ମୋହନା,୨୦।୫(ମନ୍ମଥ ମିଶ୍ର): ଗଜପତି ଜିଲା ମୋହନା ବ୍ଲକ କର୍ଚ୍ଚବାଡି ଗ୍ରାମ ପଞ୍ଚାୟତର ଶୁଖିଲା ଆମ୍ବ ଛକରେ ଜୋର୍ ଜବରଦସ୍ତ ଭାବେ ବାସଗୃହ ନିର୍ମାଣକୁ ନେଇ ମୋହନା ତହସିଲଦାରଙ୍କୁ ଘେରାଉ କରାଯାଇଛି। ମଙ୍ଗଳବାର ଦିନ ୧୨ଟା ସମୟରେ ମୋହନା ବ୍ଲକ ଅନ୍ତର୍ଗତ କର୍ଚ୍ଚବାଡି ପଞ୍ଚାୟତର ସରପଞ୍ଚ ଚାନ୍ଦିନୀ ମଳିକଙ୍କ ନେତୃତ୍ୱରେ ମୋହନା ବ୍ଲକ ଚେୟାରମ୍ୟାନ ରଞ୍ଜୀବ ଶବର, ପୂର୍ବତନ ସରପଞ୍ଚ କାମ୍ବି ମଳିକ, ସମିତି ସଭ୍ୟ ଟୁନା ମଳିକ, ଜିଲା ପରିଷଦ ସଭ୍ୟ ଚନ୍ଦ୍ର ମଳିକ, ନାଏବ ସରପଞ୍ଚ ମମତାଜ ପ୍ରିୟଦର୍ଶନୀ ପାଲ,ୱାର୍ଡ଼ ମେମ୍ବରଙ୍କ ସହ ଶତାଧିକ ମହିଳା ଓ ପୁରୁଷ ମୋହନା ତହସିଲଦାରଙ୍କୁ ଘେରିଛନ୍ତି।
ଶୁଖିଲା ଆମ୍ବ ଛକରେ ଥିବା ସରକାରୀ ଜମିରେ ବେଆଇନ ଭାବେ ଅନ୍ୟ ଜିଲାର ୪ ପରିବାର ଜୋର୍ ଜବରଦସ୍ତ କରି ଘର ନିର୍ମାଣ କରି ରହି ଆସୁଛନ୍ତି। ଏହାକୁ ବିରୋଧ କରି ବାରମ୍ବାର ମୋହନା ତହସିଲଦାରଙ୍କୁ ବହୁବାର ଲିଖିତ ଅଭିଯୋଗ କରିଥିଲେ ମଧ୍ୟ ସେଥିପ୍ରତି କର୍ଣ୍ଣପାତ କରାଯାଉ ନ ଥିବା ଅଭିଯୋଗ କରିଛନ୍ତି ପଞ୍ଚାୟତର ସରପଞ୍ଚ ଓ ସମିତି ସଭ୍ୟ। ଯାହାକୁ ନେଇ ଆଜି ମୋହନା ତହସିଲଦାର ଚକ୍ରଧର ପାଢ଼ୀ ପଞ୍ଚାୟତର ଜନସାଧାରଣଙ୍କୁ ୩ ଦିନ ଭିତରେ ଉକ୍ତ ଜାଗାକୁ ତନଖି କରି ଜୋର୍ ଜବରଦସ୍ତିରେ ଗୃହ ନିର୍ମାଣ କରିଥିବା ଘରକୁ ଉଠାଯିବ ବୋଲି ପ୍ରତିଶୃତି ଦେବାପରେ ପଞ୍ଚାୟତର ଜନ ପ୍ରତିନିଧିଙ୍କ ସହ ଜନସାଧାରଣ ତହସିଲ କାର୍ଯ୍ୟଳୟରୁ ବାହାରିଥିଲେ। ଯଦି ଆଗାମୀ ଦିନରେ ସେମାନଙ୍କୁ ଉଠା ନ ଯାଏ ତା ହେଲେ ଅଞ୍ଚଳବାସୀ ରାଜ ରାସ୍ତାରେ ଜନ ଆନ୍ଦୋଳନ କରିବା ପାଇଁ ଚେତାବନୀ ଦେଇଛନ୍ତି ।
