ଖୋର୍ଦ୍ଧା,୨୫ା୮(ପ୍ରଭାତ ପାଣିଗ୍ରାହୀ): ଗତ ସପ୍ତାହେ ହେଲା ଖୋର୍ଦ୍ଧାରେ ଲଘୁଚାପ ବର୍ଷା ଲାଗିରହିଛି। ସହରର ଡ୍ରେନ ପାଣି ନିଷ୍କାସନ ହୋଇ ନ ପାରି ରାସ୍ତା ଉପରକୁ ଉଦ୍ବୃତ୍ତ ହୋଇଆସୁଛି। ରାସ୍ତାରେ ଥିବା ଖାଲଖମାରେ ବର୍ଷାଜଳ ଜମି ରହିଛି। ପଲ୍ଲା ଛକ ଗଜପତି ପ୍ରତିମୂର୍ତ୍ତି ଛକରେ ବଡ଼ ବଡ଼ ଗାତ ସୃଷ୍ଟି ହୋଇ ମରଣଯନ୍ତା ପାଲଟିଛି। ଫଳରେ ଯାନବାହନ ଯାତାୟତବେଳେ ଅସୁବିଧାର ସମ୍ମୁଖୀନ ହେଉଛନ୍ତି। ଏପରିକି ଅନେକ ସମୟରେ ଦୁର୍ଘଟଣା ଘଟୁଛି। ଗାତରେ ପାଣି ଜମି ରହିବା ଫଳରେ ଆମ୍ବୁଲାନ୍ସ, ଘରୋଇ ବସ୍ ଚକା ଦବୁଛି। ରାସ୍ତା ସାରା ଖାଲ ଯୋଗୁ ଯାତ୍ରୀ ହଇରାଣ ହେଉଛନ୍ତି। ରାସ୍ତା ମରାମତି ଉପରେ ଗୁରୁତ୍ୱ ଦିଆଯାଉନାହିଁ। ରାସ୍ତା ପାର୍ଶ୍ୱ ଦୋକାନ ଗୃହ ଆଗରେ ପାଣି ଜମି ରହି ମଶାଙ୍କ ପ୍ରାଦୁର୍ଭାବ ବଢୁଛି। ପଲ୍ଲା ଛକ ସ୍ଥାନୀୟ ଲୋକ ଏବଂ ବ୍ୟବସାୟୀଙ୍କ ମୁଣ୍ଡବ୍ୟଥା ବଢାଇଛି। ଏହି ରାସ୍ତାର ଗୋଟିଏ ପାର୍ଶ୍ୱରେ ଜିଲାପାଳଙ୍କ କାର୍ଯ୍ୟାଳୟ ଏବଂ ୧୬ ନମ୍ବର ଜାତୀୟ ରାଜପଥକୁ ସଂଯୋଗ କରୁଥିବା ବେଳେ ଅନ୍ୟପଟେ ନୂଆ ବସଷ୍ଟାଷ୍ଟଠାରୁ ଟିଏଳ୍ସି ରୋଡ ବାଇପାସ୍ ଦେଇ ୫୭ ନମ୍ବରକୁ ସଂଯୋଗ କରୁଛି। ଏହାର ଚାରିପାଖରେ ଦୋକାନ ବଜାର ଖୁନ୍ଦି ହୋଇ ରହିଥିବାବେଳେ ନିକଟରେ ବିଭିନ୍ନ କାର୍ଯ୍ୟାଳୟ ରହିଛି। ନିମ୍ନମାନର କାମ ଯୋଗୁ ବାରମ୍ବାର ରାସ୍ତାରୁ ପିଚୁ ଛାଡ଼ିବା ସହ ଖାଲଖମା ହେଲାଣି ବୋଲି ଲୋକେ କହୁଛନ୍ତି। ଲକ୍ଷାଧିକ ଟଙ୍କା ବ୍ୟୟରେ ଜିଲାପାଳଙ୍କ କାର୍ଯ୍ୟାଳୟଠାରୁ ପଲ୍ଲା ଛକ ନୂଆ ବସଷ୍ଟାଣ୍ଡଠାରୁ ଚଣ୍ଡିଚୁଆ ଛକ ପର୍ଯ୍ୟନ୍ତ ରାସ୍ତା ନିର୍ମାଣ କରାଯାଇଛି। କିଛି ମାସ ପରେ ରାସ୍ତାର ପିଚୁ ଉଠି ଗାତ ସୃଷ୍ଟି ହେଲାଣି। ତେଣୁ ଗାଡ଼ି ଚଳାଚଳରେ ସମସ୍ୟା ଉପୁଜୁଛି। ନିକଟରେ ପୂର୍ତ୍ତବିଭାଗ ରାସ୍ତା ଉଭୟ ପାର୍ଶ୍ୱରେ ଥିବା ଗାତରେ ଗୋଡ଼ି ପଥର ପକାଇ କାମ ସାରିଦେଇଥିଲେ। ଏହି ରାସ୍ତାରୁ ପୁଣି ଥରେ ପିଚୁ ଉଠି ବିପର୍ଯ୍ୟସ୍ତ ହୋଇପଡ଼ିଛି। ଏନେଇ ପୂର୍ତ୍ତ ବିଭାଗର ଜଣେ ଅଧିକାରୀ କହିଛନ୍ତି, ବର୍ଷା ଛାଡ଼ିବା ପରେ ରାସ୍ତା ମରାମତି କରାଯିବ।
