ପାରାଦୀପ,୭।୧(ଶରତ ରାଉତ):ଜଗତ୍ସିଂହପୁର ଜିଲା ପାରାଦୀପ ନିର୍ବାଚନମଣ୍ଡଳୀରେ ବିଜେଡି ରାଜନୀତି କ୍ରମଶଃ ବିବାଦୀୟ ହେବାରେ ଲାଗିଛି। ୨୦୧୯ରୁ ଚାଲି ଆସିଥିବା ବିବାଦ ୨୦୨୪ ନିର୍ବାଚନ ପରେ ଅଧିକ ହେଲାଣି ବୋଲି ଆଲୋଚନା ହେଉଛି। ସୋମବାର ଏହାର ପ୍ରତିଫଳନ ଦେଖିବାକୁ ମିଳିଛି। ବିଜେଡି ଡାକରା ଦେଇଥିବା ଭୁବନେଶ୍ୱର ଚାଲ ଅଭିଯାନରେ ପାରାଦୀପ ନଗର ସଭାପତି ତଥା ପୌରାଧ୍ୟକ୍ଷ ବସନ୍ତ ବିଶ୍ୱାଳ ଓ ତାଙ୍କ ସମର୍ଥକମାନେ ଦୂରେଇ ରହିଛନ୍ତି। ସେମାନେ ରାଲିରେ ସାମିଲ ହୋଇନାହାନ୍ତି। ଅପରପକ୍ଷେ ପାରାଦୀପ ବିଜେଡି ରାଲି ନେତୃତ୍ୱ ପୂର୍ବତନ ବିଧାୟକ ସମ୍ବିତ ରାଉତରାୟ ଓ କଂଗ୍ରେସରୁ ଆସି ଦଳରେ ମିଶିଥିବା ଅରିନ୍ଦମ ସର୍ଖେଲ (ବାପି)ନେଇଛନ୍ତି। ସମ୍ବିତ କୁହନ୍ତି, ଆମର ନେତା ହେଲେ ନବୀନ ପଟ୍ଟନାୟକ। ତାଙ୍କ ଡାକରାରେ ଆମେ ରାଲିରେ ଯାଉଛୁ। ନିର୍ବାଚନ ପରେ ଏବେ ଦଳ ପ୍ରଥମ କରି ଲୋକଙ୍କ ସମସ୍ୟାକୁ ନେଇ ରାସ୍ତାକୁ ଓହ୍ଲାଇଛି। ମାତ୍ର ଦଳରେ ଯେଉଁମାନେ ଢୋଲ ଭିତରେ ମୂଷା ଭଳି କାମ କରିଥିଲେ ସେମାନେ ଯାଇନାହାନ୍ତି। ଏ ସମ୍ପର୍କରେ ନଗର ସଭାପତି ବିଶ୍ୱାଳ କୁହନ୍ତି, ଦଳର କାର୍ଯ୍ୟକ୍ରମ ହୋଇଛି। ମୋର ଯିବାର ଥିଲା। ଜରୁରୀ କାମ ଯୋଗୁ ଯାଇ ପାରିନାହିଁ। ସୋମବାର ପାରାଦୀପରୁ ଯାଇଥିବା ଲୋକଙ୍କ ମଧ୍ୟରେ ସର୍ଖେଲଙ୍କ ସମର୍ଥକ ଅଧିକ ଥିବା ଜଣାପଡିଛି।
