ରାଇକିଆ,୧୫ା୩(ପ୍ରଦୀପ ବେହେରା/ଚିନ୍ମୟ ସେଠୀ): କନ୍ଧମାଳ ଜିଲା ରାଇକିଆ, ଜି.ଉଦୟଗିରି ଓ ପାବୁରିଆ ଅଞ୍ଚଳରେ ଦନ୍ତାହାତୀକୁ ନେଇ ଭୟର ବାତାବରଣ ଦେଖାଦେଇଛି। ହାତୀ ଆକ୍ରମଣରେ ୩ ଜଣଙ୍କ ମୃତ୍ୟୁ ପରେ ଲୋକେ ଘରୁ ପଦାକୁ ବାହାରି ପାରୁନାହାନ୍ତି। ପ୍ରତିଦିନ ଜଙ୍ଗଲକୁ ଯାଇ ଜୀବିକା ନିର୍ବାହ କରୁଥିବା ସ୍ଥାନୀୟ ବାସିନ୍ଦାଙ୍କ ଚିନ୍ତା ବଢ଼ାଇଛି ଏହି ଦନ୍ତାହାତୀ। ବର୍ତ୍ତମାନ ହଳଦୀ, ମହୁଲ ଉତ୍ପାଦନର ସମୟ ହୋଇଥିବା ବେଳେ ଜଙ୍ଗଲ ଉପରେ ଅଧିକାଂଶ ଲୋକେ ନିର୍ଭରଶୀଳ ଅଟନ୍ତି। ପୂର୍ବରୁ ବନ ବିଭାଗ ତତ୍ପରତା ନ ଦେଖାଇବା ଏବଂ ଜଙ୍ଗଲରେ ହଠାତ୍ ୧୨ ଘଣ୍ଟା ମଧ୍ୟରେ ଦୁଇ ଦୁଇଟି ଦନ୍ତାହାତୀ ଆକ୍ରମଣରେ ମୃତ୍ୟୁ ଘଟଣା ଲୋକଙ୍କୁ ଆତଙ୍କିତ କରିଛି ରାସ୍ତାଘାଟ ମଧ୍ୟ ଜନଶୂନ୍ୟ ରହିଛି। ସକାଳ ପୂର୍ବରୁ ଓ ସନ୍ଧ୍ୟା ପରେ ଜଙ୍ଗଲକୁ ନ ଯିବା ପାଇଁ ବନ ବିଭାଗ ତରଫରୁ ନିର୍ଦ୍ଦେଶନାମା ଜାରି କରାଯାଇଥିଲେ ମଧ୍ୟ ହାତୀ ଘଉଡ଼ାଇବା ପାଇଁ ତୁରନ୍ତ ପଦକ୍ଷେପ ନେବା ଆବଶ୍ୟକ ବୋଲି ଅଞ୍ଚଳବାସୀ ଦାବି କରିଛନ୍ତି।
