ନୂଆଦିଲ୍ଲୀ,୨ା୧୨(ପି.ଟି.):ସମ୍ବିଧାନରେ ଅଚଳାବସ୍ଥା ଦୂର କରିବା ପାଇଁ ସୋମବାର ସରକାର ଓ ବିରୋଧୀ ଦଳଗୁଡ଼ିକ ବୁଝାମଣାରେ ପହଞ୍ଚତ୍ଛନ୍ତି। ସମ୍ବିଧାନ ଗୃହୀତ ହେବାର ୭୫ତମ ବର୍ଷ ଅବସରରେ ଏହା ଉପରେ ଲୋକ ସଭା ଏବଂ ରାଜ୍ୟ ସଭାରେ ଆଲୋଚନା ପାଇଁ ସରକାର ରାଜି ହୋଇଛନ୍ତି। ନିମ୍ନ ସଦନରେ ଡିସେମ୍ବର ୧୩ ଓ ୧୪ରେ ଏବଂ ଉଚ୍ଚ ସଦନରେ ୧୬ ଓ ୧୭ ତାରିଖରେ ସମ୍ବିଧାନ ଉପରେ ଆଲୋଚନା ହେବ। ସଂସଦୀୟ ବ୍ୟାପାର ମନ୍ତ୍ରୀ କିରେନ୍ ରିଜିଜୁ ଆଲୋଚନାର ତାରିଖ ଘୋଷଣା କରିବା ସହ ମଙ୍ଗଳବାରଠାରୁ ଗୃହକାର୍ଯ୍ୟ ସୁରୁଖୁରୁରେ ଚାଲିବା ନେଇ ଦୃଢ଼ୋକ୍ତି ପ୍ରକାଶ କରିଛନ୍ତି।
ଲୋକ ସଭା ବାଚସ୍ପତି ଓମ୍ ବିର୍ଲା ଏବଂ ବିଭିନ୍ନ ଦଳର ନେତାମାନଙ୍କ ମଧ୍ୟରେ ବୈଠକ ପରେ ଅଚଳାବସ୍ଥା ଦୂର ପାଇଁ ସହମତି ମିଳିଥିଲା। ବିରୋଧୀ ଦଳଗୁଡ଼ିକ ସମ୍ବିଧାନ ଉପରେ ଉଭୟ ଗୃହରେ ଆଲୋଚନା ଦାବି କରିଥିଲେ। ବିରୋଧୀ ଦଳଗୁଡ଼ିକ ସମ୍ଭଲ ଏବଂ ମଣିପୁର ହିଂସା ଆଦି ଅନ୍ୟ ପ୍ରସଙ୍ଗ ଉଠାଇଥିଲେ କି ବୋଲି ପ୍ରଶ୍ନ ହେବାରୁ ନିୟମ ଅନୁଯାୟୀ ଆଲୋଚନା ହେବ ବୋଲି ରିଜିଜୁ କହିଛନ୍ତି। ନଭେମ୍ବର ୨୫ରୁ ପାର୍ଲାମେଣ୍ଟର ଶୀତ ଅଧିବେଶନ ଆରମ୍ଭ ହୋଇଥିବାବେଳେ ଆଦାନୀ ଗ୍ରୁପ୍ ଅଧ୍ୟକ୍ଷ ଗୌତମ ଆଦାନୀ ଭାରତୀୟ ଅଧିକାରୀଙ୍କୁ ଲାଞ୍ଚ ଦେବା ନେଇ ଆମେରିକାର ଏକ ଅଦାଲତ ତାଙ୍କୁ ଅଭିଯୁକ୍ତ କରିଥିବାରୁ ଏହି ପ୍ରସଙ୍ଗରେ ଆଲୋଚନା ପାଇଁ କଂଗ୍ରେସ ଅଡ଼ିବସିଥିବାବେଳେ ସମ୍ଭଲ ଏବଂ ମଣିପୁର ହିଂସା ପ୍ରସଙ୍ଗ ଉଠାଇ ପାର୍ଲାମେଣ୍ଟର ଉଭୟ ଗୃହକୁ ବିରୋଧୀ ଅଚଳ କରି ରଖିଥିଲେ। ଅନ୍ୟପକ୍ଷରେ ତୃଣମୂଳ କଂଗ୍ରେସ (ଟିଏମ୍ସି) ସମେତ ଅନ୍ୟ କେତେକ ଦଳ ଆଦାନୀ ବିବାଦକୁ ପ୍ରାଥମିକତା ନ ଦେଇ ବେରୋଜଗାରୀ, ମୂଲ୍ୟବୃଦ୍ଧି, ଏବଂ କେନ୍ଦ୍ରୀୟ ପାଣ୍ଠି ମଞ୍ଜୁରୀରେ ବିରୋଧୀ ଦଳ ଶାସିତ ରାଜ୍ୟକୁ ପାତରଅନ୍ତର ଆଦି ପ୍ରସଙ୍ଗରେ ଆଲୋଚନା ଚାହୁଁଥିଲେ। ଅଧିବେଶନ ବେଳେ ଇଣ୍ଡିଆ ବ୍ଲକ୍ର ମିଳିତ ରଣନୀତି ପ୍ରସ୍ତୁତି ବୈଠକରେ ଟିଏମ୍ସି ଯୋଗଦେଇ ନ ଥିଲା। ଅନ୍ୟପକ୍ଷରେ ମୁଖ୍ୟ ବିରୋଧୀ ଦଳ କ୍ଷମତାରେ ଥିଲାବେଳେ ସାମ୍ବିଧାନିକ ନିୟମାବଳୀର ପ୍ରମୁଖ ଉଲ୍ଲଂଘନକାରୀ ଥିଲା ବୋଲି ଭାଜପା ଅଭିଯୋଗ କରିଥିଲା। ମୋଦି ସରକାର ଗତ ୧୦ ବର୍ଷ ମଧ୍ୟରେ ସାମ୍ବିଧାନିକ ବ୍ୟବସ୍ଥା ଓ ସିଦ୍ଧାନ୍ତକୁ ସୁଦୃଢ଼ କରିଥିବା ଶାସକ ଦଳ କହିଥିଲା।
