ନୂଆଦିଲ୍ଲୀ,୧୧ା୩: ଦେଶରେ ଏଲପିଜି (LPG) ସଙ୍କଟକୁ ନେଇ ବ୍ୟାପୁଥିବା ଗୁଜବ ଓ ଭ୍ରମାତ୍ମକ ଖବର ଯୋଗୁଁ ଉପଭୋକ୍ତାଙ୍କ ମଧ୍ୟରେ ଆତଙ୍କ ଦେଖାଦେଇଛି। ଏହି କାରଣରୁ ଅନେକ ସ୍ଥାନରେ ଗ୍ୟାସ ସିଲିଣ୍ଡର ହୋର୍ଡିଂ ବା ମହଜୁଦ କରିବା ଏବଂ ପ୍ୟାନିକ୍ ବୁକିଂ ବୃଦ୍ଧି ପାଇଛି। ଏହାକୁ ଦୃଷ୍ଟିରେ ରଖି କେନ୍ଦ୍ର ସରକାର ଜନସାଧାରଣଙ୍କୁ ଆଶ୍ୱାସନା ଦେବା ସହ ଗୁରୁତ୍ୱପୂର୍ଣ୍ଣ ସୂଚନା ଜାରି କରିଛନ୍ତି।
ସରକାରଙ୍କ ନିର୍ଦ୍ଦେଶକ୍ରମେ ଦେଶରେ ଘରୋଇ ଏଲପିଜି ଉତ୍ପାଦନକୁ ୨୫% ପର୍ଯ୍ୟନ୍ତ ବୃଦ୍ଧି କରାଯାଇଛି। ସିଲିଣ୍ଡର ଅଭାବ ନେଇ ବ୍ୟାପୁଥିବା ମିଥ୍ୟା ଖବର ଉପରେ ବିଶ୍ୱାସ ନକରିବାକୁ ଏବଂ ଶାନ୍ତି ବଜାୟ ରଖିବାକୁ ସରକାରୀ ଅଧିକାରୀମାନେ ଅନୁରୋଧ କରିଛନ୍ତି।
ପେଟ୍ରୋଲିୟମ ମନ୍ତ୍ରାଳୟର ଅଧିକାରୀ ସୁଜାତା ଶର୍ମା କହିଛନ୍ତି ଯେ, ଏଲପିଜି ଭର୍ତ୍ତି କାର୍ଗୋ ଜାହାଜ ଭାରତ ଅଭିମୁଖେ ଆସୁଛି ଏବଂ ଆସନ୍ତା ୧-୨ ଦିନ ମଧ୍ୟରେ ଏହା ପହଞ୍ଚିଯିବ।
ଭାରତ ତାର ମୋଟ ଏଲପିଜି ଆବଶ୍ୟକତାର ପ୍ରାୟ ୬୦% ଆମଦାନୀ କରିଥାଏ। ଏଥିମଧ୍ୟରୁ ୯୦% ଆମଦାନୀ ‘ଷ୍ଟ୍ରେଟ୍ ଅଫ୍ ହର୍ମୁଜ’ ଦେଇ ହୋଇଥାଏ। ସାମ୍ପ୍ରତିକ ସ୍ଥିତିକୁ ସମୀକ୍ଷା କରିବା ପାଇଁ ପେଟ୍ରୋଲିୟମ, ବୈଦେଶିକ ବ୍ୟାପାର ଏବଂ ଜଳପଥ ମନ୍ତ୍ରାଳୟ ପକ୍ଷରୁ ମିଳିତ ଭାବେ ଏହି ସୂଚନା ଦିଆଯାଇଛି।
