ଦିଗପହଣ୍ଡି,୨୯।୩(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ଅଧିନ ଏକ ଗାଁରୁ ଆକସ୍ମିକ ଭାବେ ନିଖୋଜ ହୋଇଯାଇଥିବା ଜଣେ ୧୭ ବର୍ଷୀୟା ନାବାଳିକାଙ୍କୁ ଉଦ୍ଧାର କଲା ପୋଲିସ । ଅଭିଯୋଗର ୧୨ ଘଣ୍ଟା ମଧ୍ୟରେ ପାଟପୁର ପୋଲିସ ରବିବାର ସକାଳେ ଶେରଗଡ ବସଷ୍ଟାଣ୍ଡରୁ ଉଦ୍ଧାର କରିଛି। ଶନିବାର ରାତିରେ ନାବାଳିକାଙ୍କ ବାପା ପାଟପୁର ଥାନାରେ ପହଞ୍ଚି ତାଙ୍କ ନାବାଳିକା ଝିଅଙ୍କ ନିଖୋଜ ନେଇ ଏତଲା ଦେଇଥିଲେ।
ଆଇଆଇସି ଦୀପ୍ତି ରଞ୍ଜନ ବେହେରା ଥାନା ମାମଲା ନଂ.୭୮/୨୬ ଅନୁଯାୟୀ ମକଦ୍ଦମା ପଞ୍ଜୀକୃତ କରି ଥାନାର ବରିଷ୍ଠ ଏସ.ଆଇ ଶ୍ରୀନିବାସ ଦାସଙ୍କୁ ତଦନ୍ତଭାର ଦେଇଥିଲେ। ସ୍ଵତନ୍ତ୍ର ପୋଲିସ ସ୍କ୍ବାର୍ଡ ରାତିରେ ବିଭିନ୍ନ ଛକରେ ନାକାବନ୍ଦୀ କରି ରାସ୍ତାରେ ଚଳାଚଳ କରୁଥିବା ଗାଡ଼ି ମୋଟର ଖାନ ତଲାସି କରିଥିଲେ । ପରେ ବିଭିନ୍ନ ସନ୍ଦିଗ୍ଧ ଅଞ୍ଚଳରେ ଚଢାଉ କରିଥିଲେ ମଧ୍ୟ ନାବାଳିକାଙ୍କ ସନ୍ଧାନ ମିଳିନଥିଲା।
ରବିବାର ସକାଳେ ପୋଲିସ ପକ୍ଷରୁ ନିୟୋଜିତ ଜଣେ ଖବରିଙ୍କ ସୂଚନା ପ୍ରକାରେ ତଦନ୍ତକାରୀ ଅଧିକାରୀ ସଦଳବଳେ ଶେରଗଡ଼ ବସଷ୍ଟାଣ୍ଡରେ ପହଞ୍ଚି ନାବାଳିକାଙ୍କୁ ଉଦ୍ଧାର କରିଥିଲେ। ଥାନାରେ ଜଣେ ମହିଳା ପୋଲିସ ଅଧିକାରୀଙ୍କ ନିକଟରେ ନାବାଳିକାଙ୍କ ବୟାନ ଲିପିବଦ୍ଧ କରାଯାଇଛି। ପରେ ତାଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାରେ ଡାକ୍ତରୀ ମାଇନା କରାଯିବା ପରେ ତାଙ୍କ ମାତାପିତାଙ୍କୁ ହସ୍ତାନ୍ତର କରାଯାଇଛି ।ସୋମବାର ମାଜିଷ୍ଟ୍ରେଟଙ୍କ ସମ୍ମୁଖରେ ନାବାଳିକାଙ୍କ ବୟାନ ରେକର୍ଡ ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ତଦନ୍ତକାରୀ ଅଧିକାରୀ କହିଛନ୍ତି ।
