କନ୍ଧମାଳ/ ଫୁଲବାଣୀ,୨ା୫(ସଞ୍ଜୟ କୁମାର ପାଣିଗ୍ରାହୀ/ରାକେଶ କୁମାର ରାଉତ): ମାଟ୍ରିକ ପରୀକ୍ଷା ଫଳାଫଳ ଶୁକ୍ରବାର ପ୍ରକାଶିତ ହୋଇଛି। ଚଳିତ ବର୍ଷ କନ୍ଧମାଳ ଜିଲାରେ ପାସ ହାର ୯୭.୪୫ ରହିଛି।
ଜିଲାର ୨୧୪ଟି ହାଇସ୍କୁଲର ସମୁଦାୟ ୯୮୭୭ ଛାତ୍ରୀଛା ପରୀକ୍ଷା ଦେଇଥିବା ବେଳେ ସେମାନଙ୍କ ମଧ୍ୟରୁ ୯୬୨୫ ଜଣ ଉତ୍ତୀର୍ଣ୍ଣ ହୋଇଛନ୍ତି। ସେମାନଙ୍କ ମଧ୍ୟରେ ୫୨୭୧ ଛାତ୍ରୀ ଏବଂ ୪୩୫୪ ଛାତ୍ର ଅଛନ୍ତି। ୬ଜଣ ଏ-୧ ଗ୍ରେଡରେ ପାସ ହୋଇଥିବା ବେଳେ ୪୬ ଜଣ ଏ-୨, ୩୦୩ଜଣ ବି-୧, ୧୨୯୨ ଜଣ ବି-୨, ୨୮୫୬ ଜଣ ସି, ୩୭୩୩ ଜଣ ଡି ଏବଂ ୧୩୮୯ ଜଣ ଇ ଗ୍ରେଡରେ ରହିଛନ୍ତି।
କନ୍ଧମାଳ ଜିଲାର ପାସହାର ରାଜ୍ୟ ପାସହାର ଠାରୁ ଅଧିକ ରହିଛି। ଏ -୧ ଗ୍ରେଡ ପାଇଥିବା ସମସ୍ତ ୬ ପରୀକ୍ଷାର୍ଥୀ ସରସ୍ବତୀ ଶିଶୁ ମନ୍ଦିରର ବୋଲି ଜଣାପଡିଛି। କୌଣସି ସରକାରୀ ବିଦ୍ୟାଳୟ ଛାତ୍ରୀଛାତ୍ରଙ୍କୁ ଏହି ସଫଳତା ମିଳିନାହିଁ। ଫୁଲବାଣୀ ସରସ୍ବତୀ ଶିଶୁ ମନ୍ଦିର ଛାତ୍ରୀ ଅନ୍ବେଷା ସାହୁ ୫୬୩(୯୩.୮୩%) ମାର୍କ ସହ ଜିଲ୍ଲା ଟପ୍ପର ହୋଇଛନ୍ତି। ସେହିପରି ଫୁଲବାଣୀ ଶିଶୁ ମନ୍ଦିରର ବିକାଶ ରଞ୍ଜନ କର (୫୫୮,୯୩%), ବାଲିଗୁଡ଼ା ଶିଶୁ ମନ୍ଦିରର ସୁଶ୍ରୀ ସମ୍ପନ୍ନା ପଣ୍ଡା (୫୫୭,୯୨.୮୩%),ରାଇକିଆ ଶିଶୁ ମନ୍ଦିରର ଦିପ୍ତିମୟୀ ବିଷୋୟୀ (୫୪୭,୯୧.୧୬%), ଫୁଲବାଣୀ ଶିଶୁ ମନ୍ଦିରର ଅର୍ଚ୍ଚିତା ଲହରିଆ (୪୩,୯୦.୦୫%) ଏବଂ ସାଇ ଶ୍ରୀୟା ସାହୁ (୫୪୦,୯୦%) ଙ୍କୁ ଏ -୧ ଗ୍ରେଡ ମିଳିଛି।
