ନୂଆଦିଲ୍ଲୀ,୩।୨: ଅଷ୍ଟ୍ରେଲିଆର ଟେଷ୍ଟ ଏବଂ ODI ଅଧିନାୟକ ପ୍ୟାଟ୍ କମିନ୍ସ ପ୍ରଥମ ଥର ପାଇଁ ସ୍ୱୀକାର କରିଛନ୍ତି ଯେ ସେ ତାଙ୍କ ଲମ୍ବା କ୍ୟାରିଅର ଏବଂ ୨୦୨୭ର ବ୍ୟସ୍ତବହୁଳ ଅନ୍ତର୍ଜାତୀୟ କ୍ୟାଲେଣ୍ଡରକୁ ଦୃଷ୍ଟିରେ ରଖି T୨୦ ବିଶ୍ୱକପରୁ ଓହରି ଯିବାକୁ ନିଷ୍ପତ୍ତି ନେଇଛନ୍ତି । ପିଠି ଆଘାତରେ ପୀଡିତ କମିନ୍ସଙ୍କ ସ୍ଥାନରେ ବେନ୍ ଡୋରଶୁଇସ୍ ଅଷ୍ଟ୍ରେଲିଆ ଦଳରେ ସ୍ଥାନ ପାଇଛନ୍ତି ।
ଗତ ବର୍ଷ ଜୁଲାଇରେ ୱେଷ୍ଟଇଣ୍ଡିଜ୍ ଗସ୍ତ ସମୟରେ କମିନ୍ସଙ୍କୁ ଏହି ଆଘାତ ଲାଗିଥିଲା। ସେବେଠାରୁ ସେ କେବଳ ଆଶେସ୍ ବିଜୟୀ ଆଡିଲେଡ୍ ଟେଷ୍ଟରେ ଖେଳିଛନ୍ତି । ମାତ୍ର ୧୧ଦିନ ମଧ୍ୟରେ ଆଶେସ୍ ସିରିଜ୍ ଜିତିବା ପରେ, ଅଷ୍ଟ୍ରେଲିଆ ଦଳ ପରିଚାଳନା ଏବଂ କମିନ୍ସ ନିଷ୍ପତ୍ତି ନେଇଥିଲେ ଯେ ସେ ସିଜିନର ଶେଷ ଦୁଇଟି ଟେଷ୍ଟ ଖେଳିବେ ନାହିଁ । ଯାହାଦ୍ୱାରା ସେ ଟି୨୦ ବିଶ୍ୱକପ୍ ପାଇଁ ସମ୍ପୂର୍ଣ୍ଣ ଫିଟ୍ ହୋଇପାରିବେ । ତଥାପି, ତାଙ୍କର ସୁସ୍ଥତା ସମୟ ବଢ଼ିବାରେ ଲାଗିଲା, ଯାହା ଫଳରେ କମିନ୍ସ ଟି୨୦ ବିଶ୍ୱକପ୍ ଛାଡିବାକୁ ନିଷ୍ପତ୍ତି ନେଇଥିଲେ।
କମିନ୍ସ କହିଛନ୍ତି, ଏହା ପ୍ରକୃତରେ ଦୁର୍ଭାଗ୍ୟଜନକ । ମୁଁ ସୁସ୍ଥ ଅନୁଭବ କରୁଥିଲି, କିନ୍ତୁ ମୋର ସମୟ ସରିଗଲା। ଏବେ, ମୋତେ କିଛି ସପ୍ତାହ ସମ୍ପୂର୍ଣ୍ଣ ବିଶ୍ରାମ ଆବଶ୍ୟକ। କମିନ୍ସ ବ୍ୟାଖ୍ୟା କରିଥିଲେ ଯେ ଆଡିଲେଡ୍ ଟେଷ୍ଟ ପରେ ଡାକ୍ତରମାନେ ଚାରିରୁ ଆଠ ସପ୍ତାହ ବିଶ୍ରାମ ନେବାକୁ ପରାମର୍ଶ ଦେଇଥିଲେ। ପ୍ରାରମ୍ଭରେ, ସେ ଭାବିଥିଲେ ଯେ ଚାରି ସପ୍ତାହ ଯଥେଷ୍ଟ ହେବ, କିନ୍ତୁ ଏକ ଫଲୋ-ଅପ୍ ସ୍କାନରୁ ଜଣାପଡ଼ିଲା ଯେ ହାଡ଼କୁ ସମ୍ପୂର୍ଣ୍ଣ ସୁସ୍ଥ ହେବା ପାଇଁ ଅଧିକ ସମୟ ଆବଶ୍ୟକ, ଯାହା ଫଳରେ ବିଶ୍ୱକପ୍ ଖେଳିବା କଷ୍ଟକର ହୋଇପଡ଼ୁଛି ବୋଲି ସେ କହିଛନ୍ତି ।
