ମୁମ୍ବାଇ, ୨୯ା୬: ଓଏନ୍ଜିସିର ସାଗର କିରନ୍ ଅଏଲ୍-ରିଗ୍ ନିକଟରେ ମଙ୍ଗଳବାର ପୂର୍ବାହ୍ନରେ ଆରବ ସାଗରରେ ପବନ ହଂସ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ୪ ଜଣଙ୍କ ମୃତ୍ୟୁ ଘଟିଥିବାବେଳେ ଅଉ ୫ ଜଣ ଆହତ ହୋଇଛନ୍ତି। ମୃତକଙ୍କ ମଧ୍ୟରେ ଓଏନ୍ଜିସିର ୩ ଜଣ କର୍ମଚାରୀ ରହିଛନ୍ତି। ପବନ ହଂସର ନୂଆ ସିକୋର୍ସ୍କାଏ ଚପ୍ପର ଏସ୍-୭୬ଡି’ରେ ୨ ପାଇଲଟ୍ଙ୍କ ସମେତ ୭ ଜଣ ଯାତ୍ରୀ ଥିଲେ। ଓଏନ୍ଜିସି ପକ୍ଷରୁ ଦିଆଯାଇଥିବା ସୂଚନା ଅନୁସାରେ, ପୂର୍ବାହ୍ନ ପ୍ରାୟ ୧୧ଟା ୪୫ରେ ହେଲିକପ୍ଟରଟି ଆରବ ସାଗରରେ ଜରୁରୀ ଅବତରଣ କରିଥିଲା। କମ୍ପାନୀ ପକ୍ଷରୁ ଭାରତୀୟ ନୌସେନା ଏବଂ ଉପକୂଳ ଜଗୁଆଳିଙ୍କୁ ଏ ନେଇ ସୂଚନା ଦିଆଯିବା ପରେ ସର୍ଚ୍ଚ ଓ ଉଦ୍ଧାର କରାଯାଇଥିଲା। ଅପରାହ୍ନ ୨ ଟା ସୁଦ୍ଧା ସମସ୍ତ ୯ ଜଣଙ୍କୁ ରେସ୍କ୍ୟୁ ପରେ ମୁମ୍ବାଇ ହସ୍ପିଟାଲକୁ ନିଆଯାଇଥିଲା। ସେଠାରେ ଡାକ୍ତର ୪ ଜଣଙ୍କୁ ମୃତ ଘୋଷଣା କରିଥିଲେ। ଚପ୍ପରଟି କାହିଁକି ସମୁଦ୍ରରେ ଜରୁରିକାଳୀନ ଅବତରଣ କଲା ତାହା ଜଣାପଡ଼ିନାହିଁ। ଦୁର୍ଘଟଣାର ତଦନ୍ତ ଆରମ୍ଭ ହୋଇଥିବା ତୈଳ କମ୍ପାନୀ ଓଏନ୍ଜିସି କହିଛି।
