ନୂଆପଡ଼ା,୯ା୩ (ମକାରୁ ବେମାଲ): ନୂଆପଡ଼ା ଜିଲାର ପଞ୍ଚାୟତ କାର୍ଯ୍ୟାଳୟ ଏବେ ଆବର୍ଜନା ସ୍ଥଳ ପାଲଟିଛି। ଦୀର୍ଘଦିନ ଧରି ଆବର୍ଜନା ପଡିରହୁଥିବାରୁ କାର୍ଯ୍ୟାଳୟ ପରିସର ପ୍ରଦୂଷିତ ହେବାରେ ଲାଗିଛି। ଜିଲା ପ୍ରଶାସନ ପକ୍ଷରୁ ପ୍ଲାଷ୍ଟିକ ମୁକ୍ତ ଜିଲା ଗଠନ କରିବା ପାଇଁ ଆହ୍ବାନ ଦିଆଯାଇଛି। ପଲିଥିନ, ପ୍ଲାଷ୍ଟିକ ବୋତଲ ଓ ଏକକ ବ୍ୟବହାର ପ୍ଲାଷ୍ଟିକ ବନ୍ଦ କରିବା ପାଇଁ ଜିଲାପାଳ ମଧୁସୂଦନ ଦାଶଙ୍କ ନିର୍ଦ୍ଦେଶକ୍ରମେ ଅଭିଯାନ ଜାରି ରହିଛି। ୨୦୨୫ ଜୁନ ୧୩ରୁ ଏକକ ପ୍ଲାଷ୍ଟିକ ମୁକ୍ତ ଅଭିଯାନ ଆରମ୍ଭ କରି ପ୍ରତି ଗାଁ ଓ ପଞ୍ଚାୟତ କାର୍ଯ୍ୟାଳୟକୁ ଯାଇ ସଚେତନତା କରି ଅଳିଆ ଆବର୍ଜନା ଗୋଟାଇବା ଆରମ୍ଭ କରିଥିଲେ। ଏହାସହ ପ୍ରତି ସୋମବାର ସଦର ମହକୁମା ଓ ବ୍ଲକରେ ଅଭିଯୋଗ ଶୁଣାଣି ଶିବିର ପରେ ଅପରାହ୍ନରେ ସେହି ବ୍ଲକର ଯେ କୌଣସି ପଞ୍ଚାୟତ କାର୍ଯ୍ୟାଳୟଠାରେ ଏକକ ବ୍ୟବହାର ପ୍ଲାଷ୍ଟିକ ମୁକ୍ତ ସଚେତନତା କାର୍ଯ୍ୟକ୍ରମରେ ଆବର୍ଜନା ଗୋଟାଇ ଜିଲାକୁ ପ୍ଲାଷ୍ଟିକ ମୁକ୍ତ କରିବା ପାଇଁ ବାର୍ତ୍ତା ଦେଇଆସୁଛନ୍ତି। ବର୍ତ୍ତମାନ ଶନିବାର ଦିନକୁ ପ୍ରଶାସନ ପକ୍ଷରୁ ସ୍ବଚ୍ଛତା ସଚେତନତା ଦିବସ ଭାବରେ ଗ୍ରହଣ କରାଯାଇ ଅଧିକାରୀ, କର୍ମଚାରୀମାନେ ଗାଁକୁ ଗାଁ ଯାଇ ସଫେଇ ପରେ ଅଳିଆ ଆବର୍ଜନା ଅନ୍ୟତ୍ର ନ ଫିଙ୍ଗି କିମ୍ବା ନିଆଁରେ ନ ପୋଡି ପଞ୍ଚାୟତ କାର୍ଯ୍ୟାଳୟରେ ଜମା କରି ଫେରୁଛନ୍ତି। ଫଳରେ ଏବେ ବିଭିନ୍ନ ପଞ୍ଚାୟତ କାର୍ଯ୍ୟାଳୟରେ କୁଢ କୁଢ ଅଳିଆ ଆବର୍ଜନା ପଡିରହିଛି। ଏହା ପଚିଶଢି ଦୁର୍ଗନ୍ଧ ହେବା ସହ ମଶାମାଛିଙ୍କ ଅନ୍ତୁଡିଶାଳ ପାଲଟିଛି। ଏ ସମ୍ପର୍କରେ ଜଣେ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀଙ୍କୁ ପଚାରିବାରୁ ଅଳିଆ ଫିଙ୍ଗିବା ପାଇଁ ଆମକୁ କୌଣସି ନିର୍ଦ୍ଦେଶ ନ ଥିବାବେଳେ ପ୍ରାୟ ୯ ମାସ ହେବ ଅଳିଆ ପଡିରହିଛି। ଦୁର୍ଗନ୍ଧ ଯୋଗୁ ହିତାଧିକାରୀ ପଞ୍ଚାୟତ ଆସିବା ପାଇଁ ନାକ ଟେକୁଛନ୍ତି ବୋଲି କହିଥିଲେ। ଜିଲାପାଳ ଦାଶଙ୍କୁ ପଚାରିବାରୁ ପଞ୍ଚାୟତ ପିଇଓମାନେ ଅଳିଆକୁ ଏନ୍ଏସିକୁ ହସ୍ତାନ୍ତର କରିବେ। ଏନ୍ଏସି କର୍ମଚାରୀ ଅନ୍ୟତ୍ର ନେଇ ପୋଡିବେ ନ ହେଲେ ଗାତକରି ପୋତିଦେବେ ବୋଲି କହିଥିଲେ।