କରାଚୀ,୨୬ା୧୧: ଚାମ୍ପିୟନ୍ସ ଟ୍ରଫି-୨୦୨୫ ଆୟୋଜନ ଅଧିକାର ଚୁକ୍ତିନାମାରେ ସ୍ବାକ୍ଷର କରିବା ଲାଗି ପାକିସ୍ତାନ କ୍ରିକେଟ ବୋର୍ଡ (ପିସିବି) ଆଗ୍ରହ ପ୍ରକାଶ କରିଛି । ଏହି ପରିପ୍ରେକ୍ଷୀରେ ଭାରତ ସୁରକ୍ଷାଜନିତ କାରଣ ଦର୍ଶାଇ ପାକିସ୍ତାନ ଗସ୍ତ କରିବା ଲାଗି ରାଜି ନ ହୁଏ ଏଥିଲାଗି କ୍ଷତିପୂରଣ ଦାବି କରିବ ବୋଲି ପିସିବି ପ୍ରକାଶ କରିଛି।
ଚାମ୍ପିୟନ୍ସ ଟ୍ରଫି ଆୟୋଜନ ଅଧିକାର ପାକିସ୍ତାନକୁ ଦେବା ଲାଗି ଆଇସିସି ଏକ ପ୍ରକାର ସ୍ଥିର କରିଛି। ହେଲେ ବିଶ୍ୱ ପରିଚାଳନା ପରିଷଦ ଏବଂ ପିସିବି ମଧ୍ୟରେ ଏପର୍ଯ୍ୟନ୍ତ କୌଣସି ଚୁକ୍ତି ସ୍ବାକ୍ଷର ହୋଇନାହିଁ। ଭାରତରେ ଦିନିକିଆ ବିଶ୍ୱକପ୍ ବେଳେ ଅହମଦାବାଦଠାରେ ଆଇସିସି କାର୍ଯ୍ୟନିର୍ବାହୀ ବୋର୍ଡ ସହ ପିସିବି ଚେୟାରମ୍ୟାନ ଜାକା ଅଶ୍ରଫ ଓ ସିଓଓ ସଲମନ ନାସିରଙ୍କ ମଧ୍ୟରେ ପାକିସ୍ତାନରେ ୨୦୨୫ ଫେବୃୟାରୀ-ମାର୍ଚ୍ଚରେ ଚାମ୍ପିୟନ୍ସ ଟ୍ରଫି ଆୟୋଜନ ସଂକ୍ରାନ୍ତ ଆଲୋଚନା ହୋଇଥିଲା।
ତେବେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଭାରତୀୟ ଦଳକୁ ପାକିସ୍ତାନ ପଠାଇ ନ ପାରେ ବୋଲି ଆଲୋଚନା ବେଳେ ପାକିସ୍ତାନ ଅଫିସିଆଲମାନେ ଆଶଙ୍କା ପ୍ରକାଶ କରିଥିଲେ। ପିସିବି ଅଫିସିଆଲ କହିଛନ୍ତି, ଗତ ଦୁଇ ବର୍ଷ ହେଲା ଏକାଧିକ ଟିମ୍ ପାକିସ୍ତାନ ଗସ୍ତରେ ଆସିଛନ୍ତି। ସେମାନେ ସୁରକ୍ଷାଜନିତ କୌଣସି ସମସ୍ୟାରେ ପଡ଼ିନାହାନ୍ତି। ଭାରତ ଯଦି ପାକିସ୍ତାନ ଖେଳିବାକୁ ନ ଆସେ, ମ୍ୟାଚଗୁଡ଼ିକ ଅନ୍ୟ ଦେଶରେ ଖେଳିବା ଲାଗି କୁହେ ତେବେ ଆଇସିସିକୁ କ୍ଷତି ଭରଣା କରିବାକୁ ପଡ଼ିବ ବୋଲି ପିସିବି ଅଫିସିଆଲ ଆଇସିସି ବୋର୍ଡକୁ କହିଛି।
