ନୂଆଦିଲ୍ଲୀ,୧୪।୧୧: ଦେଶର ପ୍ରମୁଖ ଆୟୁର୍ବେଦିକ ସଂସ୍ଥା ପତଞ୍ଜଳି ପକ୍ଷରୁ ପ୍ରସ୍ତୁତ ୫ ମେଡିସିନର ବିକ୍ରି ଉପରେ ଉତ୍ତରାଖଣ୍ଡ ସରକାର କଟକଣା (ବ୍ୟାନ୍) ଲଗାଇଥିଲେ। ଏପରିକି ରାଜ୍ୟ ସରକାରଙ୍କ ପକ୍ଷରୁ ଗଠିତ ଏକ ଉଚ୍ଚସ୍ତରୀୟ ବିଶେଷଜ୍ଞ କିମିଟିର ପରାମର୍ଶ ପରେ ସରକାର ପତଞ୍ଜଳିର ଉକ୍ତ ଔଷଧଗୁଡ଼ିକ ଉପରେ ଲାଗିଥିବା କଟକଣାକୁ ହଟାଇ ଦେଇଛନ୍ତି।
ବିଶେଷକରି ଦିବ୍ୟ ମଧୁଗ୍ରିଡ ଟାବଲେଟ, ଆଇଗ୍ରିଡ ଗୋଲଡ, ଥାଇରୋଗ୍ରିଟ ଟାବଲେଟ, ଦିବ୍ୟ ବିପିଗ୍ରିଟ ଏବଂ ଦିବ୍ୟ ଲିପିଡମ ଟାବଲେଟ ଉପରେ ଉତ୍ତରାଖଣ୍ଡ ସରକାର କଟକଣା ଜାରି କରିଥିଲେ। ସେହିଭଳି ନିକଟରେ ରାଜ୍ୟ ସରକାର ଉକ୍ତ ଔଷଧଗୁଡିକୁ କଟକଣା ମୁକ୍ତ କରିବା ସହ କ୍ଷମା ପ୍ରାର୍ଥନା କରିଥିବା ପତଞ୍ଜଳି ପକ୍ଷରୁ ସ୍ପଷ୍ଟ କରାଯାଇଛି।
ଏ ସମ୍ପର୍କରେ ପତଞ୍ଜଳିର ବରିଷ୍ଠ ଅଧିକାରୀ କହିଛନ୍ତି, କୌଣସି ମେଡିସିନ ପ୍ରସ୍ତୁତ ପୂର୍ବରୁ ବିସ୍ତୃତ ଗବେଷଣା ଓ ବିକାଶ କାର୍ଯ୍ୟ ହୋଇଥାଏ। ବିଶେଷକରି ଆୟୁର୍ବେଦ ଏବଂ ଋଷି ପରମ୍ପରାକୁ କଳଙ୍କିତ କରିବା ପାଇଁ ଉତ୍ତରାଖଣ୍ଡର ଆୟୁର୍ବେଦିକ ଲାଇସେନ୍ସ ଅଧିକାରୀଙ୍କ ଅବିବେକିପୂର୍ଣ୍ଣ କାର୍ଯ୍ୟ ଯୋଗୁ ସରକାର ଉକ୍ତ ମେଡିସିନ ଉପରେ କଟକଣା ଲଗାଇଥିଲେ।
ଏପରିକି ପତଞ୍ଜଳିକୁ ବଦନାମ କରିବା ଦିଗରେ ଏଭଳି ଏକ ହୀନ ପ୍ରୟାସ ବେଶ୍ ନିନ୍ଦନୀୟ ବୋଲି ପତଞ୍ଜଳି ପକ୍ଷରୁ କୁହାଯାଇଛି। ଉକ୍ତ ଷଡ଼ଯନ୍ତ୍ରକୁ ସଂସ୍ଥା ପକ୍ଷରୁ ଦୃଢ଼ ବିରୋଧ ମଧ୍ୟ କରାଯାଇଛି। ପତଞ୍ଜଳି ବିଶ୍ୱର ପ୍ରଥମ ସଂସ୍ଥା, ଯାହାର ସର୍ବାଧିକ ରିସର୍ଚ୍ଚ ପେପର ପ୍ରକାଶିତ ହୋଇଛି। ସେହିପରି ଏନ୍ଏବିଏଚ୍ ସହବନ୍ଧିତ ହସ୍ପିଟାଲ ଏବଂ ଅନ୍ତର୍ଜାତୀୟ ମାନକ ଯୁକ୍ତ ଏନଏବିଏଲ ଅନୁବନ୍ଧିତ ରିସର୍ଚ୍ଚ ଲାବ୍ ସହ ଏହା କାମ ମଧ୍ୟ କରୁଛି। ପତଞ୍ଜଳିରେ ୫୦୦ରୁ ଊର୍ଦ୍ଧ୍ୱ ବିଶ୍ୱସ୍ତରୀୟ ବୈଜ୍ଞାନିକ ମଧ୍ୟ କାର୍ଯ୍ୟ କରୁଛନ୍ତି।
