉଛି। ଯେଉଁ ଦେଶ ପ୍ରଥମେ ଇଭିଏମ ଆରମ୍ଭ କରିଥିଲା ସେହି ଦେଶ ପୁଣିଥରେ ବାଲାଟ ପେପରକୁ ଫେରିଛି। ଆମ ଦେଶର ଅନେକ ଦଳର ରାଜନେତା ମଧ୍ୟ ଇଭିଏମ୍ ଉପରେ ବିଶ୍ୱାସ କରନ୍ତି ନାହିଁ। କେବଳ କେନ୍ଦ୍ରୀୟ ନିର୍ବାଚନ ଆୟୋଗର ଇଭିଏମ ଉପରେ ବିଶ୍ୱାସ ରହିଛି ବୋଲି ଆବେଦନକାରୀ କହିଛନ୍ତି। ଅନ୍ୟପଟେ ଶୁଣାଣି ସମୟରେ କୋର୍ଟ ଆବେଦନକାରୀଙ୍କୁ ପ୍ରଶ୍ନ କରିଥିଲେ ଯେ, ସେ କେଉଁ ଆଧାରରେ ଇଭିଏମ୍ରେ ତ୍ରୁଟି ରହିଛି ବୋଲି କହୁଛନ୍ତି। ଏହାର ଉତ୍ତରରେ ଆବେଦନକାରୀ କହିଥିଲେ, ଜର୍ମାନୀର ସୁପ୍ରିମକୋର୍ଟ ମଧ୍ୟ ଇଭିଏମ ବ୍ୟବହାରକୁ ଅସାମ୍ବିଧାନିକ ଘୋଷଣା କରିଛନ୍ତି।
